Omene mvene ni: Nzapa ayeda ti tene a voro lo na lege ti a-image na ayanda
Tënë so abâ gigi tongana nyen? Mbeni kota bakari atene: “Akozo Chrétien avoro ti ala Nzapa na lege ti a-image pëpe . . . A yeke na popo ti ngu 300 ti si na ngu 400 si Eglize ayeda ti tene azo avoro Nzapa na lege ti a-image. A tene so vorongo Nzapa na lege ti a-image ayeke mû maboko na azo so ahinga ndo pëpe ti hinga ye na ndo ti vorongo ti aChrétien ahon senge fango tënë ti Nzapa nga na dikongo abuku.”—Cyclopedia of Biblical, Theological, and Ecclesiastical Literature, ti McClintock na Strong, Mbage 4 ni, lembeti 503 na 504.
Bible atene ti lo nyen? “A lingbi mo sara mbeni yanda so a leke na kode teti mo mveni pëpe, wala mbeni ye so akpa ye ti yayu na nduzu, wala a kpa ye ti sese na gbe ti yayu, wala a kpa ye ti ngu na gbe ti sese; a lingbi mo zuku tere ti mo na gbele ye tongaso pëpe, na mo sambela ala pëpe.” (Exode 20:4, 5). Bazengele Jean asû mbeti na akozo Chrétien, lo tene: “Amolenge so mbi ndoye ala mingi, ala kpe lege ti ayanda.”—1 Jean 5:21.
Tongana ti so Eglize atene, a-image ayeke gi ambeni ye so ayeke mû maboko na azo ti ga nduru na Nzapa nga ti ne azo so image ni aduti fä ti ala? Mbeni kota bakari (The Encyclopedia of Religion) atene: “Kozoni kue, a-image ayeke tongana ye ti fango na ye na zo nga aye ti sarango na pendere ti yâ ti da; mingi ni, tënë so azo ti sarango kua na ni ayeke tene ka la. Me hio tongaso, a-image ni aga aye so a yeke mû ni tongana ye ti vorongo ni. Tënë so ayeke tâ tënë, mbilimbili na ndo ti a-image so ayeke kota ye mingi na yâ ti Eglize Orthodoxe.” Ye oko, a yeke na lege ni so prophète Ésaïe ahunda ndo, lo tene: “I bâ Nzapa alingbi na zo wa, wala i bâ image ti nyen si a lingbi na Lo?”—Ésaïe 40:18.
Bâ nga aversê so: Ésaïe 44:13-19; Kusala 10:25, 26; 17:29; 2 aCorinthien 5:7
TÂ TËNË NI AYEKE SO:
Nzapa ake ti tene a voro lo na lege ti a-image na ayanda
KE ATËNË TI MVENE, HULE GI NA TÂ TËNË
So e bâ atënë ti mvene so a ngbâ lakue ti fa ni na yâ ti a-eglize mingi, e lingbi ti tene nyen? E lingbi ti tene so “ambaï ti mvene so a leke pekoni na kode” alingbi tere kete pëpe na atâ tënë so ayeke na yâ ti Bible, so akpengba pëpe nga ayeke dë bê ti zo.—2 Pierre 1:16.
Ni la, ahon ti luti gi na ndo ti ye so mo hinga, duti nduru ti haka ye so a fa na mo na ye so ayeke na yâ ti Mbeti ti Nzapa, lingu ti tâ tënë (Jean 17:17). Tongana mo sara tongaso, mo yeke bâ ande so tënë so ayeke tâ tënë: ‘Mo yeke hinga ande tâ tënë, na tâ tënë ayeke zi mo.’—Jean 8:32.
[Lingu ti foto na lembeti 9]
Pictorial Archive (Near Eastern History) Est