Jésus ayeke Nzapa ti Ngangu Ahon Kue?

Aye so azo mingi ayeke tene:

▪ “En. Jésus ayeke Nzapa ti Ngangu Ahon Kue.”

▪ “Jésus ayeke Nzapa so aga tongana zo na ndo ti sese.”

Jésus atene ti lo nyen?

▪ “Tongana ala ndoye mbi, ala yeke duti na ngia so mbi yeke gue na Babâ, teti Babâ ayeke kota ahon mbi.” (Jean 14:28). Jésus atene so lo na Babâ ti lo alingbi tere pëpe.

▪ “Mbi yeke montê na Babâ ti mbi nga Babâ ti ala, na Nzapa ti mbi nga Nzapa ti ala.” (Jean 20:17). Jésus atene pëpe so lo yeke Nzapa me lo fa so Nzapa ayeke mbeni zo nde.

▪ “Mbi sara tënë ti bê ti mbi wani pëpe, me Babâ so atokua mbi si amû na mbi mbeni commandement na ndo ti ye so a lingbi mbi fa na mbi sara tënë ni.” (Jean 12:49). Afango ye ti Jésus alondo na lo wani pëpe; me a londo na Babâ ni.

JÉSUS atene so lo yeke Molenge ti Nzapa, me pëpe Nzapa ti Ngangu Ahon Kue. Tongana Jésus ayeke Nzapa, zo wa la lo yeke sambela lani lo na ngoi so lo yeke ge na sese so? (Matthieu 14:23; 26:26-29). A yeke na lege ni pëpe ti pensé so Jésus ayeke sara ye gi ti handa azo si ala bâ so lo yeke tene tënë na mbeni zo nde.

Na ngoi so ambeni disciple ti Jésus use ahunda lo ti wara kota ndo na yâ ti Royaume ti lo, lo kiri tënë: “Ti duti na mbage ti maboko ti mbi ti koli nga na mbage ti maboko ti mbi ti wali, a yeke ti mbi ti mû ni pëpe. Me a yeke ti ala so Babâ ti mbi aleke ni ndali ti ala.” (Matthieu 20:23). Jésus atene mvene lani na ala tongana lo tene so a yeke na ni pëpe ti mû na ala ye so ala hunda? Lo tene mvene pëpe. Me, na tâ be-ti-molenge, lo yeda so gi Nzapa oko la alingbi ti mû mara ti adesizion tongaso. Jésus atene même so ambeni ye ayeke dä so lo wala a-ange ahinga pëpe, me so gi Babâ ti lo oko ahinga ni.​—Marc 13:32.

Nzapa ayeke kota ahon Jésus gi na ngoi so Jésus ayeke lani zo na sese ge? Ên-ën. Même na pekoni so Jésus akui na a zingo lo na kuâ, Bible atene so Nzapa ayeke kota ahon Jésus. Bazengele Paul adabe ti e so “mokonzi ti Christ ayeke Nzapa.” (1 aCorinthien 11:3). Bible atene so na yâ ti ngoi so ayeke ga, “tongana aye kue aga ande na gbe ti lo awe, fade Molenge ni nga ayeke duti na gbe ti Lo so azia aye kue na gbe ti lo Molenge ni, si Nzapa aga aye kue teti zo oko oko kue.”​—1 aCorinthien 15:28.

A yeke polele so Jésus ayeke pëpe Nzapa ti Ngangu Ahon Kue. A yeke ngbanga ni la lo iri Babâ ti lo: “Nzapa ti mbi.”​—Apocalypse 3:2, 12; 2 aCorinthien 1:3, 4.a

[Kete tënë na gbe ni]

[Kete tënë na lembeti 7]

Jésus atene so ambeni ye ayeke dä so lo wala a-ange ahinga pëpe, me so gi Babâ ti lo oko ahinga ni