Jésus: lege so lo sara ye na fini ti lo

“Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.”​—JEAN 4:34.

YE SO asi si apusu Jésus ti tene atënë so na nduzu ge afa ye mingi na ndo ti aye so agbu bê ti lo mingi na yâ ti fini ti lo. Jésus na adisciple ti lo alondo ti tambela na yâ ti ahoto ti Samarie na ndapre ni kue (Jean 4:6). Tongana adisciple ti lo apensé so nzara ahon ndo ti lo na ngoi ni so, ala mû na lo kobe (Jean 4:31-33). Na yâ ti tënë so lo tene na ala, lo fa na nduru tënë ye so lo ye ti sara na yâ ti fini ti lo. Ti lo, sarango kusala ti Nzapa ayeke kota mingi ahon tengo kobe. Atâa na lege ti tënë ti yanga ti Jésus wala aye so lo sara, lo fa so lo mû fini ti lo kue ti sara aye so Nzapa aye ti tene lo sara. A yeke aye wa?

▪ Fango tënë ti Royaume ti Nzapa nga fango ye na azo na ndo ni. Bible asara tënë ti kusala so Jésus asara na yâ ti fini ti lo atene: “Jésus atambela na sese ti Galilée kue. Lo fa ye . . . nga lo fa nzoni tënë ti royaume.” (Matthieu 4:23). Jésus afa gi tënë ti Royaume ti Nzapa na azo pëpe. Lo fa nga na ala Royaume ni ayeke nyen, lo hasa yâ ti tënë ni na ala nga lo ga na ala ti yeda na tënë ni na lege ti aye so lo fa na ala. Mama-tene ti fango ye ti Jésus ayeke Royaume.

Na ngoi ti kusala ti Jésus, lo fa na azo so ayeke mä lo ye so a iri ni Royaume ti Nzapa nga ye so Royaume ni ayeke sara ande. Bâ atâ tënë so andu Royaume nga na aversê so afa na e atënë ti Jésus na ndo ni.

▪ Royaume ti Nzapa ayeke mbeni ngorogbia ti yayu. Jésus la Jéhovah azia lo Gbia ti Royaume ni.​—MATTHIEU 4:17; JEAN 18:36.

▪ Royaume ni ayeke sara si iri ti Nzapa aga nzoni-kue nga ayeke sara si a sara ye so bê ti Nzapa aye na ndo ti sese tongana ti so a sara na yayu.​—MATTHIEU 6:9, 10.

▪ Na gbe ti Royaume ti Nzapa, sese kue ayeke ga paradis.​—LUC 23:42, 43.

▪ Na yâ ti kete ngoi Royaume ti Nzapa ayeke ga nga ayeke sara si ye so bê ti Nzapa aye ndali ti sese aga tâ tënë.a​—MATTHIEU 24:3, 7-12.

▪ Sarango amiracle. A hinga Jésus kozoni kue tongana “Wafango ye”. (Jean 13:13). Me na yâ ti ngu ota na ndambo ti kusala ti lo, lo sara nga gbâ ti amiracle. Lo sara amiracle so ndali ti aye use. Kozoni, amiracle so afa biani so Nzapa la atokua lo (Matthieu 11:2-6). Use ni, amiracle so afa gi kete yanga ti ye so lo yeke sara tongana Gbia ti Royaume ti Nzapa na ndo ti sese kue na yâ ti ngoi so ayeke ga. Bâ ambeni miracle so lo sara lani.

▪ Lo kaï kota mapo ti ngu-ingo nga lo kaï akota pupu.​—MARC 4:39-41.

▪ Lo sava azo ti kobela so na popo ni a yeke wara awaziba, azo so mê ti ala akanga nga na azo so gere ti ala abuba.​—LUC 7:21, 22.

▪ Lo sara si kobe aga gbani na gbâ ti azo ate yâ ti ala asi.​—MATTHIEU 14:17-21; 15:34-38.

▪ Fani ota, lo zingo azo na kuâ.​—LUC 7:11-15; 8:41-55; JEAN 11:38-44.

Bâ tongana nyen fini ayeke duti na ndo ti sese na gbe ti komandema ti ngangu Gbia tongaso!

▪ Fango na gigi sarango ye ti tere ti Jéhovah Nzapa. Na ndo ti tënë ti fango ye na azo na ndo ti Jéhovah, mbeni zo ti lingbi na Molenge ti Nzapa wani ayeke dä pëpe, lo so azo ahinga lo na iri ti Jésus Christ. Teti so Jésus ayeke “kozo ye na popo ti aye kue so Nzapa asara”, lo ninga na tere ti Jéhovah na yayu ahon tanga ti a-ange kue (aColossien 1:15). Gbu li na ndo ti kota pasa so lo yeke na ni ti hinga abibe ti Babâ ti lo, ye so bê ti lo aye, asarango ye so lo yeda na ni nga na alege ti lo.

A yeke na lege ni so Jésus atene: “Mbeni zo ti hinga Molenge ni ayeke pëpe, gi Babâ ni. Nga, mbeni zo ti hinga Babâ ni ayeke pëpe, gi Molenge ni nga na zo kue so Molenge ni aye ti fa Babâ ni na lo.” (Luc 10:22). Na ngoi so Jésus ayeke na ndo ti sese ge, lo ye mingi ti fa na azo asarango ye ti tere ti Babâ ti lo. Aye so Jésus afa ayeke aye so lo bâ Nzapa na sarango ni na yayu na ngoi so lo yeke na tere ti Nzapa, Lo ti Ngangu Ahon Kue.​—Jean 8:28.

Na ngoi so Jésus ayeke na sese ge, aye so lo manda na ndo ti Babâ ti lo na yayu lo fa ni na azo na mbeni lege so azo so asara tere ti ala kete alingbi ti gbu ndani hio nga ti sara ye alingbi na ni.

Zia e bâ akpengba lege use so Jésus asara na kusala ti fa ye na ndo ti Babâ ti lo.

▪ Na yâ ti fango ye ti Jésus, lo sara si azo ahinga tâ tënë na ndo ti Jéhovah. Tâ tënë na ndo ti iri ti lo, ye so lo leke ti sara nga na alege ti lo.​—JEAN 3:16; 17:6, 26.

▪ Na lege ti asarango ye ti Jésus, lo fa na gigi gbâ ti apendere sarango ye ti tere ti Jéhovah. Jésus asara ye tâ gi tongana ti Babâ ti lo, ni la lo tene: ‘Tongana ala ye ti hinga sarango ye ti Babâ ti mbi, ala bâ gi mbi.’​—JEAN 5:19; 14:9.

Lege so Jésus asara ye na fini ti lo adö bê ti e mingi. E lingbi ti wara aye ti nzoni mingi na pekoni tongana e gi ti hinga ndani so lo kui nga tongana e sara ye alingbi na ye so e manda.

[Kete tënë na gbe ni]