Lege ti kpe agbanda ti zo ti gbungo andeke

“Fade [Jéhovah azi] mo na gbanda ti zo ti gbungo andeke.”​—PSAUME 91:3, MN.

1. “Zo ti gbungo andeke” ayeke zo wa? Ngbanga ti nyen lo yeke sioni mingi?

ATÂ Chrétien kue ayeke na gbele mbeni sioni zo so ayeke gi ti sara sioni na ala. Hingango ndo ti zo ni so nga na mayele ti lo ahon ti asenge zo. Psaume 91:3 (MN ) asara tënë ti lo tongana “zo ti gbungo andeke”. Wato so ayeke zo wa? Ngbene ye na yâ ti Tour ti Ba Ndo ti lango 1 ti juin 1883, a fa so zo ni so ayeke Satan Zabolo. Kpengba wato so ayeke gi na mayele ti handa awakua ti Jéhovah na ti gbu ala na yâ ti gbanda tongana ti so mbeni zo ti gbungo andeke ayeke sara.

2. Ngbanga ti nyen a haka Satan na mbeni zo ti gbungo andeke?

² Giriri, a yeke gbu andeke ndali ti pendere totongo ti ala, ndali ti pendere ti kuä ti tere ti ala. A yeke gbu ala ti te ala nga ti mû ala na sandaga. Ye oko, andeke ayeke sara ka ye na hange mingi, ala yeke bâ ka ye ti sioni hio na a yeke ngangu ti tene a gbu ala. Ni la, na ngoi so a sû na Bible, mbeni zo ti gbungo andeke ayeke gi kozoni kue ti hinga nzoni asarango ye ti tere ti mara ti ndeke so lo ye ti gbu ni. Lo yeke gi ti hinga nga ye so ala yeke sara lakue. Na pekoni, lo yeke leke aye ti mayele ti gbu na ala. Bible ahaka Satan na mbeni zo ti gbungo andeke ti mû maboko na e ti hinga akode ti lo nzoni. Zabolo ayeke gi ti hinga ye na ndo ti e oko oko kue. Lo yeke bâ asarango ye ti tere ti e, aye so e yeke sara lakue, na lo yeke zia agbanda na kode ti gbu e tâ na lê ti e (2 Timothée 2:26). Ti tene Zabolo agbu e na yâ ti gbanda ti lo aye ti tene so songo ti e na Nzapa abuba awe, na ye so alingbi ti sara si a futi e na nda ni. Ni la, ti tene e bata tere ti e, a yeke nzoni e hinga akode nde nde so “zo ti gbungo andeke” so ayeke sara na kua.

3, 4. Tongana nyen akode ti Satan ayeke tongana ti mbeni bamara nga na ti mbeni sioni ngbo?

³ Wasungo psaume ahaka nga pendere mingi akode ti Satan na ti mbeni kpengba bamara wala ti mbeni sioni ngbo (Psaume 91:13). Legeoko tongana mbeni bamara, ngoi na ngoi Satan ayeke ga polele ti sara sioni na awakua ti Jéhovah. Lo yeke sara ni na lege ti aye ti ngangu so a yeke sara na awakua ti Jéhovah nga na lege ti andia so angorogbia ayeke sigigi na ni na tere ti ala (Psaume 94:20). Mara ti aye tongaso, so ayeke tongana ti bamara, alingbi ti sara si ambeni wakua ti Jéhovah atï. Ye oko, mingi ni, ahon ti tene mara ti aye tongaso asara sioni na awakua ti Jéhovah, ayeke sara si ala duti beoko. Me Satan ayeke gi nga na mayele mingi ti sara sioni na e tongana mbeni sioni ngbo. Lo yeke sara ni tongana nyen?

⁴ Zabolo ayeke mû hingango ndo ti lo so ahon ti asenge zo ti handa na azo na ti sara sioni na ala legeoko tongana ti so mbeni sioni ngbo so ahonde tere ti lo ayeke sara. Na sarango tongaso, lo wara lege ti buba mongoli ti ambeni wakua ti Jéhovah, ti handa ala ti sara ye so bê ti lo aye ahon ti sara ye so bê ti Jéhovah aye. Ye ti pekoni ayeke sioni mingi. Ye ti nzoni ni ayeke so, e hinga ye so Satan aye (2 aCorinthien 2:11). Zia e bâ fadeso asioni gbanda osio so “zo ti gbungo andeke” ayeke sara na kua.

Mbeto ti lê ti zo

5. Ngbanga ti nyen “kpengo mbeto ti zo” ayeke mbeni gbanda so ayeke sara kua nzoni mingi?

⁵ Azo aye ti tene amba ti ala ayeda na ala. Ye so ayeke na lege ni, na “zo ti gbungo andeke” ahinga ni nzoni. A-Chrétien ahinga so abibe nga na atënë so agbu bê ti azo so ayeke nduru na ala ayeke sara ye na ndo ti ala. Teti so Zabolo ahinga so aChrétien ayeke gi bê ti ala na ndo ti ye so azo ayeke pensé na ndo ti ala, lo yeke sara kusala na ye so ti wara nzoni dä. Na tapande, lo sara kua na gbanda so ayeke “kpengo mbeto ti zo” ti gbu ambeni wakua ti Jéhovah (aProverbe 29:25). Tongana mbeto ti lê ti azo asara awakua ti Jéhovah si ala mû peko ti ala ti sara ye so Jéhovah ake wala ala ke ti sara ye so Bible ahunda na ala ti sara, andâ ala tï awe na yâ ti gbanda ti “zo ti gbungo andeke”.​—Ezéchiel 33:8; Jacques 4:17.

6. Tapande wa afa kode so “zo ti gbungo andeke” alingbi ti gbu na mbeni maseka?

⁶ Bâ tapande so. Mbeni maseka awoko na gbe ti ngangu so akamarade ti lo ti ekole ayeke sara na ndo ti lo, na lo yeda ti nyon manga. Na ngoi so lo londo lani na lango ni so na da ti gue na ekole, tënë ti nyongo manga aga peut-être kete pëpe na li ti lo. Ye oko, gi hio tongaso lo yeke sara mbeni ye so alingbi ti sara sioni na seni ti lo nga so anzere na Nzapa pëpe (2 aCorinthien 7:1). Nyen la apusu lo ti sara ye so? Peut-être lo wara asioni kamarade na lo sara mbeto ti tene ala ke lo. Amaseka, ala zia pëpe si “zo ti gbungo andeke” ahanda ala na agbu ala! Ti tene lo gbu ala pëpe tâ na lê ti ala, zia ala kpe ti bere mabe ti ala même na yâ ti akete kete ye. Zia ala bata wango ti Bible so ahunda ti kpe asioni kamarade.​—1 aCorinthien 15:33.

7. Na lege wa Satan alingbi ti sara si ababâ na amama abi bê mingi pëpe na aye ti yingo?

⁷ Ababâ na amama so ayeke aChrétien ayeke bâ na nene ni mingi kungba so Mbeti ti Nzapa amû na ala ti mû aye ti mitele na sewa ti ala (1 Timothée 5:8). Ye oko, ye so Satan ayeke gi ayeke ti sara si aChrétien asara ye tâ na lege ni pëpe na ndo ti tënë so. Peut-être ala yeke manke ka bungbi ndali ti so ala woko na gbe ti ngangu so apatron ti ala ayeke sara na ndo ti ala ti sara kua ahon ngbonga so a hunda. Ala lingbi peut-être ti sara mbeto ti hunda ngoi ti wungo tere si ala gue na abungbi kue ti kota bungbi ti district ti voro Jéhovah na tere ti aita ti ala. Ti ‘zia bê kue na Jéhovah’ ayeke mû maboko na ala ti kpe gbanda so (aProverbe 3:5, 6). Nga, tongana e dabe ti e so e kue e yeke voro Jéhovah na so lo mû tere ti lo ti bâ lege ti e nzoni, ye so ayeke mû maboko na e ti ngbâ ti sara ye tâ na lege ni. Ababâ na amama, ala mä na bê so na yâ ti aye kue Jéhovah ayeke bâ ande lege ti ala nga na ti sewa ti ala nzoni tongana ala sara ye so bê ti lo aye? Wala, Zabolo ayeke gbu ande ala tâ na lê ti ala na lo yeke ga na ala ti sara ye so bê ti lo aye ndali ti so ala sara mbeto ti lê ti azo? E wa ala ti gbu li nzoni na ndo ti ahundango tënë so na ti sambela ndali ni.

Gingo mosoro ayeke mbeni gbanda

8. Na lege wa Satan ayeke sara kua na gingo mosoro ti handa na azo?

⁸ Gingo mosoro ayeke nga mbeni gbanda so Satan ayeke sara na kua ti gbu na e. Azo ti dengo buze ti sese so ayeke wa azo ti leke aye nde nde ti mû lege na ala ti ga azo ti mosoro hio. Ye so alingbi même ti handa ambeni wakua ti Jéhovah. Ngoi na ngoi, e yeke mä ambeni zo ayeke tene: “Sara kua ngangu. Tongana mo wara mbeni nzoni ndo awe, mo lingbi ti wu pupu na ti wara ngia na yâ ti gigi ti mo. Mo lingbi même ti mû kua ti pionnier.” So ayeke atënë so ayeke na lege ni pëpe, so ambeni zo so aye ti wara go na ndo ti nginza ti aita ti ala na yâ ti kongregation ayeke tene. Gbu li nzoni na ndo ti mara ti atënë tongaso. Ye so afa pëpe oko bibe ti koli ti mosoro so Jésus atene na yâ ti parabole atene lo sara ye na lege ti “buba”?​—Luc 12:16-21.

9. Ngbanga ti nyen ambeni Chrétien alingbi ti tï na yâ ti gbanda ndali ti so ala sara nzara ti aye?

⁹ Satan ayeke sara kusala na aye ti sese ti lo na mbeni lege so ayeke pusu azo ti sara nzara ti aye. Mara ti nzara ti ye tongaso alingbi na nda ni ti buba fini ti mbeni Chrétien na ti kanga ndo ti tënë ni si “a lë pëpe.” (Marc 4:19). Bible awa e ti gi ti wara kobe na bongo, na ye so alingbi (1 Timothée 6:8). Me azo mingi atï na yâ ti gbanda ti “zo ti gbungo andeke” ndali ti so ala sara ye alingbi na wango so pëpe. Peut-être baba asara si ala bâ so a lingbi ala bata dutingo ti ala si akiri na gbe ni pëpe? Ka ti e wani ayeke tongana nyen? Nzara so e yeke na ni ti wara aye ayeke sara si e zia aye so andu tâ vorongo na peko? (Aggée 1:2-8). Mawa ni ayeke so, na ngoi ti kpale ti nginza, ambeni zo adö aye ti yingo azia ti bata mbeni dutingo so anzere na ala awe. Mara ti nzara ti mosoro tongaso ayeke nzere na bê ti “zo ti gbungo andeke”!

Asioni sarango ngia ayeke mbeni gbanda

10. A yeke nzoni Chrétien oko oko abâ tere ti lo wani na ndo ti nyen?

¹⁰ Mbeni kode ti “zo ti gbungo andeke” ayeke ti buba ngangu so azo ayeke na ni ti hinga ye so ayeke nzoni na ye so ayeke sioni. Mara ti bibe so a wara ni lani na gbata ti Sodome na ti Gomorrhe ayeke sara fadeso ngangu na ndo ti azo so ayeke bâ lege ti asarango ngia. Même asango so a yeke fa na télé nga na yâ ti ambeti-sango a yeke sara tënë mingi na ndo ti sarango ngangu nga a yeke fa lango-sioni a hon ndo ni. Mingi ti angia so ayeke sigigi ayeke buba ngangu ti azo ti “hinga nzoni na sioni.” (aHébreu 5:14). Ye oko, dabe ti mo na atënë ti Jéhovah so lo tene na lege ti prophète Esaïe, lo tene: “Vundu aga na azo so adi iri ti sioye nzoye, na a di iri ti nzoye sioye.” (Esaïe 5:20). Na kode, “zo ti gbungo andeke” abuba yâ ti li ti mo awe na lege ti mara ti asioni sarango ngia tongaso? A lingbi mo bâ tere ti mo wani.​—2 aCorinthien 13:5.

11. Wango wa Tour ti Ba Ndo amû na ndo ti ambeni limon ti télé?

¹¹ A sara nduru na ngu 25 awe so, na ndoye, Tour ti Ba Ndo agboto mê ti awakua ti Jéhovah na ndo ti alimon so a yeke fa ambage ni oko na oko na télé.a A mû wango na ndo ngangu so mara ti alimon tongaso ayeke sara na kode na ndo ti azo. A tene: “Azo aye ti wara mbeni zo so aye ala, na ala pensé so ye so amû lege na ala ti sara ye kue so ala ye ti sara. Na tapande, mbeni maseka-wali so ade kumbamba na so amû ngo atene na mbeni kamarade ti lo, lo tene: ‘Me mbi ye Victor mingi. Ye ti songo mbi ayeke dä pëpe. . . . Ti dü molenge na lo ayeke kota ye mingi na lê ti mbi!’ Mozoko so ayeke toto yeke na gbe ni asara si a yeke ngangu na zo ti bâ sarango ye ti maseka-wali so tongana mbeni sioni sarango ye. Zo so ayeke bâ limon ni aye nga Victor mingi. Mawa ti maseka-wali ni asara lo. Lo yeda na sioni sarango ye ti lo ni. Mbeni ngbene zo ti bango limon so atene so ‘a yeke ye ti dongo bê ti bâ so a yeke ngangu pëpe ti tene zo atene so bango ndo ti molenge-wali so ayeke sioni pëpe. E hinga so lango-sioni ayeke ye ti sioni. . . . Me na nda ni mbi ga ti bâ so na yâ ti li mbi, mbi yeda na ni.’ ”

12. Aye wa afa so wango so a mû na ndo ti ambeni limon ti télé alingbi biani na ngoi ti e?

¹² Ngbene na ngoi so a sigigi na a-article so, mara ti alimon tongaso, so ayeke buba yâ ti li ti zo, akiri awu mingi ahon ti kozo. Na ando mingi, a yeke fa ni na yâ ti lango ni kue. Akoli, awali nga na amaseka mingi ayeke zia si aye tongaso alï lakue na yâ ti li ti ala nga na yâ ti bê ti ala. Me zia e handa tere ti e pëpe na atënë so gere ni aluti nzoni pëpe. A yeke na lege ni pëpe ti tene so asioni sarango ngia ayeke sioni pëpe ahon atâ ye so ayeke si na azo. Mbeni Chrétien alingbi biani ti soro ti sara ngia na mara ti ambeni zo so lâ oko lo pensé pëpe ti tisa ala na da ti lo, na ti tene so a yeke sioni pëpe?

13, 14. Na lege wa ambeni zo afa tongana nyen ala wara nzoni ndali ti awango so a mû na ndo ti télé?

¹³ Azo mingi awara ye ti nzoni tongana ala bata wango so “ngbâa be-ta-zo na ti ndara” amû (Matthieu 24:45-47, MN ). Ambeni zo adiko awango so aluti na ndo ti Mbeti ti Nzapa na so angoro tënë pëpe. Na pekoni, ala tokua mbeti na azo so asigigi na a-article so ti fa tongana nyen a-article ni andu ala.b Mbeni oko ti ala atene: “Mbi yeke lani ngbâa ti alimon so teti ngu 13. Mbi bâ ti mbi lani mbi tene so guengo na abungbi ti kongregation nga na fango tënë ngoi na ngoi alingbi mbi awe. Alimon so ayeke fa bibe ti sese so atene tongana koli ti mo asara mo nzoni pëpe wala mo bâ so lo ye mo pëpe, a yeke na lege ni ti gi mbeni koli nde. Faute ni ayeke ti koli ni. Mbi yeda na bibe so. Ni la, tongana mbi bâ so mbi yeke ‘sara sioni pëpe’, ye so asara si mbi gi mbeni koli nde, na tongaso mbi sara siokpari na tere ti Jéhovah nga na tere ti koli ti mbi.” A bi wali so lani na gigi. Me na nda ni li ti lo akiri dä, lo changé bê ti lo na a kiri na lo na bungbi. Awango na ndo ti ambeni limon ti télé amû lani na lo ngangu ti ke asarango ngia so Jéhovah ake.​—Amos 5:14, 15.

¹⁴ Mbeni zo ni nde, so ye ni ayengi lo mingi, atene: “Tongana mbi diko a-article so, mbi toto ndali ti so mbi bâ so bê ti mbi ayeke kue mbeni pëpe na mbage ti Jéhovah. Mbi tene na Nzapa ti mbi so mbi yeke duti ngbâa ti alimon so mbeni pëpe.” Na pekoni so mbeni ita-wali afa singila ti bê ti lo ndali ti a-article so, lo yeda so lo yeke lani ngbâa ti alimon so na lo tene: “Mbi yeke hunda lani tere ti mbi mbi tene . . . wala songo ti mbi na Jéhovah alingbi ti buba. Mbi lingbi ti duti kamarade ti ‘mara ti azo tongaso’ nga ti duti na kpengba songo na Jéhovah na oko ngoi ni tongana nyen?” Tongana mara ti alimon ti télé tongaso asara sioni na bê ti azo ngbene ye ngu 25 awe, ka ti laso ayeke tongana nyen? (2 Timothée 3:13). A lingbi e hinga gbanda ti Satan so ayeke amara ti asioni sarango ngia nde nde kue, atâa a yeke alimon ti télé, angia ti vidéo so afa sarango ngangu wala alimon so afa abia ti lango-sioni.

Akpale so ayeke na popo ti azo ayeke mbeni gbanda

15. Zabolo agbu ambeni zo tâ na lê ti ala tongana nyen?

¹⁵ Satan ayeke sara kusala na akpale so ayeke na popo ti azo tongana gbanda ti zia kangbi na popo ti azo ti Jéhovah. Gbanda so alingbi ti gbu e atâa kusala wa e yeke na ni na yâ ti bungbi. Zabolo agbu ambeni zo tâ na lê ti ala. A yeke tongaso ndali ti so ala zia akpale so ayeke na popo ti azo abuba yâ ti siriri, ti dutingo beoko nga ti pendere paradis ti yingo so Jéhovah aleke.​—Psaume 133:1-3.

16. Na lege wa Satan ayeke tara na mayele ti buba yâ ti dutingo beoko ti e?

¹⁶ Na ngoi ti Kozo Bira so Amû Sese Kue, Satan atara lani ti futi mbage ti bungbi ti Jéhovah so ayeke na sese ge na lege so lo ga polele ti sara sioni na awakua ti Jéhovah. Me lo bi na ngu (Apocalypse 11:7-13). Ngbene ye na ngoi ni so, lo yeke sara kusala na mayele ti buba yâ ti dutingo be-oko ti e. Tongana e zia si akpale so ayeke na popo ti azo aga na kangbi na popo ti e, andâ e yeke zi lege na “zo ti gbungo andeke”. E lingbi ti kanga lege na yingo vulu ti sara kua nzoni na yâ ti fini ti e nga na yâ ti kongregation. Tongana ye tongaso asi, a yeke nzere na Satan ndali ti so tongana siriri na beoko ayeke na yâ ti kongregation pëpe, kusala ti fango tënë ayeke tambela nzoni pëpe.​—aEphésien 4:27, 30-32.

17. Ye wa alingbi ti mû maboko na azo so ayeke na kpale na popo ti ala ti leke ni?

¹⁷ Tongana akpale ayeke na popo ti mo na mbeni ita, mo lingbi ti sara nyen? Ti tâ tënë ni, kpale oko oko ayeke nde nde. Anda ti tënë ayeke mingi so asara si akpale alingbi ti duti na popo ti azo, me nda ti tënë oko ayeke dä pëpe ti tene akpale ni angbâ gi tongaso (Matthieu 5:23, 24; 18:15-17). Wango ti Bible alondo na Nzapa na ayeke mbilimbili-kue. Akpengba-ndia ti Bible ayeke tï lâ oko pëpe na ngu tongana zo asara ye alingbi na ni. Aye ti nzoni ayeke ga lakue na pekoni!

18. Ngbanga ti nyen ti sara ye tongana ti Jéhovah ayeke mû maboko na e ti leke akpale na popo ti e?

¹⁸ Jéhovah ayeke nduru ti “pardone,” na lo yeke mû tâ “pardon”. (Psaume 86:5; 130:4). E fa so e yeke amolenge ti Jéhovah so lo ye ala tongana e sara ye tongana lo (aEphésien 5:1). E kue e yeke awasiokpari na e yeke na kota bezoin ti pardon ti Jéhovah. Ni la, tongana e bâ so e yeke nduru pëpe ti pardone mbeni zo, zia e sara hange. E lingbi ti ga tongana ngbâa ti yâ ti parabole ti Jésus. Ngbâa so ake ti pardone mba ti lo ngbâa so bon ti lo ayeke na li ti lo. Bon so ayeke gi kete mbage ti bon ti Wa ti ala so lo zi ni na li ti kozo ngbâa ni. Tongana tënë so atï na mê ti Wa ti ala, lo mû yanga ti tene a bi ngbâa so aye ti pardone mba ti lo pëpe so na da ti kanga. Jésus ahunzi parabole ti lo na tënë so: “Fade Babâ ti Mbi na yayu asara tongaso na i nga, tongana i oko oko kue i pardone aita ti i na bê ti i pëpe.” (Matthieu 18:21-35). Ti gbu li na ndo ti parabole so nga na ndo ti lege so fani mingi Jéhovah apardone e na bê ti lo kue, ayeke mû ande biani maboko na e na ngoi so e yeke leke akpale so ayeke na popo ti e na ita ti e.​—Psaume 19:15.

Bata tere ti mo na “ndo ti lingo ti Lo Ti Nduzu Ahon Kue”

19, 20. Na ngoi ti sioni so e yeke dä, a yeke nzoni e bâ “ndo ti lingo” nga na “gbede” ti Jéhovah tongana nyen?

¹⁹ Ngoi so e yeke dä ayeke sioni mingi. Tongana Jéhovah ayeke bata e fade pëpe na ndoye, ka Satan afuti e kue awe. Ni la, ti tï pëpe na yâ ti gbanda ti “zo ti gbungo andeke”, a lingbi e duti na ndo so ayeke tongana ndo ti batango tere, “ndo ti lingo ti Lo Ti Nduzu Ahon Kue,” so ayeke sara si e “duti na gbede ti Lo Ti Ngangu Ahon Kue.”​—Psaume 91:1.

²⁰ Zia e bâ lakue adango bê ti Jéhovah nga na lege so lo yeke fa na e tongana mbeni ye so ayeke bata e, me pëpe tongana mbeni ye so ayeke kanga lege na e. E kue e yeke na gbele mbeni sioni zo so ayeke gi ti sara sioni na e, so hingango ndo ti lo ahon ti asenge zo. Jéhovah ayeke mû maboko na e na ndoye. Tongana lo sara ni fade pëpe, ka zo oko ti kpe gbanda ti zo ti sioni so ayeke dä pëpe (Psaume 124:7, 8). Tongaso, zia e sambela Jéhovah ti zi e na yâ ti agbanda ti “zo ti gbungo andeke”!​—Matthieu 6:13.

[Akete tënë na gbe ni]

Mo dabe ti mo na ni?

• Ngbanga ti nyen “kpengo mbeto ti zo” ayeke mbeni sioni gbanda?

• Tongana nyen Zabolo ayeke handa zo na nzara ti mosoro?

• Na lege wa Satan agbu ambeni zo na yâ ti gbanda ti asioni sarango ngia?

• Gbanda wa Zabolo ayeke sara na kua ti buba yâ ti beoko ti e?

[Foto na lembeti 29]

“Kpengo mbeto ti zo” agbu ambeni zo tongana gbanda

[Foto na lembeti 30]

Mo ye angia so Jéhovah ake?

[Foto na lembeti 31]

Tongana mo yeke na kpale na mbeni ita, mo lingbi ti sara nyen?