E duti azo so ayeke bâ mawa ti amba ti ala

LASO, nzara, kobela, nzinga, sarango aye ti sioni na azo, tiri na popo ti azo ti oko kodoro nga na aye tongana kota pupu na ngu ayeke sara sioni mingi na azo. Aye so kue asara si azo ayeke tâ na bezoin ti tene a bâ mawa ti ala mingi ahon ti kozo. Ti bâ mawa ti mbeni zo aye ti tene ti hinga pasi so lo yeke bâ wala ti hinga ye ti vundu so lo yeke na yâ ni nga ti duti na nzara ti sara mbeni ye ti mû maboko na lo. Legeoko tongana ti so mbeni dede ngu ayeke sara si bê ti zo adë na ngoi so lâ asu mingi, bango mawa ti zo alingbi ti sara si bê ti lo adë, alingbi ti zi vundu ti lo nga alingbi ti sara si zo so ayeke na yâ ti aye ti vundu ayapu.

E lingbi ti fa so e bâ mawa ti azo na lege ti aye so e yeke sara nga na lege ti atënë ti yanga ti e, so ti tene e yeke bâ lege ti azo nga e yeke duti dä na ngoi so ala yeke na bezoin ti e. A yeke nzoni ti tene e bâ gi pëpe mawa ti azo ti sewa ti e, ti akamarade ti e nga na ti azo so e hinga ala. E lingbi même ti gi ti bâ mawa ti azo so e hinga ala pëpe. Na ngoi so Jésus ayeke fa ye na ndo ti hoto, lo hunda tënë lo tene: “Tongana i ndoye ala so andoye i, i wara futa ti nyen?” Jésus so ayeke bâ mawa ti azo akiri atene: “Ye kue so i ye azo asara na i, i sara na ala tongaso nga.”​—Matthieu 5:46, 47; 7:12.

A yeke wara atënë so na yâ ti Mbeti ti Nzapa. Azo mingi ayeda so Bible ayeke kozo mbeti so ayeke fa na azo ti bâ mawa ti amba ti ala ahon tanga ti ambeti kue. Fani mingi, Bible afa so a lingbi e mû maboko na azo so, ndali ti mbeni nda ti tënë, ala lingbi pëpe ti bâ lege ti ala wani. Bible afa Wa ti Bible nga na Wasarango e, Jéhovah Nzapa, tongana tâ kota tapande ti zo so ayeke nduru mingi ti bâ mawa ti azo.

Na tapande, Bible atene: “[Nzapa afâ] ngbanga mbilimbili teti amolenge so babâ ti ala ayeke pëpe, na teti awomua; Lo ndoye awande na Lo mû kobe na bongo na ala.” (Deutéronome 10:18). A fa Jéhovah Nzapa tongana zo so ‘afâ ngbanga mbilimbili teti ala so azo asara ngangu na ala; Lo mû kobe na azo so ayeke na nzara ti kobe.’ (Psaume 146:7). Jéhovah amû yanga ndali ti awande so ye atia ala na so aga ti sara kodoro na Israël, lo tene: “A lingbi wande . . . aga tongana molenge ti kodoro na lê ti i, na mo ndoye lo tongana mo ndoye mo mveni.”​—Lévitique 19:34.

Ye oko, bango mawa ti zo ayeke pëpe mbeni ye so zo ayeke sara ni gi hio tongaso. Bazengele Paul asû mbeti na aChrétien ti Colosses lo tene: “I lungula zo-ti-giriri na kusala ti lo awe, na i yü zo-ti-fini so akiri aga fini na lege ti image ti Lo so acréé lo . . . teti i yeke azo so Nzapa airi i na gigi, azo ti be-vulu, na azo so Nzapa andoye i mingi, i yü be-ti-ndoye,” wala i bâ mawa ti zo.​—aColossien 3:9, 10, 12.

Ni la, a hunda ti tene zo asara ngangu si lo bâ mawa ti azo. Bango mawa ti zo ayeke mbeni sarango ye so a ku na mbage ti aChrétien so ayü “zo-ti-fini”. Paul aduti lani na Rome, so azo ni ayeke sara ye ti ngangu mingi na amba ti ala. Lo wa amba ti lo aChrétien ti changé mingi ti asarango ye ti ala si ala ga azo so ayeke bâ mawa ti azo ahon ti kozo.

Bango mawa ti zo ayeke ga na aye ti nzoni

Ambeni zo ayeke bâ azo so ayeke bâ ka mawa ti azo tongana awokongo zo. Mara ti bango ndo tongaso ayeke na lege ni?

Ên-ën! Tâ ye so ayeke pusu zo ti bâ mawa ti azo ayeke ndoye so alondo na gbe ti bê ti zo. Mara ti ndoye tongaso alondo na Nzapa, lo so ayeke kota tapande ti ndoye. ‘Nzapa ayeke Ndoye.’ (1 Jean 4:16). A yeke tâ na lege ni so a iri Jéhovah “Babâ ti be-nzoni, na Nzapa ti lungula vundu kue.” (2 aCorinthien 1:3). Tënë “be-nzoni” aye ti tene “ti bâ mawa ti zo ndali ti aye ti ngangu so asi na lo.” Biani, Jéhovah ayeke “sara be-nzoni na azo so amû merci pëpe, na azo ti sioni.”​—Luc 6:35.

Wasarango e ahunda nga na e ti fa so e yeke na anzoni sarango ye tongana bango mawa ti zo. Michée 6:8 atene: “Mo zo! L’Eternel afa na mo awe ye so ayeke nzoni; Lo hunda ye nyen na tïtî mo?​—ti sara mbilimbili, ti ndoye nzobe.” A-Proverbe 19:22 atene: “A yeke nzobe ti zo so asara si azo aye lo.” Jésus Christ so ayeke Molenge ti Nzapa asara ye tâ gi tongana ti Babâ ti lo, na lo wa adisciple ti lo, lo tene: “I sara be-nzoni legeoko tongana Babâ ti i asara be-nzoni.” (Luc 6:36). Bible de Jérusalem akiri peko ti versê so atene: “Ala bâ mawa ti azo tongana ti so Babâ ti ala ayeke bâ mawa ti azo.”

A yeke nzoni e bâ mawa ti zo ndali ti so a yeke ga na aye ti nzoni mingi. Fani mingi, e yeke bâ tâ tënë ti versê ti aProverbe 11:17 so atene: “Zo so asara nzobe asara nzoni na âme ti lo mveni.” Tongana e bâ mawa ti mbeni zo so ye atia lo, Nzapa ayeke bâ ni tongana ti so e sara nzoni na lo. Jéhovah abâ so a yeke na lo ti futa azo so ayeke voro lo ndali ti so ala bâ mawa ti azo. Na gbe ti yingo ti Nzapa, Gbia Salomon atene: “Zo so asara be-nzoni na awanzinga, lo mû ye na L’Eternel ti perdé [wala, ‘lo mû bon na Jéhovah’, MN ], na fade L’Eternel afuta lo teti nzo kusala ti lo.” (aProverbe 19:17). Nga, Paul atene: “I hinga ye ti nzoni so azo oko oko kue asara, fade ala kiri ala wara ye so na tïtî Seigneur.”​—aEphésien 6:8.

Bango mawa ti zo alingbi ti sara si azo aduti na siriri na popo ti ala. A lingbi nga ti sara si azo aleke akpale so ayeke londo na popo ti ala. A yeke mû maboko na azo ti kiri ti mä tere na popo ti ala, nga a yeke pusu azo ti pardone amba ti ala. A lingbi ti si so e na ambeni zo e mä tere pëpe ndali ti so e yeke fa polele pëpe pensé ti e wala atënë ti bê ti e tongana ti so e ye fade ti sara; wala a lingbi ti si so azo abâ aye so e sara na mbeni lege nde. Ge, a hunda ti bâ mawa ti zo nga ti bata siriri. A yeke ngangu pëpe ti pardone mbeni zo so a hinga lo tongana zo ti bango mawa ti zo. Bango mawa ti azo ayeke mû maboko na e ti sara ye ague oko na wango so Paul amû na aChrétien, lo tene: “I zingo na ambeni zo na popo ti i fade pëpe, na tongana mbeni zo ayeke na tënë na popo ti lo na ita ti lo, i pardone ye na popo ti i.”​—aColossien 3:13.

Alege ti fa so e bâ mawa ti azo

Na ndo ni, bango mawa ti azo alingbi ti zi vundu na bê ti ala. Tongana ti so e bâ, bango mawa ti zo afa so bê ti e ayeke na vundu ndali ti pasi so azo ayeke na yâ ni nga ayeke pusu e ti bâ pasi legeoko na ala. Bango mawa ti zo andu bingo bê mingi na azo so ayeke bâ pasi nga ayeke pusu e ti sara mbeni ye ti mû maboko na mara ti azo tongaso.

Na bango mawa ti zo, aChrétien ayeke mû tapande ti Jésus. Jésus ayeke mû ngoi lani lakue ti mû maboko na azo na lege ti mitele nga na lege ti yingo. Tongana lo bâ so ye atia azo, lo yeke mû maboko na azo ni ndali ti so lo bâ mawa ti ala.

Bâ tongana nyen Jésus asara ye na ngoi so lo bâ azo mingi mingi so a yeke bi bê na ala pëpe na lege ti yingo. Bible atene: “Tongana Lo bâ azo mingi so, Lo ye ti sara be-nzoni na ala, teti ye nde nde agi ala, na ala kangbi kirikiri tongana angasangbaga so ayeke na berger pëpe.” (Matthieu 9:36). Mbeni koli so agi nda ti ye na ndo ti Bible atene so tënë “ye ti sara be-nzoni” asara tënë ti “mbeni ye so andu mbeni zo ngangu mingi.” Lo kiri lo tene: “A yeke tënë so ayeke tâ ngangu mingi ahon atënë kue ti yanga ti Grec so afa so zo asara mawa ti zo.”

Legeoko nga, aChrétien so ayeke bâ mawa ti azo ayeke mû maboko hio na azo na lege ti mitele nga na lege ti yingo. Bazengele Pierre atene: “I bi bê ti i na tënë oko, i sara be-nzoni na popo ti i, i ndoye tere ti i tongana aita, i duti na be-ti-ndoye.” (1 Pierre 3:8). Na tapande, na ngoi so mbeni sewa so azo ni ayeke aTémoin ti Jéhovah ague na mbeni ndo ndali ti kpale ti seni, amba ti ala so ayeke na ndo ni amû na ala da so azo ayeke loué ka ni ti tene ala lango dä teti nze omene sân ti futa ni. Koli ni atene: “Lâ oko oko, aita so amû na e da ti lango ayeke ga abâ e, na ala yeke tene na e atënë so asara si e bâ so e yeke na ndo ti e.”

Atâ Chrétien ayeke bi bê nga na ye so atia azo so ala hinga ala pëpe. Ala yeke na ngia ti mû ngoi ti ala, ngangu ti ala nga na aye so ala yeke na ni ti mû maboko na azo so ala hinga ala pëpe. Azo so aga na bê ti ala wani ti mû maboko na azo so ala hinga ala pëpe, so e sara tënë ti ala na yâ ti article so ahon, ayeke aTémoin ti Jéhovah.

Na yâ ti kongregation ti aChrétien, a yeke bâ so azo ayeke bâ mawa ti amba ti ala nga ayeke sara nzoni bê na ala. Teti so ndoye apusu ala, azo ti yâ ti kongregation ayeke nduru ti bâ alege so ala lingbi ti mû maboko na amba ti ala. Anyindu nga na awomua so ayeke na yâ ti kongregation ayeke peut-être na bezoin ti tene mo bi bê na ala nga mo bâ mawa ti ala ndali ti akpale nde nde so ala yeke wara. Mo lingbi ti mû maboko na mara ti azo tongaso na yâ ti yere so ala yeke dä? Mo lingbi ti mû maboko na ala ti bâ lege ti seni ti ala, ti wara da ti lango so alingbi wala ti hon ndo ti ambeni kpale?

A yeke ye so asi na mbeni koli na wali ti lo na kodoro ti Grèce. Kobela ti tension abi koli ni. A gue na koli ni na wali ti lo na da-nganga so ayo mingi na da ti ala. Ye oko, ala yeke wara kete pata gi na lege ti akeke ti orange ti ala so ala yeke kä a-orange ni. Teti so ala ngbâ na da-nganga, zo wa la alingbi ti sara ni na peko ti ala? Aita ti kongregation ti ndo so ala lango dä kozo asara mbeni ye. Aita ni akö a-orange ni na ala kä ni, ye so asara si koli na wali so awara pata so ala yeke na bezoin ni. Na a sara nga si ala gi bê ti ala pëpe.

Alege ayeke mingi ti tene zo afa so lo bâ mawa ti azo. Na tapande, aChrétien so ayeke bâ mawa ti azo abâ so na mbeni ngoi, ye so azo so ayeke na yâ ti vundu ayeke na bezoin ni ayeke ti tene a gue a bâ ala. Ala yeke nga na bezoin ti tene na nzobe, zo amä tënë so ala yeke tene, lo fa so lo bâ mawa ti ala nga lo diko na ala mbeni versê ti dë bê ti ala.​—aRomain 12:15.

Duti na popo ti azo so ayeke bâ mawa ti azo

Kongregation ti aChrétien na ndo ti sese kue ayeke mbeni ndo so azo ayeke duti na siriri dä nga ayeke wara dengo bê dä. A yeke nga mbeni ndo so azo ayeke bâ mawa ti amba ti ala dä na ayeke sara nzoni bê na ala. Atâ Chrétien abâ so bango mawa ti zo ayeke sara si azo aga nduru na ala, me ti tene ala dê dengo na mbage ti azo ayeke sara si azo akpe ala. Ni la, ala yeke tara ti mû tapande ti Babâ ti ala ti yayu na lege so ala yeke sara ngangu ti duti na “be-ti-ndoye,” wala ti bâ mawa ti azo na alege nde nde.

Na yâ ti bungbi ti aTémoin ti Jéhovah, ala yeke bâ mawa ti amba ti ala, ala yeke ndoye amba ti ala nga ala yeke bi bê na amba ti ala. Ni la, ala yeke na ngia ti tisa mo ti ga ti duti na popo ti ala ti bâ aye so. Ala hinga na bê ti ala kue so mo yeke bâ ande so a yamba mo nzoni nga bê ti mo ayeke nzere ande mingi.​—aRomain 15:7.

[Foto na lembeti 5]

Na ngoi so Paul asû mbeti na aChrétien ti Colosses, lo tene na ala ti bâ mawa ti azo

[Afoto na lembeti 7]

Tongana Jésus abâ so ye atia azo, lo mû maboko na ala ndali ti so lo bâ mawa ti ala