Mo lingbi ti kpengba mbeni ita so afa tënë encore ape

Na mardi 11 avril, aita mingi so afa tënë encore ape ayeke ga na Mémorial. Ala komanse lani ti kpe loro ti fini me ala kiri na peko ndali ti araison nde nde, a fa ambeni raison ni na yâ ti brochure Kiri na Jéhovah (aHb 12:1). Me, Jéhovah angbâ ti bâ ala na nene ni ndali ti so lo vo ala na mênë ti Molenge ti lo (Kus 20:28; 1Pi 1:18, 19). Tongana nyen la e lingbi ti mû maboko na ala ti kiri na congrégation?

A-ancien ayeke gi ti wara aita so afa tënë encore ape ti mû maboko na ala tongana ti so mbeni berger ayeke gi nzoni mbeni taba so ahon yongoro na groupe ti ataba ni (Lc 15:4-7). Ye so afa so Jéhovah ayeke bâ lege ti awakua ti lo na ndoye (Jér 23:3, 4). E kue e lingbi ti kpengba azo tongaso, gï a-ancien oko ape. A-effort so e yeke sara ti fa nzoni bê na azo tongaso nga ti zia terê ti e na place ti ala ayeke nzere na Jéhovah nga alingbi ti ga na aye ti nzoni mingi (aPr 19:17; Kus 20:35). Tongaso, gbu li na ndö ti zo so mo lingbi ti kpengba lo nga sara ni hio.

BÂ VIDÉO KPENGBA AITA SO AFA TËNË ENCORE APE, NA PEKONI KIRI TËNË NA AHUNDANGO TËNË SO:

• Nyen la Abbey asara na ngoi so lo tingbi na mbeni Témoin so lo hinga lo ape?

• Tongana e yeke gbu li ti e ti mû maboko na mbeni ita so afa tënë encore ape, ngbanga ti nyen a lingbi e sara tënë ni na a-ancien?

• Nyen la Abbey asara ti leke terê ti lo ti gue ti bâ Laura ti fani use ni?

• Na ngoi so Abbey ayeke gi ti kpengba Laura, tongana nyen la lo fa so lo kanga bê, lo nze ape nga lo sara ye na ndoye?

• Nyen la e lingbi ti manda na lege ti toli ti Jésus so ayeke na Luc 15:8-10?

• Aye ti nzoni wa la aga na peko ti a-effort so aita asara ti mû maboko na Laura?