Vorongo so ayeke nzoni teti mo

ASAPH, mbeni oko ti awasungo psaume, atene: “A yeke nzoni na mbi ti ga nduru na Nzapa.” Na mbeni ngoi, Asaph aga nduru ti mû peko ti azo so abi bê oko pëpe na Nzapa tongaso si fini ti lo aga nzoni. Me na pekoni lo bi bê ti lo na ndo aye ti nzoni so lo yeke wara tongana lo ga nduru na Nzapa, na lo bâ so a yeke nzoni teti lo (Psaume 73:2, 3, 12, 28). Laso tâ vorongo ayeke nzoni teti mo? Na lege wa a lingbi ti sara nzoni na mo?

Ti voro tâ Nzapa ayeke mû maboko na mo ti wara mbeni ye so ayeke kota mingi ahon ti bâ gi nzoni ti mo mveni. Ndali ti lege so “Nzapa ti ndoye” asara e na ni, azo so ayeke gi gi nzoni ti ala alingbi ti wara ngia lâ oko pëpe (2 aCorinthien 13:11). Jésus afa mbeni kpengba tâ tënë na ndo ti sarango ye ti zo tongana lo tene: “Ngia ayeke na zo so amû ye, ahon ngia ti lo so akamata ye.” (Kusala 20:35). Nda ni la ti sara mbeni ye ndali ti akamarade wala afami ti e ayeke mû na e ngia. Me zo ayeke duti na kota ngia tongana lo sara mbeni ye ndali ti Nzapa. A yeke Lo si a lingbi e ndoye lo mingi ahon tanga ti azo kue. Azo mingi mingi so dutingo ti ala ayeke nde nde abâ so ti voro Nzapa tongana ti so lo hunda aga na tâ nzerengo tere.​—1 Jean 5:3.

Dutingo na mbeni ye ti sara na yâ fini ti mo

Ti voro tâ Nzapa ayeke nga nzoni teti mo ngbanga ti so mo yeke duti na mbeni ye ti sara na yâ fini ti mo. Mo bâ awe so fani mingi mo yeke na ngia tongana mo hinga so mo sara mbeni nzoni ye? Mingi ti azo ayeke na mbeni ye ti sara na yâ fini ti ala, so andu fami ti ala, akamarade ti ala, dengo buze wala aye so amû ngia na ala. Mingi ni aye so aga na ala ngia pëpe ngbanga ti so aye so zo aku tere ti lo na ni pëpe ayeke si (Zo-ti-fa-tene 9:11). Ye oko, tâ vorongo amû maboko na mo ti wara mbeni kota ye ti sara na yâ fini ti mo, ye so angbâ ti mû na mo ngia même tongana ambeni ye ti gigi azia vundu na bê ti mo.

Tâ vorongo ahunda zo ti hinga Jéhovah na ti sara na lo be-ta-zo. Ala so avoro Nzapa na lege ni aga nduru mingi na lo (Zo-ti-fa-tene 12:15; Jean 4:23; Jacques 4:8). Peut-être mo bâ so a yeke ngangu ti hinga Nzapa nzoni tongaso si lo ga kamarade ti mo. Me tongana mo gbu li na ndo aye so lo sara na azo na mo bâ ye kue so lo sara, mo lingbi biani ti hinga ambage nde nde ti sarango ye ti tere ti lo (aRomain 1:20). Na ndo ni, tongana mo diko Bible, mo lingbi ti hinga ngbanga ti nyen e yeke na fini, ngbanga ti nyen Nzapa azia lege na pasi nga tongana nyen lo yeke hunzi ande pasi ni. Nga, ahon kue, mo yeke hinga tongana nyen mo lingbi ti duti na mbeni kpengba ye ti sara na yâ ti ye so Nzapa aleke awe ti sara (Esaïe 43:10; 1 aCorinthien 3:9). Ti hinga aye so ayeke fa na mo mbeni nda ti tënë nde so ndali ni mo yeke na fini!

Gango tâ nzoni zo

Ti voro tâ Nzapa ayeke nzoni teti mo ngbanga ti so a yeke mû maboko na mo ti ga biani nzoni zo. Tongana mo yeke voro tâ Nzapa, mo yeke wara mbeni nzoni sarango ye ti tere so ayeke sara si mo yeke lë pendere songo na azo. Mo lingbi ti mû tapande ti Nzapa na ti Molenge ti lo na ndo tënë ti sarango ye na lege ni, ti sarango tënë na zo na nzobe nga ti duti zo so azo alingbi ti zia bê kue na lo (aEphésien 4:20–5:5). Tongana mo hinga Nzapa nzoni si mo ndoye lo fade a pusu mo ti mû tapande ti lo. Bible atene: “I sara legeoko tongana Nzapa asara, tongana amolenge so Lo ndoye i mingi.”​—aEphésien 5:1, 2.

A yeke nzere ande na mo pëpe ti duti na popo ti azo so ayeke mû tapande ti ndoye ti Nzapa? Ye ti ngia ni ayeke so, vorongo tâ Nzapa ayeke mbeni kusala so mo yeke sara ni gi mo oko pëpe. A sara si mo ga nduru na azo so andoye ye so ayeke mbilimbili nga nzoni. Biani, peut-être tënë ti duti na yâ ti mbeni bungbi ti vorongo nzapa anzere na mo pëpe. Ye oko, tongana ti so e bâ fade na kozo article ni, kpale ni ayeke tënë ti lekengo abungbi ti vorongo nzapa pëpe. Me, kpale ti mingi ti abungbi ti nzapa ayeke so a leke ala na lege ni pëpe nga ndali ti nzoni ye pëpe. Mingi ti abungbi ti vorongo nzapa ayeke sara aye so ague tâ nde na tënë ti Nzapa so Christ afa pekoni. A yeke Jéhovah lo mveni si aleke azo ti lo teti mbeni nzoni kusala. Bible atene: “Nzapa ayeke Nzapa so asara ye na lege ni, na Lo yeke Nzapa ti siriri.” (1 aCorinthien 14:33). Legeoko tongana azo kutu mingi, mo lingbi ti bâ so ti duti na yâ mbeni bungbi ti aChrétien so a leke ni nzoni ayeke leke bango ndo ti mo nzoni.

Beku teti gigi ti kekereke

Bible afa so laso Nzapa ayeke leke atâ wakua ti lo na yâ mbeni bungbi si ala lingbi ti sö kuâ na hunzingo ti aye ti fadeso na ti wara mbeni fini sese so “mbilimbili aduti na yâ ni.” (2 Pierre 3:13; Apocalypse 7:9-17). Tongaso, vorongo so ayeke nzoni teti mo amû na mo beku, beku so ayeke kota ye ti tene mo duti na ngia. Ambeni zo azia beku ti gigi ti ala ti kekereke na ndo agovoroma so gere ni aluti nzoni, adengo buze so amaï nzoni wala na ndo nzoni seni nga na ndo nzoni retraite. Me a yeke ngangu ti tene mbeni oko ti aye so amû na zo mbeni kpengba beku na ndo mbeni nzoni gigi ti kekereke. Na mbage, bazengele Paul atene: “E zia bê ti e na Nzapa so ayeke na fini.”​—1 Timothée 4:10.

Tongana mo gi ndo nzoni, mo lingbi ti wara atâ wakua ti Nzapa. Na yâ ti sese so akangbi kirikiri laso, a hinga aTémoin ti Jéhovah polele ndali ti ndoye na dutingo beoko so ala yeke na ni. Ala londo na yâ ti amara nde nde nga sarango ye ti ala ayeke nde nde; ye oko ndoye ti mba ti ala nga na ti Jéhovah abungbi ala oko (Jean 13:35). Ala tisa mo ti tene mo mveni mo ga mo bâ ye so asi na ala. Asaph atene: “A yeke nzoni na mbi ti ga nduru na Nzapa.”​—Psaume 73:28.

[Foto na lembeti 7]

Mo lingbi ti ga ndeko ti Nzapa