Yingo vulu: Ngangu so mo yeke na bezoin ni
“TOMBA mbi yongoro na tere ti Mo pëpe; na Mo lungula Yingo Vulu ti Mo na yâ mbi pëpe.” (Psaume 51:13). So ayeke sambela so Gbia David asara na bê ti lo kue na peko ti so lo sara kota siokpari.
Teti angu mingi, David abâ ngangu ti yingo vulu na ndo ti lo. Na ngoi so lo de maseka, yingo vulu amû lege na lo ti kinda Goliath, mbeni ngangu turugu (1 Samuel 17:45-50). Yingo vulu amû nga ngangu na lo ti sû ambeni pendere psaume so mara ni ayeke pëpe. David atene: “Yingo ti L’Éternel asara tënë na yanga ti mbi, Tënë ti Lo ayeke na menga ti mbi.”—2 Samuel 23:2.
Jésus Christ nga asara tënë ti kusala so yingo vulu asara na yâ ti fini ti David. Mbeni lâ, lo tene na azo so ayeke mä lo: “Na lege ti yingo vulu, David wani atene: ‘Jéhovah atene na Seigneur ti mbi: “Mo duti na mbage ti maboko ti mbi ti koli juska mbi zia awato ti mo na gbe ti gere ti mo.” ’ ” (Marc 12:36; Psaume 110:1). Jésus ahinga so a yeke yingo vulu la afa lege na David na ngoi so lo sû psaume ti lo. Oko yingo vulu so ayeke dä laso ti mû maboko na e?
“Ala ngbâ ti hunda ye, na fade a yeke mû ni na ala”
Mo lingbi lâ oko ti sû mbeni psaume pëpe. Me mo lingbi ti tingbi na akpale so amû mbeto mingi tongana ti so Goliath amû mbeto na azo ândö. Bâ tapande ti Isabelle.a Koli ti lo azia lo na ague na peko ti mbeni wali so ade maseka. Lo zia lo na gbâ ti bon na li ti lo, na lo zia nga nginza na lo ti bata na amolenge ti ala ti wali use pëpe. Isabelle atene: “Mbi bâ so lo handa mbi, mbi yeke tongana nyama na lê ti lo. Me ngbene ye so lo zia mbi, mbi bâ so a yeke yingo ti Nzapa si abata mbi.”
Isabelle aku ti wara yingo vulu sân ti sara ngangu? Ên-ën, lo toto lakue na Nzapa ti mû na lo yingo vulu ti lo. Lo hinga so lo yeke na bezoin ti ngangu ti Nzapa ti mû maboko na lo ti luti na gbele ti akpale so alingbi ti si, ti bata amolenge ti lo nzoni, na ti kiri ti wara nengo ti lo ti kozo. Lo sara ye alingbi na tënë ti Jésus so atene: “Ala ngbâ ti hunda ye, na fade a yeke mû ni na ala. Ala ngbâ ti gi ye, na fade ala yeke wara ni. Ala ngbâ ti pika yanga-da, na fade a yeke zi ni na ala.”—Matthieu 7:7.
Robert nga abâ so lo yeke na bezoin ti yingo ti Nzapa, me ndali ti ambeni ye nde. Lo bi tere ti lo ândö na yâ ti nyongo manga na mbangi. Lo tiri ngangu ngu use ti zia lege ni, na lo kiri dä fani mingi. Robert atene: “Tongana mo zia lege ti nyongo mbangi, mo yeke duti gbä, mo yeke bâ pasi. Lâ na lâ nzara ti nyongo ni ayeke sara mo.”
Robert akiri atene: “Me mbi leke na bê ti mbi ti gbian fini ti mbi si mbi sara na Nzapa tongana ti so lo ye. Mbi tara ti yôro na yâ ti li ti mbi gi anzoni tënë so ayeke na yâ ti Bible. Mbi sambela ngangu lakue ti hunda Nzapa ti mû na mbi ngangu ti leke fini ti mbi si alingbi na atënë ti Bible. Mbi hinga so mbi lingbi ti si pëpe na ngangu ti mbi wani. Mbi bâ tongana nyen Jéhovah akiri tënë na sambela ti mbi, mbilimbili na ngoi so bê ti mbi awoko na peko ti so mbi kiri mbi tï na yâ ti nyongo ni. Mbi hinga so yingo vulu ti Nzapa akiri amû na mbi ngangu; sân mungo maboko ti yingo ti lo mbi lingbi fade pëpe ti zia lege ti nyongo manga na mbangi.”—aPhilippien 4:6-8.
Huru “na kpangbi tongana angualo”
Tongana Isabelle na Robert, aTémoin ti Jéhovah kutu mingi abâ ngangu ti yingo vulu ti Nzapa na yâ ti fini ti ala. Jéhovah alingbi ti mû na mo ngangu ti lo so lo yeke sara na kua, ngangu so lo sara na dunia kue, tongana mo ye ti wara ni. Nzapa ayeke nduru nga lo yeke na nzara ti mû yingo ti lo na mo tongana mo hunda ni na lo na bê ti mo kue. Me ti wara yingo so, a lingbi mo manda tâ tënë na ndo ti lo na mo gi ti sara ye so lo ye.—Ésaïe 55:6; aHébreu 11:6.
Na gbe ti ngangu ti yingo vulu, mo lingbi ti wara ngangu ti sara na Nzapa nzoni na ti hon ndo ti akpale kue so alingbi ti si na mo. A yeke tënë so si Bible adë bê ti e na ndo ni atene: “[Jéhovah amû] ngangu na zo so anze; na zo so ayeke na ngangu pëpe, Lo sara si ngangu ti lo awu. . . . Azo so aku L’Éternel, fade ala kiri ala wara ngangu; fade ala ma na nduzu na kpangbi tongana angualo; fade ala kpe, me ala nze pëpe; fade ala tambela, me ngangu ti ala awe pëpe.”—Ésaïe 40:28-31.
[Kete tënë na gbe ni]
a A changé ambeni iri ni.
[Kete tënë na lembeti 8]
‘Mbi sambela ngangu lakue ti hunda Nzapa ti mû na mbi ngangu. Mbi hinga so mbi lingbi ti si pëpe na ngangu ti mbi wani. Mbi bâ tongana nyen Jéhovah amä sambela ti mbi.’
[Encadré/Afoto na lembeti 7]
AKUA SO YINGO VULU ASARA
Nzapa asara kua na yingo vulu ti créé sese na tanga ti aye ti dunia kue. Mbeni wasungo psaume atene: “O L’Éternel, kusala ti Mo ayeke mingi! Na lege ti ndara ti Mo, Mo sara kusala ni kue; sese so asi singo na mosoro ti Mo. Mo to Yingo ti Mo, A créé ala.”—Psaume 104:24, 30; Genèse 1:2; Job 33:4.
Yingo vulu amû ngangu na awakua ti Nzapa ti sû Bible. Bazengele Paul asû na mbeti lo tene: “Atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa, na a yeke nzoni.” (2 Timothée 3:16). Yingo ti Jéhovah akomande bibe ti awasungo Bible, tongaso ala sû “tënë ti Nzapa.”—1 aThessalonicien 2:13.
Yingo vulu amû ngangu na awakua ti Nzapa ti fa tënë ti ye so ayeke si ande tâ na lege ni. Bazengele Pierre atene: “Mbeni prophétie ti Mbeti ti Nzapa alondo pëpe na lege ti fango peko ti ye so mbeni zo afa na li ti lo wani. Teti aprophétie aga lâ oko pëpe na lege ti ye so bê ti zo aye, me azo asara tënë ti ye so alondo na Nzapa tongana yingo vulu afa lege ni na ala.”—2 Pierre 1:20, 21; Joël 2:28.
Yingo vulu amû maboko na Jésus nga na ambeni koli so ayeke na mabe ti fa nzoni tënë ti Royaume ti Nzapa na ti sara amiracle. Jésus atene: “Yingo ti Jéhovah ayeke na ndo ti mbi, ngbanga ti so lo soro mbi ti fa nzoni tënë na awayere. Lo tokua mbi ti fa na azo so a mû ala na ngbâa tënë ti zingo ala, ti fa na awaziba so ala yeke kiri ande ti bâ ndo.”—Luc 4:18; Matthieu 12:28.
[Encadré/Afoto na lembeti 9]
AYE SO YINGO VULU ALINGBI TI MÛ MABOKO NA E TI SARA
Yingo vulu alingbi ti mû ngangu na mo ti luti na lê ti tara na ti hon ndo ti asioni sarango ye. Bazengele Paul atene: “Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä, me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.”—1 aCorinthien 10:13.
Yingo vulu alingbi ti mû maboko na mo ti duti na asarango ye so amû ngia na Nzapa. “Lengo ti yingo ayeke ndoye, ngia, siriri, kangango bê ti ku, sarango nzoni na zo, bê so aye gi ti sara nzoni na zo, mabe, sarango ye na ngangu pëpe, kangango nzara ti bê.”—aGalate 5:22, 23.
Yingo vulu alingbi ti kpengba mo ti gbu ngangu na yâ ti akpale. “Mbi wara ngangu ti sara aye kue ndali ti lo so lo mû ngangu ni na mbi.”—aPhilippien 4:13.