Messie ni! Lo so na lege ti lo Nzapa ayeke sö azo
“Legeoko tongana ti so na yâ ti Adam ala kue akui, tongaso nga na yâ ti Christ ala kue ayeke wara fini.”—1 ACOR. 15:22.
1, 2. (a) André na Philippe asara ye tongana nyen na ngoi so ala tingbi na Jésus? (b) Ngbanga ti nyen e tene so aye so afa na e so Jésus ayeke Messie ayeke mingi ahon ti adisciple ti lo ti ândö?
“E WARA Messie ni awe!” So ayeke tënë so André atene na ita ti lo Pierre, ndali ti so lo mä na bê so Jésus ti Nazareth ayeke lo so Nzapa asoro lo. Philippe nga amä na bê tongaso, na lo gi kamarade ti lo Nathanaël si lo tene na lo: “E wara lo so Moïse asara tënë ti lo na yâ ti Ndia so awe, nga so ambeti ti aProphète asara tënë ti lo: A yeke Jésus, molenge ti Joseph, zo ti kodoro ti Nazareth.”—Jean 1:40, 41, 45.
2 Mo mä na bê biani so Jésus ayeke Messie ni so a mû zendo ti lo, lo so Jéhovah amû lo tongana “Kota Mokonzi ti salut”? (aHéb. 2:10). Laso, aye so afa na e biani so Jésus ayeke Messie ni ayeke mingi ahon ti adisciple ti lo ti ândö. A yeke wara na yâ ti Bible atënë mingi na ndo ti Jésus, ti londo na ngoi so a dü lo ti si na ngoi so a zingo lo na kuâ, na aye so afa biani so lo yeke Christ. (Diko Jean 20:30, 31.) Bible afa nga so atâa so Jésus ayeke na yayu, lo yeke ngbâ ti sara kusala ti lo tongana Messie ni. (Jean 6:40; diko 1 aCorinthien 15:22.) Grâce na aye so mo manda na yâ ti Bible, laso, mo nga kue mo lingbi ti tene so mo “wara Messie ni awe!” Me kozoni kue, zia e bâ aye so amû lege na akozo disciple so ti tene biani so ala wara Messie ni awe.
Kete na kete, Nzapa afa nda ti ‘tënë so lo honde nda ni’
3, 4. (a) Nyen la amû lege na adisciple ti ândö ti “wara Messie ni”? (b) Ngbanga ti nyen mo yeke tene so gi Jésus oko la si aprophétie kue so asara tënë ti Messie ni aga tâ tënë na ndo ti lo?
3 Nyen la amû lege na adisciple ti ândö ti tene biani so Jésus ayeke Messie ni? Na lege ti aprophète, Jéhovah afa kete na kete aye so ayeke mû lege na azo ti hinga Messie ni. Mbeni wandara atene so kode so Jéhovah afa na aye ni kete na kete so ayeke tongana ti so a mû akete kete mbage ti mbeni statue a tingbi ni na tere ti mba ti tene a kiri a ga statue ni. Zia e mû mbeni tapande: Gbâ ti akoli so lâ oko ala sara lisoro na popo ti ala pëpe abungbi ndo oko na yâ ti mbeni da, na zo oko oko asigigi na ye ti tere ti mbeni statue. Tongana a tingbi aye ti tere ti statue so, na a sigigi tâ statue ti mbeni zo, nyen na nyen mo yeke tene so mbeni zo la akungbi yâ ti statue so na lo tokua akete kete mbage ni na akoli so. Legeoko tongana akete kete ye ti tere ti statue so, prophétie oko oko kue so asara tënë ti Messie ni ayeke mbeni kpengba ye so ayeke mû lege na azo ti hinga mbeni ye na ndo ti lo.
4 Ti mo, aprophétie kue so asara tënë ti Messie alingbi ti ga tâ tënë gi tongaso na ndo ti mbeni zo? Mbeni wandara atene so “a yeke tâ ngangu ti tene aprophétie so asara tënë ti Messie aga tâ tënë gi tongaso na ndo ti mbeni zo.” Tongaso, wandara so ayeke na raison ti tene so “na yâ ti mbaï kue ti azo, gi Jésus oko la si aprophétie kue so asara tënë ti Messie ni aga tâ tënë na ndo ti lo.”
5, 6. (a) A yeke sara ye alingbi na ngbanga so a fâ na ndo ti Satan so tongana nyen? (b) Na lege wa Nzapa afa kete na kete azo so ngongoa ni ayeke bâ gigi na lege ti ala?
5 Ngbongboro tënë ti aprophétie so andu Messie ayeke mbeni “tënë so Nzapa ahonde nda ni”, so yâ ni awu mingi nga a yeke mbeni kota tënë so abâ dunia kue (aCol. 1:26, 27; Gen. 3:15). Na yâ ti tënë ni so Nzapa ahonde nda ni so, a yeke wara ngbanga so a fâ na ndo ti Satan Zabolo, “ngbo ti giriri,” so agboto kamba ti siokpari na kuâ aga na ni na ndo ti azo (Apoc. 12:9). A yeke sara ye alingbi na ngbanga so tongana nyen? Jéhovah afa kozoni awe so fade mbeni “hale” wala ngongoa so mbeni “wali” ayeke dü lo ayeke zia kä na li ti Satan. Ngongoa ni so ayeke neka ande li ti ngbo ni, lo yeke zi biani biani ye so asara si kengo yanga, kobela nga na kuâ abâ gigi. Ye oko, Nzapa ayeke zia si Satan azia kä kozoni na ndagere ti ngongoa ti wali ni si.
6 Kete na kete, Jéhovah afa zo so ayeke duti ngongoa so a sara tënë ti lo. Nzapa adeba na Abraham, lo tene: “Na yâ ahale ti mo fade amara kue ti sese awara tënë nzoni.” (Gen. 22:18). Moïse atene ti lo so fade ngongoa ni so ayeke duti mbeni “Prophète” so ayeke kota ahon ni Moïse ni (Deut. 18:18, 19). A fa na David so fade Messie ni ayeke duti mbeni hale ti lo nga fade lo yeke wara mbata ti Gbia David ni teti lakue lakue; na pekoni, aprophète nga afa ye ni tongaso.—2 Sam. 7:12, 16; Jér. 23:5, 6.
Ambilimbili ye so afa so Jésus ayeke Messie ni
7. Na lege wa Jésus abâ gigi na lege ti “wali” ti Nzapa?
7 Bungbi ti Nzapa so a yeke wara na yâ ni anzoni ange ayeke tongana wali ti lo. Na yâ ti bungbi so, Nzapa asoro Molenge ti lo so ayeke kozo création ti lo, na lo tokua lo na sese tongana “hale” wala ngongoa so a sara tënë ti Lo. Ye so ahunda ti tene oko Molenge ti Nzapa ‘adö aye ti lo kue lo zia,’ so ti tene lo zia fini ti lo ti yayu si a dü lo tongana zo so alingbi kue na sese ge (aPhil. 2:5-7; Jean 1:14). Teti so yingo vulu ayeke ‘duti na ndo’ ti Marie, ye so ayeke sara si Molenge so lo yeke dü lo ‘ayeke duti ande nzoni-kue, na a yeke iri lo Molenge ti Nzapa.’—Luc 1:35.
8. Na lege wa Jésus asara si aprophétie so asara tënë ti Messie ni aga tâ tënë na ngoi so lo si na Jean ti wara batême?
8 Aprophétie so asara tënë ti Messie ni afa lani ndo so a yeke dü Jésus dä nga ngoi so lo yeke bâ gigi. A dü Jésus na Bethléhem tongana ti so a fa kozoni (Mi. 5:1). Na ngoi ni kâ, lê ti aJuif ayeke lani gi na lege ti ku gango ti Messie ni. Ni la, ala yeke hunda tere ti ala na ndo ti Jean-Baptiste, ala tene: “Âmanke Christ ni la pëpe?” Me Jean akiri tënë na ala, lo tene: “Lo so ayeke ga na peko ti mbi ayeke ngangu ahon mbi.” (Luc 3:15, 16). Na ngoi so Jésus ayeke na ngu 30 si lo ga na Jean na hunzingo ti ngu 29 ti wara batême, Jésus afa tere ti lo tongana Messie ni na mbilimbili ngoi ni (Dan. 9:25). Na pekoni, lo to nda ti kpengba kusala ti lo, lo tene: “Ngoi so a diko ni alingbi awe, na royaume ti Nzapa aga nduru awe.”—Marc 1:14, 15.
9. Atâa so adisciple ti Jésus ahinga anzene nzene ye kue pëpe, ala hinga biani so Jésus ayeke zo wa?
9 Ye oko, a hunda ti tene a leke bango ndo ti azo na ndo ti ye so ala ku na mbage ti Messie ni. So ala yamba Jésus tongana Gbia ayeke tâ na lege ni; me na ngoi ni so, ala hinga nzoni pëpe so ngoi ti komandema ti lo ni ade, nga ala hinga nzoni pëpe so fade lo yeke komande na yayu (Jean 12:12-16; 16:12, 13; Kus. 2:32-36). Atâa so kue, na ngoi so Jésus ahunda ndo atene: “Ala tene mbi yeke zo wa?” Pierre angbâ akiri tënë atene: “Mo yeke Christ, Molenge ti Nzapa so ayeke na fini.” (Mat. 16:13-16). A yeke oko lege so Pierre akiri na tënë na ngoi so gbâ ti adisciple azia Jésus ndali ti so ala gbu nda ti mbeni fango ye ti lo pëpe.—Diko Jean 6:68, 69.
Mango Messie ni
10. Ngbanga ti nyen Jéhovah afa so a yeke kota ye ti tene azo amä Molenge ti lo?
10 Na yayu, oko Molenge ti Nzapa ayeke mbeni créature ti yingo so ayeke ngangu mingi. Na ndo ti sese, Jésus ayeke lani “zo so aga na iri ti Babâ” ti lo (Jean 16:27, 28). Lo tene: “Ye so mbi fa ayeke ti mbi pëpe, me a yeke ti lo so atokua mbi.” (Jean 7:16). Na ngoi so tere ti Jésus agbian, Jéhovah afa so Jésus ayeke biani Messie ni, na pekoni lo mû yanga, lo tene: “Ala mä lo.” (Luc 9:35). A hunda ti mä lo so Nzapa asoro lo. Ye so ahunda ti tene mo duti na mabe nga mo sara anzoni kusala: aye use so ayeke akota ye so ayeke sara si mo nzere na lê ti Nzapa nga mo wara fini ti lakue lakue.—Jean 3:16, 35, 36.
11, 12. (a) Araison wa apusu aJuif ti ngoi ti Jésus ti ke ti bâ lo tongana Messie ni? (b) Azo wa la amä na bê na Jésus?
11 Atâa so aye mingi afa so Jésus ayeke biani Messie, mingi ti aJuif ti ngoi ti lo ayamba lo tongana Messie ni pëpe. Ndali ti nyen? Ndali ti so ala yeke na abibe ti ala wani na ndo ti Messie ni; mbeni oko ayeke so ala bâ ti ala atene Messie ni ayeke duti ande mbeni kota zo ti poroso so ayeke zi ala na gbe ti ngbâa ti aRomain. (Diko Jean 12:34.) Ni la, a yeke lani ngangu na ala ti yeda na Messie ni so aprophétie aga tâ tënë na ndo ti lo: aprophétie tongana ti so atene fade azo ake lo, ala yeke zia lo, lo yeke bâ pasi, lo yeke hinga kobela nga na nda ni a yeke fâ lo (És. 53:3, 5). Même ambeni disciple ti Jésus so ayeke be-ta-zo na lo, bê ti ala anze ndali ti so lo zi aJuif pëpe na gbe ti ngbâa ti aRomain. Atâa so kue, ala ngbâ be-ta-zo, na a si na mbeni ngoi, a mû lege na ala ti gbu nda ti tënë so nzoni.—Luc 24:21.
12 Mbeni raison so asara si azo ake ti bâ Jésus tongana Messie ni ayeke afango ye ti lo, so ayeke ngangu na azo mingi ti yeda na ni. Lo fa so ti lï na yâ ti Royaume, a lingbi zo ‘ake tere ti lo wani’, lo ‘te’ nyama ti tere ti ni Jésus na lo nyon mênë ti ni, ‘a kiri a dü lo mbeni’ nga lo duti “ti dunia so pëpe”. (Marc 8:34; Jean 3:3; 6:53; 17:14, 16). Azo ti baba, awamosoro nga na azo so ayeke sara ye ti handa gi lê ti azo abâ so a yeke ngangu na ala ti sara tongaso. Ye oko, aJuif so ayeke na tâ be-ti-molenge ayeda na Jésus tongana Messie ni; a yeke nga ye so ambeni zo ti Samarie asara tongana ala tene so “koli so ayeke biani sauveur ti dunia so.”—Jean 4:25, 26, 41, 42; 7:31.
13. Na lege wa a mboko ndagere ti Jésus?
13 Jésus afa kozoni so fade aprêtre-mokonzi ayeke fâ ngbanga na li ti lo nga azo ti amara ayeke kanga lo na ndo ti keke si lo kui, me na ota lango ni, lo yeke zingo (Mat. 20:17-19). So na gbele Sanhédrin lo yeda so lo yeke “Christ, Molenge ti Nzapa”, a bâ tënë ni so tongana zongango Nzapa (Mat. 26:63-66). Pilate abâ so Jésus asara “pëpe mbeni ye so alingbi na kuâ”; me teti so aJuif abi nga tënë na li ti lo atene lo yeke zo ti pusungo azo ti ke yanga ti ngorogbia, Pilate “amû na ala Jésus ti tene ala sara ye ti bê ti ala na lo.” (Luc 23:13-15, 25). A yeke tongaso si ala “bere . . . Kota Mokonzi so azi lege ti fini” nga ala leke ti fâ lo, atâa so aye mingi afa so Nzapa la atokua lo (Kus. 3:13-15). “A lungula” Messie ni tongana ti so a fa ni kozo awe na lege so a kanga lo na ndo ti keke na lango ti Pâque ti ngu 33 (Dan. 9:26, 27; Kus. 2:22, 23). A yeke na lege ti sioni kuâ so si a mboko “ndagere” ti Jésus tongana ti so a fa ni kozo awe na Genèse 3:15.
Ngbanga ti nyen a lingbi Messie ni akui?
14, 15. (a) Jéhovah azia si Jésus akui ndali ti akota raison use. A yeke so wa? (b) Jésus asara nyen na pekoni so a zingo lo na kuâ?
14 Jéhovah azia si Jésus akui ndali ti akota raison use. Kozoni, Jésus angbâ be-ta-zo juska na kuâ, na ye so amû lege ti leke mbeni kpengba tënë so ayeke mbage ti tënë so “Nzapa ahonde nda ni” so. Lo fa tâ biani so mbeni zo so alingbi kue alingbi ti ‘gbu tënë ti Nzapa ngangu’ nga lo lingbi ti mû komandema ti Nzapa na nduzu atâa so Satan asara si lo wara angangu tara so ahon atanga ni kue (1 Tim. 3:16). Use ni, tongana ti so Jésus atene, ‘Molenge ti zo aga ti mû âme ti lo tongana ngere so a futa ti zi na azo mingi.’ (Mat. 20:28). “Ngere so alingbi na ni” so amû lege ti futa ye ndali ti ngbanga ti siokpari so atï na ndo ti ahale ti Adam; nga, a sara si lege ayeke dä ti tene a mû fini ti lakue lakue na azo kue so ayeda so Jésus ayeke lo so na lege ti lo Nzapa ayeke sö azo.—1 Tim. 2:5, 6.
15 Na peko ti lango ota so Christ asara na yâ ti dû ti kuâ, a zingo lo, nga teti lango 40, lo fa tere ti lo na adisciple ti lo ti fa so lo yeke na fini na lo fa na ala ambeni ye ti sarango ni (Kus. 1:3-5). Na pekoni, lo kiri na yayu ti fa na Jéhovah ngere ti fini ti lo so lo mû na sandaga nga lo ku tongo nda ti ngoi so a fa ni awe ti tene lo si na lo duti dä tongana Gbia ti Royaume ti Nzapa. Kozo ti si na ngoi ni so, lo yeke lani na akusala mingi ti sarango ni.
Hunzingo kusala ti lo tongana Messie
16, 17. Fa akusala so Jésus ayeke sara tongana Messie ngbene ye so lo kiri na yayu.
16 Na yâ ti angu mingi so aga na peko ti so a zingo Jésus na kuâ, lo ngbâ ti bâ ndo nzoni na ndo ti akusala ti congrégation ti aChrétien so lo lë gbia na ndo ni awe (aCol. 1:13). Tongana ngoi so a fa ni alingbi lani awe, lo to nda ti komande tongana Gbia ti Royaume ti Nzapa. Aprophétie ti Bible nga na aye so ayeke si na ndo ti dunia afa so ngoi so Jésus asi na lo yeke dä tongana Gbia ato nda ni na ngu 1914; a yeke nga na ngoi ni so si “ngoi so aye ti ngoi so ayeke gue ti hunzi” ato nda ni (Mat. 24:3; Apoc. 11:15). Kete na peko ti ye so, Jésus na a-ange so lo yeke na ndo ti ala atomba Satan na asioni yingo ti lo na yayu.—Apoc. 12:7-10.
17 Kua ti fango tënë na ti fango ye so Jésus ato nda ni ândö na ngu 29 aga nduru ti hunzi awe. Na yâ ti kete ngoi, Jésus ayeke fâ ngbanga ti azo kue. Fade lo yeke tene na azo so ayeke tongana angasangbaga, so abâ lo tongana zo so na lege ti lo Jéhovah ayeke sö azo, ti “wara royaume so a leke ni teti ala ngbene ye so a zia gere ti dunia”. (Mat. 25:31-34, 41). Azo so ake ti bâ Jésus tongana Gbia ayeke wara ande futingo na ngoi so lo na aturugu ti yayu ayeke ga ti zi aye ti sioni kue. Na pekoni, lo yeke kanga Satan na lo yeke bi lo na asioni yingo ti lo na yâ ti “kota dû so alï mingi”.—Apoc. 19:11-14; 20:1-3.
18, 19. Akusala wa Jésus ayeke sara ande tongana Messie ni? Aye ti nzoni wa azo so amä yanga ayeke wara ande na pekoni?
18 Na ngoi ti Komandema ti Ngu Saki Oko ti Jésus, lo yeke sara ande ye alingbi na airi kue so a mû na lo, airi tongana “Lo Ti Kpene, Wawango, Nzapa Ti Ngangu, Babâ Ti Lakue Lakue, Mokonzi Ti Siriri.” (És. 9:5, 6). Na gbe ti komandema ti lo, azo ayeke kiri ande ti lingbi kue, même azo so azingo na kuâ (Jean 5:26-29). Messie ni ayeke fa ande lege na azo so ayeda si ala wara “ali ti ngu so ayeke mû fini na zo.” Ye so ayeke mû lege na azo so amä yanga ti duti na nzoni songo na Jéhovah. (Diko Apocalypse 7:16, 17.) Na peko ti ndangba tara, azo kue so asara kpengba-li, so Satan na asioni yingo ti lo ayeke na popo ti ala, fade “a bi [ala] na yâ ti lac ti wâ”; so ayeke nekango li ti “ngbo” ni la.—Apoc. 20:10.
19 Biani, lege so Jésus ayeke sara kua ti lo tongana Messie ayeke tâ pendere mingi nga sioni oko ayeke dä pëpe. Fade azo so a zi ala na gbe ti siokpari nga na kuâ awe ayeke si ndo ti sese so aga paradis, na ala yeke ngbâ na fini teti lakue lakue na nzoni seni nga na ngia. Na ngoi ni so, iri ti Jéhovah so a buba ni ayeke ga tâ nzoni-kue nga azo kue ayeke hinga biani so lo la lo yeke Kota Gbia ti Dunia Kue. So tâ pendere ye si ayeke ku azo kue so amä yanga ti lo so Nzapa asoro lo tongana Messie ni!
Mo wara Messie ni awe?
20, 21. Ngbanga ti nyen a lingbi mo sara tënë ti Messie ni na azo?
20 A yeke ngbene ye na ngu 1914 la e yeke na yâ ti parousia ti Christ, wala ngoi so lo si awe na lo yeke dä. Atâa so zo alingbi pëpe ti bâ na lê ti lo so Jésus asi awe na lo yeke dä tongana Gbia ti Royaume ti Nzapa, aprophétie ti Bible so ayeke ga tâ tënë afa ni polele (Apoc. 6:2-8). Atâa so kue, legeoko tongana aJuif ti ngoi ti Jésus, mingi ti azo laso ake ti yeda na aye so afa biani so Messie ni asi awe na lo yeke dä. Azo so nga kue aye ti wara mbeni kota zo ti poroso ti duti messie ti ala, wala ala ye mbeni messie so ayeke sara kua na lege ti akota zo ti poroso. Me ti mo, mo hinga awe so Jésus ayeke komande fadeso tongana Gbia ti Royaume ti Nzapa. Kite ayeke dä pëpe so tere ti mo anzere mingi ti hinga ni! Tongana ti akozo disciple, bê ti mo apusu mo ti to mbela tongaso: “E wara Messie ni awe!”
21 Laso, tongana mo yeke fa tâ tënë na azo, mo yeke luti mingi na ndo ti kusala so Jésus ayeke sara tongana Messie ni? Sarango tongaso ayeke sara si mo bâ na nene ni aye so lo sara ndali ti mo awe, aye so lo yeke sara ni fadeso nga na aye so lo yeke sara ande. Tongana André na Philippe, kite ayeke dä pëpe so mo yeke sara tënë ti Messie ni na afami ti mo nga na akamarade ti mo. Zia si na yapungo tere, mo kiri mo ga nduru na ala na mo fa na ala so Jésus Christ ayeke biani Messie so a sara tënë ti lo, lo so na lege ti lo Nzapa ayeke sö azo!
Mo lingbi ti fa nda ni?
• Akozo disciple ayeke hinga lani Messie ni tongana nyen?
• Ndali ti akota raison use wa Jésus akui?
• Akusala wa Jésus ayeke sara ande tongana Messie ni?