E “bâ mawa ti mba mingi”
1. Azo ayeke tâ na kota bezoin ti nyen laso?
1 Lâ oko na yâ ti mbaï azo mingi ade ti duti na yâ ti kota bezoin ti tene a bâ mawa ti ala na ti tene a mû maboko na ala tongana ti laso so pëpe. Ndali ti so aye abuba mingi na yâ ti dunia so, azo na ndo kue ayeke na ngia mbeni pëpe, ala tï na yâ ti kota vundu nga ala yeke na beku mbeni pëpe. Azo kutu mingi ayeke na bezoin ti tene a mû maboko na ala, ni la e aChrétien, a yeke nzoni e fa tâ bingo bê na mbage ti amba ti e (Mat. 22:39; aGal. 6:10). E lingbi ti fa ni tongana nyen?
2. Tâ nzoni lege ti fa so e bâ mawa ti azo ayeke so wa?
2 Kusala so afa so e yeke bâ mawa ti azo dä: Tâ oko ndo so e lingbi ti wara dengo bê ti lakue lakue dä ayeke gi na mbage ti Nzapa (2 aCor. 1:3, 4). Jéhovah awa e mingi ti gi ti sara ye tongana lo, so ti tene ti “bâ mawa ti [amba ti e] mingi”, nga lo hunda na e ti gue na nzoni tënë ti Royaume ti lo na ala (1 Pi. 3:8). Ti bi tere ti e mingi na yâ ti kusala so ayeke tâ nzoni lege ti dë “bê ti azo so afâ awe”, teti so Royaume ti Nzapa ayeke tâ gi oko ye so alingbi ti zi pasi ti azo kue (És. 61:1). So Jéhovah abâ mawa ti azo, lo ga nduru ti londo ti zi aye ti sioni kue na ti zia na sese fini dunia ti lo so mbilimbili ayeke duti dä.—2 Pi. 3:13.
3. E lingbi ti sara nyen ti fa so e bâ azo tongana ti Jésus?
3 E bâ azo tongana ti Jésus: Lani, tongana Jésus ayeke fa ye na gbâ ti azo, lo bâ gi ala gi tongaso pëpe, me lo yeke gi ti bâ bezoin ti zo oko oko na lege ti yingo. Ala yeke tongana angasangbaga so ayeke na berger pëpe ti fa lege na ala. Na bango ala, mawa ti ala agbu Jésus, na ye so apusu lo ti fa ye na ala na kangango bê (Marc 6:34). Tongana e bâ azo tongana ti Jésus, e yeke fa nga tâ bango mawa na mbage ti ala. Lê ti e nga totongo ti go ti e ayeke fa ni polele. Ye so ayeke sara si fango tënë ayeke duti kota ye na lê ti e, nga ayeke sara si e yeke leke atënë ti e ti lingbi na bezoin ti zo so e yeke fa tënë na lo.—1 aCor. 9:19-23.
4. Ngbanga ti nyen a yeke nzoni e yü bango mawa ti zo?
4 Gbâ ti azo ti amara nde nde ayeda na nzoni tënë ti Royaume so e fa na ala, nga teti so e bi bê na ala, a nzere na ala mingi. Tongana e ngbâ lakue ti yü bango mawa ti zo, e yeke mû gonda na Jéhovah, Nzapa ti e so ayeke bâ mawa ti azo, nga e yeke zia ngia na bê ti lo.—aCol. 3:12.