Atënë so azo ahunda

Na Psaume 102:27, a tene so fade yayu na sese “afuti”. So aye ti tene a yeke futi ande sese so?

Na yâ mbeni sambela ti lo na Jéhovah, wasungo psaume atene: “Giriri Mo leke gere ti sese so, na ayayu ayeke kusala ti tïtî mo. Fade ala futi, me Mo ngbâ, biani, fade ala kue aga tongana ngbene bongo; fade Mo changé ala tongana bongo, na fade ala hon.” (Psaume 102:26, 27). Aversê so aga kozo na atënë so afa so aversê so ayeke sara tënë ti futingo ti sese pëpe, me a sara tënë ti Nzapa so ayeke kpu na kpu. Aversê ni kue afa nga ngbanga ti nyen tâ tënë so ayeke dutingo ti Nzapa kpu na kpu ayeke mbeni dengo bê teti awakua ti lo.

Wasungo psaume ni, so peut-être lo yeke ngbâa na Babylone, ato nda ni na fango vundu ti lo. Lo dema lo tene lango ti lo ayeke hon tongana “guru-wa”. Teti gingo bê ahon ndo ti lo, a sara si bio ti lo amû wâ “tongana tanda” wala dukë. Lo nze kue, lo “hule tongana pere”, na lo bâ tere ti lo “tongana tiri [wala nzêrë] so ayeke gi lo oko na ndoda.” Atara ti lo asara si yanga ti lo anzere pëpe na gigi ti lo asi singo na vundu (Psaume 102:4-12). Atâa so kue, wasungo psaume ni ayeke lakue na beku. Ngbanga ti nyen? Ngbanga ti ye so Jéhovah azê ti sara na Sion, wala Jérusalem.

Atâa so na ngoi ni kâ a futi Sion awe, Jéhovah amû zendo so fade a yeke kiri ti leke ni (Esaïe 66:8). Ni la, na beku wasungo psaume ni atene na Jéhovah: “Fade Mo londo ti sara nzobe na Sion, teti a yeke ngoi ti sara nzobe na lo; L’Eternel asara Sion awe.” (Psaume 102:14, 17). Na pekoni, lo kiri na ndo ye so lo yeke hu pono ndali ni. Lo tene so tongana a lingbi ti kiri ti leke Jérusalem so ayeke yangbato na lege ti ngangu ti Nzapa, biani Jéhovah alingbi ti zi ni na yâ pono ti ni (Psaume 102:18, 21, 24). Nga, mbeni ye nde ayeke dä so apusu wasungo psaume ti zia bê ti lo kue na Jéhovah. Ye ni so ayeke nyen? Dutingo ti Nzapa kpu na kpu.

Kota kangbi ayeke na popo ti dutingo ti Jéhovah kpu na kpu na gigi ti wasungo psaume ni so aninga pëpe. Lo tene na Jéhovah: “Ngu ti Mo alingbi na awagame kue.” (Psaume 102:25). Na pekoni, wasungo psaume atene: “Giriri Mo leke gere ti sese so, na ayayu ayeke kusala ti tïtî mo.”​—Psaume 102:26.

Ye oko, même ayayu na sese so aninga angu mingi awe, zo alingbi pëpe ti haka ngu ti ala na Jéhovah so ayeke ti lo kpu na kpu. Wasungo psaume akiri atene: “Fade [yayu na sese afuti], me Mo ngbâ.” (Psaume 102:27). Sese na yayu so e yeke bâ alingbi ti futi. A yeke tâ tënë so na yâ ti ambeni versê, Jéhovah atene so ala yeke ngbâ lakue lakue (Psaume 119:90; Zo-ti-fa-tene 1:4). Me a lingbi ti futi yayu na sese tongana bê ti Nzapa aye fade. Nde na tënë so, Nzapa alingbi ti kui lâ oko pëpe. Aye so Nzapa asara na so e yeke bâ ni ayeke “ngbâ lakue lakue” gi ngbanga ti so lo yeke bata ala (Psaume 148:6). Tongana Jéhovah azia ti bâ lege ti aye so lo leke, “fade ala kue aga tongana ngbene bongo”. (Psaume 102:27). Tongana ti so bongo ti zo ayeke buba kozoni na zo ni, aye so Jéhovah aleke alingbi ti buba tongana lo ye fade tongaso. Ye oko, na lege ti ambeni versê ti Bible, e hinga so lo ye tongaso pëpe. Mbeti ti Nzapa atene na e biani so Jéhovah amû yanga so yayu na sese so e yeke bâ so ayeke ngbâ ande teti lakue lakue.​—Psaume 104:5.

A yeke ye ti dengo bê ti hinga so Jéhovah ayeke duti ande dä lakue ti sara si azendo ti lo kue aga tâ tënë. Atâa atara so alingbi ti si na e ayeke tongana nyen, tongana e toto na Jéhovah, e yeke na beku so biani lo yeke “mä sambela ti ala so ye amanke ala mingi, na Lo ke sambela ti ala pëpe.” (Psaume 102:18). Biani, na Psaume 102, zendo ti Jéhovah ti mû maboko na e ayeke même ngangu mingi ahon sese so e yeke na ndo ni.