Nzapa ayeke zo wa?

MO YEKE kiri tënë tongana nyen na hundango tënë so? Ambeni zo apensé so ala hinga Nzapa nzoni, so ti tene ala yeke na kpengba songo na lo. Ti ambeni, ala bâ Nzapa tongana zo so ayeke nduru pëpe na ala. Ala mä na bê so Nzapa ayeke dä, me ala hinga ye mingi pëpe na ndo ti lo. Tongana mo mä na bê na Nzapa, mo yeke kiri tënë tongana nyen na ahundango tënë so ayeke na gbe ni ge?

1. Nzapa ayeke zo biani?

2. Nzapa ayeke na iri?

3. Jésus ayeke Nzapa ti Ngangu Ahon Kue?

4. Nzapa ayeke bi bê ti lo na mbi nga la?

5. Nzapa ayeda na alege nde nde kue so a yeke voro na lo?

Tongana mo hunda atënë so na azo, li ti mo ayeke kpe na ndo ti akiringo tënë nde nde so ala yeke mû. A yeke ye ti dongo bê pëpe so apande nga na abango ndo so ayeke na lege ni pëpe na ndo ti Nzapa amû ndo.

Ndani so a yeke kota ye ti hinga akiringo tënë ni

Na ngoi so Jésus Christ ayeke sara tënë na mbeni wali so amä na bê na Nzapa, so lo wara lo na yanga ti mbeni dungu, lo fa so a yeke kota ye ti tene zo ahinga tâ tënë na ndo ti Nzapa. Wali so, so ayeke mbeni zo ti Samarie ahinga so Jésus ayeke prophète. Me wali ni ayeke gi bê ti lo na ndo ti mbeni ye: bungbi ti vorongo nzapa so Jésus ayeke dä ayeke nde na ti lo. Na ngoi so lo fa ye so lo yeke gi bê ti lo na ndo ni, Jésus atene na lo polele, lo tene: “Ala voro ye so ala hinga ni pëpe.” (Jean 4:19-22). A yeke polele so Jésus abâ so a yeke pëpe azo kue so amä na bê na Nzapa la ahinga Nzapa nzoni.

Atënë ti Jésus aye ti fa so zo alingbi biani pëpe ti hinga Nzapa nzoni? Ên-ën. Jésus atene na wali ni: “Atâ zo ti vorongo Nzapa ayeke voro Babâ na yingo nga na tâ tënë, teti, biani, Babâ ayeke gi mara ti azo tongaso ti voro lo.” (Jean 4:23). Mo yeke na popo ti azo so ayeke voro Nzapa “na yingo nga na tâ tënë”?

A yeke kota ye mingi ti tene mo hinga kiringo tënë ti hundango tënë so. Ngbanga ti nyen? Jésus afa so a yeke kota ye mingi ti tene zo awara tâ hingango ye tongana lo tene na yâ ti sambela: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.” (Jean 17:3). Biani, tongana mo ye ti wara fini kekereke, a lingbi mo hinga tâ tënë na ndo ti Nzapa.

Zo alingbi biani ti hinga tâ tënë na ndo ti Nzapa? En, zo alingbi biani ti hinga ni. Me, mo lingbi ti sara nyen ti hinga ni? Jésus atene na ndo ti lo wani, lo tene: “Mbi yeke lege ni, tâ tënë na fini. Zo kue so aga na Babâ ayeke ga gi na lege ti mbi.” (Jean 14:6). Lo kiri lo tene: “Mbeni zo ti hinga Babâ ni ayeke pëpe, gi Molenge ni nga na zo kue so Molenge ni aye ti fa Babâ ni na lo.”​—Luc 10:22.

Tongaso, na yâ ti afango ye ti Jésus Christ, Molenge ti Nzapa, a yeke wara tâ ye so amû lege na zo ti hinga Nzapa. Biani, Jésus amû na e zendo so: “Tongana ala ngbâ na yâ ti tënë ti mbi, ala yeke biani adisciple ti mbi, na ala yeke hinga ande tâ tënë, na tâ tënë ayeke zi ala.”​—Jean 8:31, 32.

Tongaso, Jésus ayeke kiri tënë tongana nyen na ahundango tënë oku so e bâ ni fade?

[Foto na lembeti 4]

Mo yeke voro Nzapa so mo hinga lo nzoni pëpe?