Jésus​—Tâ nzoni tapande ti mû peko ni

MO YE ti duti mbeni zo so ayeke nzoni ahon ti kozo nga so ayeke na ngia ahon ti kozo? Bazengele Pierre afa na e tongana nyen ti sara ni. Lo tene: “Christ abâ lani pasi ndali ti ala, na lo zia na ala mbeni tapande si ala mû tâ gi peko ti gere ti lo mbilimbili.” (1 Pierre 2:21). Biani, aye so Jésus Christ asara na yâ ti fini ti lo ayeke tâ nde mingi, na e lingbi ti manda ye mingi na lege ti lo. Tongana e manda ye na ndo ti Jésus nga e leke fini ti e ague oko na ti lo, e lingbi biani ti ga nzoni ahon ti kozo nga e yeke duti na ngia ahon ti kozo. Zia e bi lê nzoni na ndo ti ambeni sarango ye so a hinga kpengba koli so na ni nga e bâ lege so mungo tapande ti lo alingbi ti mû maboko na e.

Jésus ayeke na nzoni bango ndo. Atâa so Jésus atene lo yeke na “mbeni ndo ti zia li ti lo dä pëpe”, lo ke pëpe anzoni ye kue ti gigi wala lo hunda pëpe na azo ti sara tongaso (Matthieu 8:20). Lo gue na amatanga (Luc 5:29). Kozo miracle ti lo so a sara tënë ni na yâ ti Bible, so lo sara si ngu aga nzoni vin na ngoi ti matanga ti mariage, afa so lo yeke na ngia ti duti na popo ti azo nga so lo ke pëpe anzoni ye kue ti gigi (Jean 2:1-11). Me, Jésus afa polele ye so ayeke kota mingi na lê ti lo. Lo tene: “Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.”​—Jean 4:34.

❑ Mo gbu li ti mo awe ti bâ si gingo mosoro akanga lege na mo pëpe ti duti na nzoni songo na Nzapa?

Azo aye gango na tere ti Jésus. Bible atene so Jésus aye azo. Bê ti lo ason pëpe tongana azo aga na tere ti lo ti fa akpale ti ala wala ti hunda na lo akpengba tënë. Mbeni lâ, na ngoi so gbâ ti azo aga na tere ti lo, mbeni wali so abâ pasi na kobela teti ngu 12 andu bongo ti Jésus, ti sara si kobela ti lo akaï. Jésus ake na wali so pëpe ye so lo sara, so ambeni zo alingbi ti bâ ni tongana nengo zo pëpe. Me na nzoni bê, lo tene: “Molenge ti mbi, mabe ti mo asava mo awe.” (Marc 5:25-34). Amolenge nga kue ayeke na ngia ti duti na tere ti Jésus, ala yeke na mbeto pëpe ti tene Jésus asara sanka ti ala (Marc 10:13-16). Tongana Jésus ayeke sara lisoro na adisciple ti lo, lo yeke fa na ala atënë ti bê ti lo nga lo yeke tene anzoni tënë na ala. Ala yeke na nzara ti ga nduru na lo.​—Marc 6:30-32.

❑ A yeke ngangu pëpe na azo ti ga na tere ti mo?

Lo hinga ti zia tere ti lo na place ti azo nga lo yeke bâ mawa ti azo. Mbeni oko ti asarango ye ti Jésus so ayeke tâ pendere mingi ayeke so lo hinga ti zia tere ti lo na place ti azo, ti bâ mawa ti ala nga ti mû maboko na ala. Bazengele Jean atene so na ngoi so Jésus abâ Marie na totongo kuâ ti ita ti lo ti koli Lazare, Jésus ‘adema na yâ ti bê ti lo na vundu asara lo’ na lo ‘toto na ngu ti lê.’ Azo so ayeke bâ lani Jésus abâ polele tâ yengo so lo ye na sewa so, na Jésus ayeke na kamene pëpe ti fa ni na gigi. Nga, na ngoi so lo kiri na kamarade ti lo na fini, a fa so lo bâ mawa ti sewa so mingi!​—Jean 11:33-44.

Mbeni lâ, mbeni koli so ayeke na kobela ti buruma, mbeni sioni kobela so asara si lo ga nduru pëpe na azo, adema tere na Jésus, lo tene: “Seigneur, tongana mo ye, mo lingbi ti sara si tere ti mbi aga nzoni.” Jésus asara mbeni ye so adë biani bê ti zo: “Lo yôro maboko ti lo, lo ndu zo ti buruma ni, na lo tene: ‘Mbi ye. Zia tere ti mo aga nzoni.’ ” (Matthieu 8:2, 3). Jésus asava azo gi pëpe ti sara si atënë ti prophétie aga tâ tënë. Lo ye lani ti sara mbeni ye ti mbô ngu ti lê ti ala. Aye kue so lo sara ague oko na mbeni tënë ti lo so azo mingi ahinga ni: “Gi tongana ti so ala ye azo asara na ala, ala sara tongaso na azo ni nga.”​—Luc 6:31.

❑ Aye so mo yeke sara afa so mo bâ mawa ti azo?

Jésus ayeke gbu nda ti ye nga lo yeke hinga nda ti aye hio. Atâa so Jésus asara faute lâ oko pëpe, lo ku lâ oko pëpe ti tene azo asara ye kue tâ gi na lege ni wala lo gi pëpe ti fa so lo la lo yeke kota ahon azo kue; lo gi pëpe ti sara ye hio sân ti gbu nda ti ye nzoni. Mbeni lâ, mbeni wali so “azo ahinga lo na yâ ti gbata ni tongana wasiokpari” afa mabe ti lo nga singila ti bê ti lo na lege so lo sukula gere ti Jésus na ngu ti lê ti lo. Jésus azia lege na lo ti sara ni, atâa so a dö bê ti zo so a tisa Jésus na da ti lo na so zo ni so afâ ngbanga ngangu na ndo ti wali so. Teti so Jésus ahinga so wali so asara ye so na bê ti lo kue, lo fâ ngbanga na ndo ti lo pëpe ndali ti asiokpari ti lo. Me lo tene: “Mabe ti mo asö mo awe. Mo gue na siriri.” Âmanke ye so Jésus asara apusu wali so ti ke asioni sarango ye ti lo.​—Luc 7:37-50.

❑ A hinga mo tongana zo so ayeke nduru ti gonda azo nga so ayeke fâ ngbanga hio pëpe na ndo ti azo?

Lo ye azo kue nga lo ne azo. Jésus aye mingi Jean so ayeke disciple ti lo; peut-être a yeke ngbanga ti so sarango ye ti ala aye ti gue oko nga peut-être ndali ti so mama ti Jésus na ti Jean ayeke aita.a Ye oko, Jésus afa pëpe so lo ye Jean ahon tanga ti adisciple ti lo kue (Jean 13:23). E hinga ni ndali ti so na ngoi so Jean na ita ti lo Jacques ahunda ti wara kota ndo na yâ ti Royaume ti Nzapa, Jésus akiri tënë na ala, lo tene: “Ti duti na mbage ti maboko ti mbi ti koli wala na mbage ti maboko ti mbi ti wali, a yeke ti mbi ti mû ni pëpe.”​—Marc 10:35-40.

Jésus ayeke ne azo. Azo ti ngoi ti Jésus ayeke na sioni bango ndo na ndo ti amba ti ala, me Jésus asara ye pëpe tongana ti ala. Na tapande, ala bâ ti ala lani so akoli ayeke kota ahon awali. Me ti Jésus, lo ne awali mingi. Kozo zo so Jésus atene na lo polele so ni yeke Messie ayeke mbeni wali so ayeke Juif pëpe, mbeni zo ti Samarie so mingi ti aJuif ake ala na ala yeke bara ala pëpe (Jean 4:7-26). Na ndo ni, Jésus ane awali na lege so ala yeke akozo zo so afa tënë ti zingongo ti lo na kuâ.​—Matthieu 28:9, 10.

❑ Mo yeke sara ye na azo kue legeoko atâa a yeke koli wala wali, atâa mara ti ala, yanga ti kodoro ti ala wala kodoro so ala londo dä?

Lo sara ye so a ku na mbage ti mbeni molenge nga na mbeni ita. Âmanke Joseph, babâ so abata Jésus akui na ngoi so Jésus ade maseka. Kite ayeke dä pëpe so Jésus asara kua tongana sarapande ti wara nginza ti bâ lege ti mama ti lo na angambe ti lo (Marc 6:3). Na ngoi so Jésus aga nduru ti kui, lo hunda na disciple ti lo Jean ti bata mama ti lo Marie.​—Jean 19:26, 27.

❑ Mo lingbi ti mû tapande ti Jésus na ti bâ lege ti sewa ti mo nzoni?

Jésus ayeke tâ kamarade. Songo ti Jésus na akamarade ti lo akpengba mingi. Nyen la afa ni? Lo ke pëpe akamarade ti lo gi ndali ti so ala sara afaute, même tongana ala kiri fani mingi na ndo ti a-oko faute ni. Adisciple ti lo ayeke sara ye lakue pëpe tongana ti so lo ye. Me lo fa so lo yeke kamarade ti ala na lege so lo luti gi na ndo ti anzoni sarango ye ti ala ahon ti tene lo tene so sioni bibe la apusu ala ti sara ye (Marc 9:33-35; Luc 22:24-27). Atâa so lo forcé ala pëpe ti yeda na bango ndo ti lo, lo yeke hunda na ala ti fa tënë ti bê ti ala.​—Matthieu 16:13-15.

Ahon ye kue, Jésus aye akamarade ti lo (Jean 13:1). Lo ye ala tongana nyen? Lo tene: “Tongana mbeni zo akä âme ti lo na kuâ ndali ti akamarade ti lo, mbeni ndoye ti hon so ayeke dä pëpe.” (Jean 15:13). Zo alingbi ti mû na akamarade ti lo mbeni ye so ayeke kota ahon fini ti lo wani?

❑ Mo yeke ngbâ ti ye akamarade ti mo atâa so ala son bê ti mo?

Lo sara ye na mbeto pëpe nga lo yeke tâ koli. Jésus ayeke mbeni wokongo zo pëpe tongana ti so ambeni foto afa. A-Évangile afa so Jésus ayeke mbeni koli so akpengba. Fani use, Jésus ahunda na azo so ayeke kä ye na yâ ti temple ti mû akungba ti ala ti hon na ni (Marc 11:15-17; Jean 2:14-17). Na ngoi so gbâ ti azo aga ti gbu “Jésus, zo ti Nazareth”, na mbeto pëpe lo ga na devant ti ala, lo fa tere ti lo nga lo kanga lege si a sara sioni pëpe na adisciple ti lo, lo tene polele: “Mbi la. Tongana mbi la si ala yeke gi mbi, ala zia ala so ague ti ala.” (Jean 18:4-9). A yeke ye ti dongo bê pëpe so na ngoi so Ponce Pilate abâ so Jésus asara ye na mbeto pëpe atâa so a gbu lo na a yeke sara ye ti ngangu na lo, lo tene: “Ala bâ, koli ni la!”​—Jean 19:4, 5.

❑ Mo yeke sara ye hio nga na mbeto pëpe tongana mo bâ so a lingbi mo sara tongaso?

A yeke apendere sarango ye ti Jésus so nga na ambeni nde la asara si lo yeke tâ nzoni tapande ti tene e mû peko ni. Tongana e zia si asarango ye ti e ague oko na ti lo, a yeke sara si e ga nzoni ahon ti kozo nga e yeke duti na ngia ahon ti kozo. A yeke ndali ni la bazengele Pierre awa aChrétien ti mû tâ gi peko ti gere ti Jésus mbilimbili. Mo yeke gi ti sara tongaso?

Lo yeke gi pëpe tapande ti mungo peko ni

Ye oko, Jésus ayeke gi pëpe tapande ti mungo peko ni. Lo tene: “Mbi yeke lege ni, tâ tënë na fini. Zo kue so aga na Babâ ayeke ga gi na lege ti mbi.” (Jean 14:6). Atâa so Jésus afa tâ tënë na ndo ti Nzapa, na a sara si azo aga nduru na Nzapa, lo sara nga si azo so ayeke be-ta-zo alingbi ti wara fini ti lakue lakue.​—Jean 3:16.

Jésus atene na ndo ti ndani so lo ga na sese, lo tene: ‘Molenge ti zo aga ti tene azo asara kua na lo pëpe, me lo ga ti sara kua na azo na ti mû âme ti lo tongana ngere so a futa ti zi na azo mingi.’ (Matthieu 20:28). Na mungo fini ti lo na sandaga, Jésus azi lege na azo ti wara fini ti lakue lakue. A lingbi e oko oko kue e sara nyen ti bâ nzoni na lege ti sandaga so? Jésus atene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.”​—Jean 17:3.

Biani, ti tene zo awara fini ti lakue lakue, a lingbi lo hinga ye na ndo ti Jésus, lo mû tapande ti lo nga lo mä na bê na sandaga so Jésus amû. E tisa mo ti mû ngoi ti manda Bible, buku so hingango ye so alondo na yâ ni, nga ti sara ngangu ti sara ye alingbi na ye so Bible afa, tongana ti so Jésus asara lani.b

Tapande ti fini ti Jésus afa na e aye so a lingbi e sara. Sandaga so lo mû alingbi ti zi e na gbe ti siokpari nga na ye ti peko ni so ayeke kuâ (aRomain 6:23). Tongana fade tapande ti Jésus Christ asara ye mingi na ndo ti e pëpe, ka dutingo ti e ayeke ye ti mawa mingi! Zia e zia lâ oko pëpe si akua so e yeke sara nga na agingo bê akanga lege na e ti bâ tapande ti Jésus Christ, koli so ahon tanga ti azo kue nga ti mû tâ gi tapande ti lo.

[Akete tënë na gbe ni]

[Encadré/Foto na lembeti 7]

◼ Jésus aye azo kue nga lo ne azo kue

◼ Lo ye akamarade ti lo juska na nda ni

◼ Lo sara ye na mbeto pëpe

Mo yeke gi ti mû tâ gi peko ti gere ti Jésus mbilimbili?

[Afoto na lembeti 5]

Jésus ayeke na nzoni bango ndo . . . 

azo aye gango na tere ti lo . . . 

lo bâ mawa ti azo