Mbeni fango ye so amû ndo kue
“Mbi bâ li ti mbi so mbi yeke gbi na yâ ti enfer ti wâ. Mbi bâ so a bi mbi na yâ ti mbeni ndo ti wâ, na mbi zingo na kota dekongo. Ni la, mbi sara ngangu ti sara sioni pëpe.”—Arline.
MO BÂ ti mo so enfer ayeke mbeni ndo ti pono so a leke ni ndali ti azo ti sioni? Azo mingi abâ ni tongaso. Na tapande, na ngu 2005, mbeni wandara na da senda-gi ti Saint Andrews na Écosse abâ so na popo ti akota zo 100 ti eglize na Écosse, ala 30 tongaso atene so azo so ague yongoro na Nzapa ayeke wara ande “kota vundu teti lakue lakue na yâ ti enfer.” Ala 20 atene so azo so ayeke na yâ ti enfer ayeke wu pono mingi.
Na yâ ti akodoro mingi, azo mingi amä na bê na tënë ti enfer ti wâ. Na tapande, na Amerika, na ngu 2007 mbeni bungbi ahunda tënë na azo na ndo ti tënë ti enfer ti wâ. Bungbi ni abâ so tongana a mû azo 100, azo 70 amä na bê na ni. Même na yâ ti akodoro so tënë ti vorongo Nzapa agbu bê ti azo mingi pëpe, azo angbâ lakue ti mä na bê na tënë ti enfer ti wâ. Na ngu 2004, mbeni bungbi na Canada ahunda tënë na azo na ndo ti enfer ti wâ; na azo 42 na popo ti azo 100 amä na bê na ni. Nga, na Grande-Bretagne, azo 32 na popo ti azo 100 amä na bê so enfer ti wâ ayeke biani dä.
Ye so akota zo ti eglize afa
Akota zo ti eglize mingi azia lege ti fango na azo so enfer ayeke mbeni ndo ti wâ so azo ayeke wu pono dä. Me ti fadeso, ala fa nda ni tongana ti so a fa na yâ ti mbeti Catéchisme de l’Église catholique, so a sigigi na ni na ngu 1992. Mbeti so atene: “Kota sengo ndo so zo awara na yâ ti enfer ayeke so lo kangbi biani biani na Nzapa.”
Atâa so kue, azo angbâ lakue ti mä na bê so enfer ayeke mbeni ndo so azo ayeke wara kota vundu wala ayeke wu pono dä. Azo so ayeke maï fango ye so atene so fango ye so alondo na yâ ti Bible. Albert Mohler, président ti mbeni kota ekole ti abaptiste (Southern Baptist Theological Seminary) atene: “A yeke gi ye so Bible afa.”
Ngbanga ti nyen a lingbi mo bâ ye so mo mä na bê dä nzoni?
Tongana enfer ayeke biani mbeni ndo ti wungo pono, a lingbi mo sara mbeto ni. Ye oko, tongana fango ye so ayeke tâ tënë pëpe, akota zo ti eglize so afa ni asara si yâ ti li ti azo ague kirikiri. Nga ala sara si azo so amä na bê na ni agi bê ti ala gi senge senge. Na ndo ni, ala sara si iri ti Nzapa abuba.
Mbeti ti Nzapa, Bible, atene nyen na ndo ti tënë so? Na yâ ti a-article ti peko, e yeke sara ande kusala na aversê ti yâ ti Bible ti aCatholique nga na ti aProtestant ti kiri tënë na ahundango tënë ota so: (1) Nyen la asi biani na zo na peko ti kuâ ti lo? (2) Jésus afa nyen na ndo ti enfer? (3) Mandango tâ tënë na ndo ti enfer alingbi ti sara nyen na ndo ti mo?