Kota vundu so ayeke kaï hio pëpe

ADE ti ninga mingi pëpe, mbeni wagingo nda ti ye aye ti hinga ye so hongo ti ngoi ayeke sara na ndo ti azo so ayeke na vundu, ndali ti so mbeni zo so ala ye lo mingi akui. Lo leke ambeni hundango tënë so lo tokua na ambeni babâ na mama so amolenge ti ala akui a sara angu mingi awe. Ambeni ti ala akiri tënë pëpe na ahundango tënë so. Mbeni babâ so iri ti lo ayeke Vladimir, so molenge ti lo ti koli akui a sara ngu oku awe, atene so a yeke lakue ngangu na lo ti sara tënë na ndo ti molenge ti lo ni.a

Mara ti kota vundu so, so akaï hio pëpe, ayeke si ka mingi na ababâ na mama so molenge ti ala akui. A sara ngu bale-oko awe so molenge ti William so ayeke na ngu 18 akui kuâ ti ngu. William atene: “Vundu angbâ ti sara mbi na a yeke ngbâ ande lakue ti sara mbi na lâ ti fini ti mbi kue.” Ngu oku na pekoni so molenge ti Lucie awara kuâ na peko ti mbeni kobela so aninga mingi pëpe, Lucie atene: “Na yâ ti akozo lango ni, mbi yeke gbu li ti mbi, mbi tene ‘so tâ ye la?’ Na mbi, ye so asi ayeke lani gi mbeni sioni bango li, na mbi yeke zingo na pekoni. Me tongana ngoi ayeke hon, mbi bâ so ye so asi na mbi ayeke tâ ye, na molenge ti mbi ayeke kiri pëpe na yanga-da. Molenge ti mbi akui a sara ngu oku awe, me ngoi na ngoi, tongana mbi yeke gi mbi oko, mbi yeke toto lo mingi.”

Ngbanga ti nyen ababâ na mama tongana Vladimir, William nga na Lucie so amolenge ti ala akui aduti na kota vundu so akaï hio pëpe? Zia e bâ ambeni raison ni.

Ngbanga ti nyen kota vundu tongaso?

Tongana a dü mbeni molenge na yâ ti mbeni sewa, ababâ na mama ayeke wara mbeni nzerengo tere so ayeke nde na nzerengo tere so atingbi azo. Gi na yongo molenge ni, na bango lo na ngoi so lo yeke lango wala na bango lo na hengo ngia, ababâ na mama ni ayeke wara kota ngia. Ababâ na mama so asara ye na ndoye aye amolenge ti ala mingi. Ala yeke fa na ala ti sara ye na lege ni nga ti ne zo (1 aThessalonicien 2:7, 11). Tongana amolenge ni ayeke sara ye alingbi na ye so a fa na ala, ababâ na mama ni ayeke pika kate, na ala yeke to nda ti zia bê ti ala mingi na ndo ti amolenge ni.

Ababâ na mama so ayeke bata amolenge ti ala nzoni ayeke sara kusala ngangu ti mû na amolenge ti ala ye so ala yeke na bezoin ni. Peut-être ala yeke bata nginza wala akungba ti mû lege na amolenge ti ala ti sara na sewa ti ala wani mbeni lâ (2 aCorinthien 12:14). Ababâ na mama ayeke bi bê mingi na ndo amolenge ti ala, ala yeke mû ngoi ti ala, ngangu ti ala nga na nginza ti ala ti bata na amolenge ti ala. Nda ni so ala yeke sara aye so kue ayeke ti tene amolenge ni angbâ na fini, me ala kui pëpe. Tongana mbeni molenge akui, kusala so babâ na mama ayeke sara ndali ti batango na molenge ni ade ti hunzi pëpe, na beku so ala zia na ndo ti lo atï na ngu. Lege akanga na babâ na mama ti fa ndoye so ala yeke na ni na mbage ti molenge ni, ndali ti so kuâ ayeke tongana mbeni ye so akangbi ala na molenge ti ala. Place so molenge ti ala ti koli wala ti wali ayeke na ni na yâ ti bê ti ala angbâ fadeso gi senge. Ababâ na mama awara mbeni kota vundu so ayeke kaï hio pëpe.

Bible afa na e so ababâ na mama so amolenge ti ala akui ayeke wara mbeni kota vundu so ayeke kaï hio pëpe. Bible asara tënë ti ye so asi na Jacob tongana lo mä a tene a fâ molenge ti lo Joseph. Versê ni atene: “Jacob asuru bongo ti lo, lo kanga bongo ti mua na mbunda ti lo, lo toto kuâ ti molenge ti lo lâ mingi. Amolenge ti lo kue ti koli, na amolenge ti lo kue ti wali, ala londo ti wa lo si bê ti lo aga nzoni; me lo ke wango so, lo tene, Fade mbi toto juska mbi zu na molenge ti mbi na ndo-ti-awakinda [wala, dû ti kuâ].” Angu mingi na pekoni, Jacob angbâ ti toto molenge ti lo, so lo bâ lo tene lo kui awe (Genèse 37:34, 35; 42:36-38). Mbeni tapande ni so Bible asara tënë na ndo ni ayeke ti Naomi, mbeni wali so ayeke be-ta-zo, so amolenge ti lo ti koli use akui. Teti so vundu asara lo mingi, lo ye ti changé iri ti lo so ayeke Naomi, so aye ti tene “Ye so anzere na mbi” si aga Mara, so aye ti tene “Vundu.”​—Ruth 1:3-5, 20, 21.

Ye oko, Bible afa gi pëpe so ababâ na mama so amolenge ti ala akui ayeke wara kota vundu so ayeke kaï hio pëpe. A fa nga tongana nyen Jéhovah ayeke mû ngangu na azo so ayeke na yâ ti kota vundu. Na yâ ti article ti peko, e yeke bâ ande ambeni lege so Nzapa ayeke dë bê ti azo so ayeke toto mbeni zo ti ala so akui.

[Kete tënë na gbe ni]