Lege so kuâ ti Jésus alingbi ti sö mo

A SARA ngu 2 000 tongaso awe so na ngoi ti Pâque ti aJuif so ala sara na ngu 33, mbeni koli so tënë ayeke na li ti lo pëpe akui si azo awara fini. Koli so ayeke zo wa? Lo yeke Jésus ti Nazareth. Azo wa la alingbi ti wara ye ti nzoni na peko ti nzoni ye so lo sara? Azo kue. Mbeni versê ti Bible so azo mingi ahinga ni afa na nduru tënë tënë ti sandaga so ayeke sö fini ti azo. Versê ni atene: “Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.”​—Jean 3:16.

Atâa so azo mingi ahinga versê so, gi kete wungo ti azo la ahinga nda ni nzoni. Azo ayeke hunda tere ti ala, ala tene: ‘Ngbanga ti nyen la e yeke na bezoin ti sandaga ti fini ti Christ? Na lege wa kuâ ti zo oko alingbi ti sö fini ti azo si ala kui teti lakue lakue pëpe?’ Bible akiri tënë polele na ahundango tënë so nga zo alingbi ti yeda na akiringo tënë ni.

Lege so kuâ ato nda ti komande na ndo ti azo

Ambeni zo atene ti ala so a créé azo ti duti na fini teti kete ngoi na ndo ti sese, ti wara akpale, ti sara ambeni ye so ayeke mû na ala ngia nga na pekoni ti kui na ti gue na mbeni ndo so ayeke nzoni ahon sese. Azo so abâ ye tongaso abâ so kuâ ayeke mbeni ye so Nzapa aleke ti tene a si na azo. Ye oko, Bible afa so mbeni raison nde la asara si azo ayeke kui. Bible atene: “Siokpari aga na sese so na lege ti zo oko, na kui aga na lege ti siokpari, tongaso kui asi na azo kue, teti azo kue asara siokpari.” (aRomain 5:12). Versê so afa so siokpari la asara si azo ayeke kui. Me, “zo oko” so asara si azo ayeke sara siokpari na ayeke kui ayeke zo wa?

Mbeni bakari atene so mingi ti azo ti senda-ye atene so azo kue abâ gigi na lege ti zo oko, na Bible afa polele “zo oko” ni so. Genèse 1:27 atene: “Nzapa acréé zo na image ti Lo mveni, na image ti Nzapa Lo créé lo; Lo créé ala koli na wali.” Ni la, Bible afa so kozo koli na kozo wali ayeke tanga ti aye so Nzapa ti Ngangu Ahon Kue acréé na ndo ti sese so, na so amû gloire na lo mingi.

Genèse chapitre 1 na 2 afa anzene nzene ye na ndo ti fini ti kozo zo na pekoni so Jéhovah Nzapa acréé lo. Bâ so na yâ ti achapitre use so kue, Nzapa atene na zo so oko ye so ayeke sara si lo kui ayeke kengo yanga (Genèse 2:16, 17). Nzapa aye ti tene azo aduti na yâ ti pendere paradis na ndo ti sese, na ala duti na ngia nga na nzoni seni teti lakue lakue. Lo ye lani pëpe ti tene ala wara akpale so ayeke si na zo na ngoi so lo ga mbakoro nga na nda ni ala kui. Tongaso, na lege wa kuâ ato nda ti komande na ndo ti azo?

Genèse chapitre 3 afa tongana nyen kozo koli na kozo wali ayeda na bê ti ala wani ti ke yanga ti Jéhovah Nzapa so amû fini na ala. Na pekoni, Nzapa asara ye alingbi na tënë so lo tene kozoni awe na ala. Lo tene na koli ni, lo tene: “A kamata mo na sese; na fade mo kiri na pupu-sese.” (Genèse 3:19). Tongaso, kozo koli na kozo wali so ake yanga akui tongana ti so Nzapa atene.

Me, aye ti sioni so aga na peko ti ye so kozo koli na kozo wali asara angbâ gi na ndo ti ala pëpe. Ndali ti so ala ke yanga awe, ala kanga lege na amolenge ti ala ti wara fini ti lakue lakue. Na ngoi so Jéhovah ayeke sara lani tënë so ge na Adam na Eve, tënë so abâ nga amolenge ti ala so ade ala dü ala pëpe. Lo tene: “I dü amolenge mingi, i wu, i si singo na sese, i sara si ye kue aga na gbe gere ti i; i komande asusu ti kota ngu ti ingo, andeke ti nduzu, na ye ti fini kue so atambela na ndo sese.” (Genèse 1:28). A si na mbeni ngoi, azo ayeke mû fade ndo ti sese kue na ala yeke wara ande ngia mingi teti lakue lakue. Me kotara ti ala Adam ayeke “zo oko” so akä ala na gbe ti ngbâa ti siokpari, so ayeke gue na ala na kui. Bazengele Paul so ayeke mbeni zo so aga na lege ti kozo koli so atene: “Mbi yeke ti mitele, a kä mbi na siokpari.”​—aRomain 7:14.

Legeoko tongana ti so ade ti ninga mingi pëpe, azo ti sioni abuba lê ti adessin so ngere ni ayeke ngangu, na sarango siokpari, Adam asara si azo so Nzapa asara ala pendere mingi abuba. Amolenge ti Adam adü amolenge, ala wara atarä ti gue na ni. Azo adü amolenge, amolenge ni akono na adü nga na nda ni ala kui. Ngbanga ti nyen ala kue ayeke kui? Ngbanga ti so ala kue alondo na Adam. Bible atene: “Azo mingi akui ngbanga ti kengo-ndia ti zo oko.” (aRomain 5:15). Kobela, gango mbakoro, dutingo nduru ti sara sioni nga na kui ayeke aye ti vundu so amolenge ti Adam ayeke wara ndali ti so lo kä sewa ti lo na gbe ti siokpari. E kue e yeke na yâ ti sewa ti Adam so.

Na yâ ti lettre so bazengele Paul atokua na aChrétien ti Rome, lo sara tënë ti dutingo ti mawa so azo so ayeke mbilimbili-kue pëpe ayeke na yâ ni. Paul nga ayeke na popo ti azo so. Lo sara nga tënë ti vundu so zo ayeke wara na ngoi so lo yeke tiri na ngangu so siokpari ayeke sara na ndo ti lo. Lo dema tere ti lo, lo tene: “Mbi yeke zo ti vundu mingi! Fade zo nyen alungula mbi na yâ tere ti kui so?” So ayeke mbeni pendere hundango tënë mingi! Zo wa la ayeke zi Paul, nga na azo kue so ayeke na nzara ti tene a zi ala, na gbe ti ngbâa ti siokpari nga na kui? Paul lo wani akiri tënë, lo tene: “Mbi mû merci na Nzapa, na lege ti Jésus-Christ Seigneur ti e!” (aRomain 7:14-25). Biani, Wasarango e aleke ti sö e na lege ti Molenge ti lo, Jésus Christ.

Nzapa azi azo na lege ti Jésus

Jésus afa lege so Nzapa ayeke sara kua na lo ti zi azo na gbe ti ngbâa ti siokpari. Lo tene: “Molenge Ti Zo aga . . . ti mû fini ti Lo tongana wen teti azo mingi.” (Matthieu 20:28). Na lege wa Jésus amû fini ti lo tongana wen, wala sandaga ti zi e? Na lege wa kuâ ti lo ayeke ga na ye ti nzoni na e?

Bible atene so Jésus ‘asara siokpari pëpe’ nga lo “kangbi na awasiokpari”. Na yâ ti fini ti Jésus kue, lo sara ye tâ gi tongana ti so ndia ti Jéhovah afa (aHébreu 4:15; 7:26). Ti Adam, lo kui ngbanga ti siokpari nga na kengo yanga, me ti Jésus a yeke tongaso pëpe (Ezéchiel 18:4). Atâa so Jésus alingbi lani na kuâ pëpe, lo yeda ti kui ndali ti so lo ye ti sara ye so bê ti Babâ ti lo aye: ti sö azo na yâ ti siokpari na kui. Tongana ti so e tene ni kozo awe, Jésus ayeda lani na bê ti lo kue ti ga na sese “ti mû fini ti Lo tongana wen”. Jésus ayeda lani na bê ti lo kue ti “tara kui teti azo kue” ndali ti so lo ye azo mingi, na lâ oko mbeni zo afa mara ti yengo zo tongaso pëpe.​—aHébreu 2:9.

Ngere ti fini ti Jésus so lo mû na sandaga alingbi na ngere ti fini so Adam ayeke na ni kozoni si lo sara siokpari. Ye wa aga na peko ti kuâ ti Jésus? Jéhovah ayeda na sandaga ti fini ti Jésus tongana “ngere so alingbi na ni teti azo kue”. (1 Timothée 2:6, MN ). Biani, Nzapa amû fini ti Jésus so ngere ni ayeke ngangu mingi ti zi azo na gbe ti ngbâa ti siokpari na kui.

Fani mingi, Bible asara tënë ti kota ye so ndoye ti Wasarango e apusu lo ti sara ndali ti azo. Paul atene na aChrétien ti girisa pëpe so ‘A vo ala na ngere ti ngangu.’ (1 aCorinthien 6:20; 7:23). Pierre atene so Nzapa avo aChrétien pëpe na lor wala argent, me na mênë ti Molenge ti lo so azi ala na yâ ti mbeni fini so ayeke gue na ala ti wara kuâ (1 Pierre 1:18, 19). Na lege ti fini ti Christ so lo mû na sandaga, Jéhovah aleke ti zi azo na yâ ti kuâ ti lakue lakue.

Mo yeke bâ ande nzoni na lege ti sandaga ti fini ti Christ?

Bazengele Jean asara tënë ti gbâ ti aye ti nzoni so azo ayeke wara na lege ti sandaga ti fini ti Christ, lo tene: “[Jésus Christ ayeke] sacrifice-ti-futa teti siokpari ti e, me gi ti e pëpe, me ti azo kue nga.” (1 Jean 2:2). Biani, azo kue alingbi ti bâ nzoni na lege ti sandaga ti fini ti Christ. Tënë so aye ti tene so azo kue ayeke bâ ande nzoni na lege ti fini ti Jésus so lo mû na sandaga sân ti sara mbeni ye? Ên-ën. Dabe ti mo na songo azo so a sara tënë ni na yâ ti article so ahon. Azo so agi ti sö azo ti hasango charbon ti gbe ti sese so ayôro mbeni ye so ayeke tongana da ti kukuru juska na ndo so azo ni ayeke dä. Me a yeke na zo oko oko so ayeke na ndo ni so ti lï na yâ ti ye ni so. Legeoko nga, a hunda ti tene azo so aye ti bâ nzoni na lege ti fini ti Christ so lo mû na sandaga ti zi e asara mbeni ye si Nzapa airi tënë nzoni na ndo ti ala.

Nyen la Nzapa ahunda na e? Jean 3:36 atene: “Zo so amä na bê na Molenge ni ayeke na fini ti lakue lakue; me lo so amä na bê na Molenge ni pëpe, fade lo bâ fini pëpe, me ngonzo ti Nzapa angbâ na ndo lo.” Nzapa ahunda ti tene e duti na mabe na fini ti Christ so lo mû na sandaga ndali ti e. Nzapa ahunda nga na e ti sara mbeni ye. “E hinga [so] e hinga [Jésus] biani, gi tongana e bata komandema ti Lo.” (1 Jean 2:3). Ni la, a yeke polele so akota ye so ayeke zi e na yâ ti siokpari na kui ayeke ti duti na mabe na fini ti Christ so lo mû na sandaga ti zi e nga ti yeda ti sara ye alingbi na akomandema ti lo.

Mbeni kpengba lege ti fa so e yeke na mabe na fini ti Jésus so lo mû na sandaga ti zi e ayeke ti fa singila ti bê ti e ndali ti kuâ ti lo. E yeke sara ni na lege so e yeke gue na Matanga ti Dango Bê na kuâ ti lo, tongana ti so lo hunda na e ti sara. Kozo ti tene Jésus akui, lo na abazengele ti lo so ayeke be-ta-zo ate mbeni kobe so na ngoi ni lo fa na ala mbeni ye. Lo tene na ala, lo tene: “I sara so ti dabe i na Mbi.” (Luc 22:19). A-Témoin ti Jéhovah abâ songo ti ala na Molenge ti Nzapa na nene ni mingi, na ala yeke sara ye alingbi na yanga so Jésus amû. Na ngu so, a yeke sara ande Matanga ti Dango Bê na kuâ ti Jésus Christ na samedi lango 22 ti nze ti mars na peko ti lindango ti lâ. E yeke na ngia mingi ti tisa mo ti ga na kota bungbi so ti fa so mo sara ye alingbi na yanga so Jésus amû. A-Témoin ti Jéhovah ti ndo so mo yeke dä alingbi ti fa na mo ngbonga nga na ndo so a yeke sara ande matanga so dä. Na ngoi ti matanga so, mo yeke hinga ande ye mingi na ndo ti ye so a lingbi mo sara si fini ti Christ so lo mû na sandaga azi mo na yâ ti siokpari nga na kuâ so aga na lege ti Adam.

Mingi ti azo laso ahinga ye nzoni kue pëpe na ndo ti kota sacrifice so Wasarango e nga na Molenge ti lo asara ti zi ala na yâ ti futingo. Azo so aduti na mabe na yâ ti sandaga so ayeke na mbeni ye so ayeke mû ngia mingi na ala. Bazengele Pierre atene lani na ndo ti amba ti lo aChrétien, lo tene: “I mä na bê na [Jésus], na i duti na tâ ngia so zo alingbi fa nda ni pëpe, ngia so asi na gloire, teti i wara nda ti mabe ti i, salut ti âme ti i.” (1 Pierre 1:8, 9). Tongana mo fa so mo ye Jésus Christ nga mo duti na mabe na fini ti lo so lo mû na sandaga ti zi e, mo lingbi ti duti na ngia mingi laso nga mo lingbi ti ku ti tene a sö ande mo na yâ ti siokpari na kui.

[Foto na lembeti 6]

Jésus amû fini ti lo ti zi aye ti sioni so siokpari ti Adam aga na ni

[Foto na lembeti 7]

A yeke sara ande Matanga ti Dango Bê na kuâ ti Jésus Christ na samedi lango 22 ti mars 2008, na peko ti lindango ti lâ