Mû maboko na ala ti kiri hio!

“Fade e gue na zo nyen? Mo yeke na tënë so amû fini ti lakue lakue.”​—JEAN 6:68.

1. Nyen la Pierre atene na ngoi so adisciple ti Jésus mingi azia lo?

MBENI lâ, adisciple ti Jésus Christ mingi azia lo ndali ti mbeni fango ye ti lo so ala ke ni. Lo hunda abazengele ti lo: “I nga, i ye ti zia Mbi?” Pierre akiri tënë: “Seigneur, fade e gue na zo nyen? Mo yeke na tënë so amû fini ti lakue lakue.” (Jean 6:51-69). Mbeni ndo ti gue dä ayeke dä pëpe. Na ngoi ni so, bungbi ti vorongo Nzapa ti aJuif ayeke pëpe na “tënë so amû fini ti lakue lakue.” Nga, a lingbi oko ti wara ni laso pëpe na yâ ti Kota Babylone, abungbi ti vorongo nzapa kue ti wataka. Ti azo so ague yongoro na kundu ti Nzapa me aye ti sara ye so anzere na Jéhovah, “l’heure alingbi awe ti zingo na lango” nga ti kiri na yâ ti kundu ni.​—aRom. 13:11.

2. Na ndo ti atënë so abâ gi a-ancien wala na ndo ti lekengo atënë so andu akota siokpari, a yeke nzoni ti girisa nyen pëpe?

² Jéhovah afa so lo yeke bi bê ti lo lani mingi na ndo ti azo ti Israël so ayeke tongana angasangbaga so agirisa. (Diko Ezéchiel 34:15, 16.) Legeoko nga, a-ancien ayeke na nzara ti mû maboko na angasangbaga so ague yongoro na kundu ni, na a lingbi ala sara ni. A-ancien alingbi ti hunda na mbeni ita ti manda Bible na mbeni Chrétien so awoko na so ayeke na nzara ti tene a mû maboko na lo. Tongana ita so a hunda na lo ti manda Bible na Chrétien so awoko abâ so Chrétien ni asara mbeni kota siokpari, a lingbi ita ni asara nyen? Ahon ti mû wango na ndo ti aye so a-ancien ayeke sara ti leke atënë so andu akota siokpari wala na ndo ti ambeni tënë so abâ gi a-ancien, a yeke nzoni ita ni atene na lo ti bâ a-ancien. Me tongana lo sara ni pëpe, a lingbi ita ni so ayeke manda Bible na lo ague asara tënë ni na a-ancien.​—Lév. 5:1; aGal. 6:1.

3. Koli so ayeke na angasangbaga 100 asara nyen na ngoi so lo wara mbeni oko so agirisa?

³ Na yâ ti article so ahon, a sara tënë ti toli ti Jésus na ndo ti mbeni koli so ayeke na angasangbaga 100. Na ngoi so mbeni oko ague yongoro na kundu ni, lo zia tanga ti ala 99, na lo gue ti gi lo. Koli so ayeke na ngia mingi na ngoi so lo wara ngasangbaga so (Luc 15:4-7). E yeke na mara ti ngia tongaso tongana mbeni oko ti angasangbaga ti Nzapa so agirisa akiri na yâ ti kundu ni. Ndoye apusu a-ancien nga na ambeni membre ti kongregation ti gue ti bâ mbeni Chrétien so awoko. Ala nga kue aye si ita so akiri na yâ ti kundu ni si Nzapa amû maboko na lo, abata lo nga airi tënë nzoni na ndo ti lo (Deut. 33:27; Ps. 91:14; aProv. 10:22). Tongana lege azi na ala ti mû maboko na mbeni Chrétien so awoko, ala lingbi ti sara nyen?

4. A-Galate 6:2, 5 afa nyen na e?

⁴ Peut-être ala lingbi ti wa zo ni ti kiri na yâ ti kongregation na fango na lo na nzobe so Jéhovah aye angasangbaga ti lo nga lo hunda ye ahon ndo ni pëpe na e. Aye so lo hunda andu mandango Bible, gango na abungbi nga na fango nzo tënë ti Royaume. A yeke nzoni ti diko peut-être aGalate 6:2, 5 nga ti fa na lo so aChrétien alingbi ti mû maboko na amba ti ala ti yô akungba ti ala, me tongana a yeke tënë ti sarango ye so Jéhovah ahunda na lo ti sara, a yeke na ‘zo oko oko kue ti yô kungba ti lo mveni’. Zo alingbi ti duti be-ta-zo na Nzapa na place ti mba ti lo pëpe.

“Kusala ti leke ye ti fini” la asara si ala woko?

5, 6. (a) Ngbanga ti nyen a yeke kota ye ti tene e dengi mê nzoni na ngoi so aChrétien so awoko ayeke zi bê ti ala na e? (b) Mo lingbi ti sara nyen ti mû maboko na aChrétien so awoko ti bâ so ziango lege ti gango na abungbi aga na nzoni ye pëpe na ala?

⁵ A lingbi a-ancien nga na ambeni wafango tënë so akpengba na lege ti yingo adengi mê nzoni tongana mbeni Chrétien so awoko ayeke zi bê ti lo na ala, si ala hinga tongana nyen ti mû maboko na lo. Bâ so mo yeke mbeni ancien so ague ti bâ mbeni koli na wali ti lo so a ninga ala ga na bungbi pëpe ndali ti so “kusala ti leke ye ti fini” asara si ala woko (Luc 21:34). Kpale ti nginza wala gbâ ti akua so andu sewa alingbi ti sara si yeke yeke, ala woko na lege ti yingo na ala dë kue. Peut-être ala bâ so a lingbi a dë bê ti ala, me mo lingbi ti fa na ala so ti zi tere ti ala na aita alingbi ande pëpe ti mû maboko na ala. (Diko aProverbe 18:1.) Na ndara, mo lingbi ti hunda ala: “Ngbene ye so ala zia lege ti gango na abungbi so, ala yeke na ngia ahon ti kozo? Sewa ti ala aduti nzoni ahon ti kozo? Ala ngbâ ti wara ngia so ala yeke na ni lani na ngoi so ala zia bê ti ala kue na Jéhovah?”​—Néh. 8:10.

⁶ Ti gbu li na ndo ti ahundango ndo tongaso alingbi ti mû maboko na aChrétien so ti bâ so teti so ala zia lege ti gango na abungbi, a sara si ala woko na lege ti yingo nga ala yeke na ngia mingi pëpe (Mat. 5:3; aHéb. 10:24, 25). A lingbi peut-être ti mû maboko na ala ti bâ so teti so ala yeke fa nzo tënë mbeni pëpe, a sara si ala girisa ngia ti ala (Mat. 28:19, 20). Tongaso, a yeke na lege ti ndara ti tene aChrétien so awoko asara nyen?

7. E lingbi ti wa ala so ahon yongoro na kundu ni ti sara nyen?

⁷ Jésus atene: “I bata nzoni, wala peut-être tengo kobe na nyongo sämba mingi, na kusala ti leke ye ti fini so ane bê ti i . . . Me i bata na ngoi ni kue, i sambela, si i lingbi wara ngangu ti kpe ye kue so fade asi.” (Luc 21:34-36). E lingbi ti wa ala so ahon yongoro na kundu ni, me so aye ti wara ngia so ala yeke na ni lani, ti sambela ti wara yingo vulu ti Nzapa nga na mungo maboko ti lo na ti sara ye ague oko na sambela ti ala.​—Luc 11:13.

Mbeni zo wala mbeni ye la asara si ala woko?

8, 9. Mbeni ancien alingbi ti tene nyen ti mû maboko na mbeni zo so apika gere ti lo?

⁸ Teti so azo ayeke mbilimbili-kue pëpe, a yeke si so ala yeke mä tere pëpe na amba ti ala, na ye so alingbi ti sara si mbeni zo apika gere ti lo. Ambeni ita apika gere ti ala na ngoi so ala bâ so mbeni zo so azo ane lo na yâ ti kongregation asara ye ague nde na akpengba-ndia ti Bible. Tongana mara ti aye tongaso asara si mbeni ita awoko, ancien so ague ti bâ lo alingbi ti fa na lo so Jéhovah asara pëpe si mbeni zo apika gere ti lo. Tongaso, a yeke na lege ni ti tene mbeni zo afâ yâ ti songo so atingbi lo na Nzapa wala so atingbi Nzapa na awakua ti lo? Wala, a yeke nzoni pëpe ti ngbâ ti sara na Nzapa, na ti hinga biani so “Juge ti sese kue” ahinga ye so asi nga lo yeke bâ ande lege ni na ngoi so alingbi? (Gen. 18:25; aCol. 3:23-25). Tongana mbeni zo apika gere ti lo na lo tï, lo yeke ngbâ na sese pëpe sân ti sara ngangu ti londo.

⁹ Na ngoi so mbeni ancien ayeke sara ngangu ti mû maboko na lo ti kiri, ancien ni alingbi ti fa na lo so, a si na mbeni ngoi, ambeni ita so awoko abâ so ye so asara lani si ala pika gere ti ala ayeke kota ye mbeni pëpe. Ti tâ tënë ni, peut-être ye ni so ayeke dä mbeni pëpe. Tongana bungbi azingo na mbeni ita na asara si lo pika gere ti lo, sambela nga na gbungo li alingbi ti mû maboko na lo ti bâ so lo nga kue lo yeke na faute nga so a yeke nzoni lo zia pëpe si gbotongo mê so lo wara asara si lo pika gere ti lo.​—Ps. 119:165; aHéb. 12:5-13.

Ambeni ye so Bible afa asara si ala woko?

10, 11. Atënë wa alingbi ti mû maboko na aChrétien so ayeke na mbeni bango ndo nde na ndo ti mbeni ye so Bible afa?

¹⁰ Ambeni ita alingbi ti hon yongoro na kundu ni ndali ti so ala yeda pëpe na mbeni ye so Bible afa. Azo ti Israël so a zi ala na gbe ti ngbâa ti azo ti Egypte ‘agirisa kusala’ so Nzapa asara ndali ti ala na “ala ku ti mä wango ti Lo pëpe.” (Ps. 106:13). “Ngbâa be-ta-zo na ti ndara” ayeke mû na e anzoni kobe ti yingo; tongana e dabe ti mbeni Chrétien so awoko na ndo ti tënë so, a lingbi ti mû maboko na lo (Mat. 24:45, MN ). A yeke ye so amû lege lani na lo ti hinga tâ tënë. Tongaso, a yeke biani na lege ni ti tene lo leke na bê ti lo ti kiri ti tambela na yâ ti tâ tënë.​—2 Jean 4.

¹¹ Na ngoi so ancien ni ayeke gi ti mû maboko na aChrétien so ahon yongoro na kundu ti Nzapa, lo lingbi ti sara tënë ti adisciple so azia Jésus ndali ti so ala ke mbeni fango ye ti lo (Jean 6:53, 66). Teti so adisciple so afâ yâ ti songo so atingbi ala na Christ nga na adisciple ti lo so ayeke be-ta-zo, a sara si ala bâ aye ti yingo na nene ni mbeni pëpe nga ala girisa ngia ti ala. A-Chrétien so azia ti bungbi oko na aita ti ala ti kongregation awara mbeni ndo nde so ala lingbi ti wara apendere kobe ti yingo dä? Ên-ën, ala wara ni pëpe!

Mbeni kota siokpari asara si ala woko?

12, 13. Tongana mbeni zo so ague yongoro na kundu ni ayeda so lo sara kota siokpari, azo alingbi ti mû maboko na lo tongana nyen?

¹² Ambeni azia ti fa tënë nga ti ga na abungbi ndali ti so ala sara mbeni kota siokpari. Ala pensé peut-être so tongana ala fa sioni so ala sara na a-​ancien, a yeke bi ala na gigi. Me a yeke bi ala na gigi pëpe tongana ala zia lege ti sarango ye so Bible ake nga ala fa biani so ala gbian bê ti ala (2 aCor. 7:10, 11). Tongana ala sara tongaso, a yeke yamba ala na yâ ti kongregation nga a-ancien ayeke mû maboko na ala na lege ti yingo alingbi na bezoin ti ala.

¹³ Tongana mo yeke mbeni wafango tënë so akpengba na lege ti yingo, na so a hunda na mo ti mû maboko na mbeni Chrétien so awoko, a yeke nzoni mo sara nyen tongana lo tene na mo so lo sara mbeni kota siokpari? Tongana ti so e bâ ni kozo awe, ahon ti yôro tere ti mo na yâ ti mbeni ye so abâ mo pëpe, hunda na lo ti bâ a-ancien. Tongana lo ke ti sara ni, fa so tënë ti iri ti Jéhovah agbu bê ti mo nga so mo yeke bi bê na nzoni duti ti kongregation na lege so mo yeke sara ye ague oko na akpengba-ndia so Nzapa amû na ndo ti atënë tongaso. (Diko Lévitique 5:1.) A-ancien ahinga tongana nyen ti mû maboko na zo so ayeke na nzara ti kiri na yâ ti kundu ni na so aye ti sara ye alingbi na ye so bê ti Nzapa aye. Ye so ahunda peut-être ti tene na ndoye a sara ambeni ye ti kiri na lo na nzoni lege (aHéb. 12:7-11). Tongana zo ni ayeda so lo sara siokpari na tere ti Nzapa awe, lo zia lege ti ye ti sioni ni awe nga so lo gbian bê ti lo biani awe, a-ancien ayeke mû maboko na lo na tongaso Jéhovah alingbi ti pardone lo.​—Es. 1:18; 55:7; Jacq. 5:13-16.

Kiringo ti mbeni molenge aga na kota ngia

14. Na lege ti atënë ti mo wani, fa peko ti toli ti Jésus na ndo ti molenge-koli so abuba aye ti lo kue.

¹⁴ Tongana mbeni ita ayeke mû maboko na mbeni Chrétien so ahon yongoro, ita ni alingbi ti dabe ti lo na toli ti Jésus so ayeke na Luc 15:11-24. Na yâ ti toli so, mbeni maseka-koli abuba aye ti lo ti héritier kue. Na pekoni, lo bâ so lege so lo yeke sara ye na fini ti lo anzere na lo oko pëpe. Lo yeke na kobe ti tengo ni pëpe, nzara ti afami ti lo ahon ndo ti lo nga lo mû desizion ti kiri na ndo ti lo. Na ngoi so lo ngbâ yongoro na lege, babâ ti lo abâ lo, lo kpe na devant ti lo na lo gbu lo na kate ti lo, lo su ngbangba ti lo na tere ti lo anzere mingi. Ti gbu li na ndo ti toli so alingbi ti pusu mbeni Chrétien so ahon yongoro ti kiri na yâ ti kundu ni. Teti so a ga nduru ti futi aye ti ngoi so awe, a yeke nzoni lo kiri na yâ ti kongregation sân ti ku.

15. Ngbanga ti nyen ambeni Chrétien ahon yongoro na kongregation?

¹⁵ Mingi ti aChrétien so ahon yongoro na kongregation ayeke sara ye biani pëpe tongana ti molenge-koli so abuba aye ti lo so. Ambeni ita ato nda ti hon gi yeke na yeke, tongana ti mbeni mangboko so yeke na yeke azia kuru sese ti hon. Ti ambeni, gingo bê na ndo ti aye ti dunia so ahon ndo ti ala na asara si ala bâ songo ti ala na Jéhovah na nene ni mbeni pëpe. Me ti ambeni, ala hon yongoro ndali ti so ala zia si mbeni zo so ayeke membre ti kongregation asara si ala pika gere ti ala, wala ndali ti so ala yeda pëpe na mbeni ye so Bible afa. Ambeni atï na yâ ti kota siokpari, me ala yeke mingi pëpe. Ye oko, awango so a mû na ndo ti atënë so kue alingbi ti sara si mo mû maboko na ala so azia kundu ni ndali ti anda ti tënë so wala ambeni nde ti kiri na yâ ti kundu ni kozoni si ngoi ayeke dä mbeni pëpe ti sara ni.

“Gango nzoni, molenge ti mbi ti koli!”

16-18. (a) Na lege wa mbeni ancien amû maboko lani na mbeni ita-koli so awoko teti angu mingi? (b) Nyen la asara si ita-koli so awoko? A mû maboko na lo tongana nyen? Aita ti kongregation ayamba lo tongana nyen?

¹⁶ Mbeni ancien atene: “Bungbi ti a-ancien ti kongregation ti e aye mingi ti gue ti bâ aChrétien so awoko na lege ti yingo. Mbi dabe ti mbi na mbeni ita-koli so mbi manda Bible lani na lo na mbi mû maboko na lo ti hinga tâ tënë. Teti angu 25 tongaso, lo ga na abungbi pëpe nga lo fa tënë pëpe na lo wara gbâ ti angangu kpale. Tongaso, mbi fa na lo so tongana lo sara ye ague oko na akpengba-ndia ti Bible, a lingbi ti mû maboko na lo. A si na mbeni ngoi, lo to nda ti ga na Da ti Royaume, na lo yeda ti manda Bible ti mû maboko na lo ti wara ngangu ti kiri na yâ ti kundu ni.”

¹⁷ Nyen la asara si ita-koli so awoko? Lo tene: “Mbi to nda ti gi bê ti mbi mingi na ndo ti aye ti dunia so ahon aye ti yingo. Ni la mbi zia lege ti mandango ye, ti fango tënë nga ti guengo na abungbi. Na pekoni, mbi kangbi na aita. Me ye so amû maboko na mbi ti kiri ayeke so mbeni ancien abi bê ti lo biani na mbi.” Na pekoni so ita-koli so ayeda ti tene a manda Bible na lo, akpale so lo wara ato nda ti kiri na peko. Lo tene: “Mbi bâ so ye so mbi yeke na bezoin ni na yâ ti gigi ti mbi ayeke ndoye ti Jéhovah, fango lege ti lo nga na bungbi ti lo.”

¹⁸ Aita ti kongregation ayamba ita-koli so lani tongana nyen? Lo tene: “Mbi bâ tere ti mbi tongana molenge-koli so abuba aye ti lo kue, so Jésus Christ asara tënë ti lo. A sara ngu 30 mbi gue na abungbi pëpe. Me na ngoi so mbi kiri, mbeni ita-wali so aga mbakoro awe, so ayeke lani dä angbâ lakue be-ta-zo na Jéhovah. Lo tene na mbi: ‘Gango nzoni, molenge ti mbi ti koli!’ Tënë so andu bê ti mbi mingi. Mbi bâ so mbi yeke tâ na ndo ti mbi. Nga mbi ye ti kiri singila mingi ndali ti so ancien so nga aita kue ti kongregation aye mbi, ala yamba mbi na ngia, ala sara ye na mbi na nzobe na ala fa so ala yeke bi bê ti ala biani na mbi. Ndoye so ala yeke na ni na mbage ti Jéhovah nga na mbage ti azo amû biani maboko na mbi ti kiri na yâ ti kundu ni.”

Wa ala ti sara ye hio!

19, 20. Na lege wa mo lingbi ti wa aChrétien so awoko ti kiri hio na yâ ti kundu ni? Na lege wa mo lingbi ti fa na ala so Nzapa aku ye ahon ndo ni pëpe na mbage ti ala?

¹⁹ E yeke na yâ ti ngoi ti nda ni, na aye ti ngoi ti laso aga nduru ti hunzi awe. Ni la, wa aChrétien so awoko ti gue na abungbi. Wa ala ti to nda ni hio ti sara ni. Fa na ala so Satan ayeke tara ti buba songo ti ala na Nzapa na ti sara si ala bâ so kengo tâ vorongo ayeke sara si akpale ti ala ahunzi. Mo lingbi ti dë bê ti ala so a yeke gi na dutingo mbeni disciple ti Jésus so ayeke be-ta-zo si ala lingbi ti wara tâ dengo bê.​—Diko Matthieu 11:28-30.

²⁰ Dabe ti ala so Nzapa aku na mbage ti e ti sara ye alingbi na ngangu ti e. Kozoni na kuâ ti Jésus, Marie, ita ti Lazare ti wali atuku yombo so ngere ni ayeke ngangu na tere ti lo. Na ngoi so ambeni zo akasa Marie ndali ti ye so lo sara, Jésus atene: “Zia lo . . . Wali so asara ye so lo lingbi sara.” (Marc 14:6-8). Jésus agonda lani womua so abi kete nginza so lo yeke na ni na yâ ti sanduku ti temple. Womua so nga asara ye so lo lingbi ti sara (Luc 21:1-4). Mingi ti e alingbi ti gue na abungbi nga ti gue ti fa tënë ti Royaume. Na mungo maboko ti Jéhovah, mingi ti aChrétien so fadeso awoko alingbi ande ti sara nga aye so.

21, 22. Mo lingbi ti dë bê ti aChrétien so akiri na mbage ti Jéhovah na ndo ti aye wa?

²¹ Tongana mbeni Chrétien so ague yongoro na kundu ni ayeke na mbeto ti kiri ti bungbi oko na amba ti lo, mo lingbi ti dabe ti lo na ndo ti ngia so azo awara lani na ngoi so molenge-koli so abuba aye ti lo kue akiri na da. Aita ayeke wara mara ti ngia tongaso tongana aita so awoko akiri na yâ ti kongregation. Wa ala ti sara ye laso ti ke Zabolo na ti ga nduru na Nzapa.​—Jacq. 4:7, 8.

²² A yeke yamba ande na ngia mingi aChrétien so akiri na mbage ti Jéhovah (Toto ti Jér. 3:40). Kite ayeke dä pëpe so aye so ala sara ândö na yâ ti kua ti Nzapa asara si ala duti na kota ngia. Gbâ ti aye ti nzoni ayeke ku aChrétien so akiri hio na yâ ti kundu ni.

Mo yeke kiri tënë tongana nyen?

• Na lege wa mo lingbi ti mû maboko na mbeni Chrétien so apika gere ti lo na lo woko?

• Mo lingbi ti tene nyen ti mû maboko na mbeni Chrétien so azia kundu ni ndali ti so lo ke mbeni ye so Bible afa?

• A lingbi ti sara nyen ti mû maboko na mbeni Chrétien so aye ti kiri na yâ ti kongregation me lo yeke gi bê ti lo?

[Foto na lembeti 23]

Ti gbu li na ndo ti tapande ti molenge-koli so abuba aye ti lo kue alingbi ti pusu aita so awoko ti kiri na yâ ti kundu ni