A yeke nzoni ti fa ye na amolenge na ndo ti Nzapa?

JONATHAN SWIFT, mbeni wasungo mbeti, atene: “Bungbi ti vorongo Nzapa ayeke pusu e azo gi ti ke amba ti e, me pëpe ti ye ala.”

SWIFT atene atënë so ahon ngu ngbangbo use awe, me azo mingi laso ayeda na tënë so. Ambeni apensé so ababâ na amama ayeke pëpe na droit ti fa tënë ti Nzapa na amolenge ti ala. Ti ala, amolenge so a fa ye na ala na ndo ti Nzapa na yâ ti sewa amanke ambeni ye.

Ti mo, na yâ ti atënë so ge, so wa la ayeke nzoni mingi?

● A lingbi a zia lege pëpe na ababâ na amama ti fa tënë ti Nzapa na amolenge ti ala.

● A lingbi ababâ na amama aku amolenge ti ala akono awe si ala fa tënë ti Nzapa na ala.

● Na ngoi so amolenge angbâ kete, a yeke nzoni ababâ na amama afa na ala ye so ala amä na bê na ni. Tongana ala kono awe, a yeke nzoni ala wa ala ti gbu li na ndo ti aye ni so.

● A lingbi amolenge ayeda na aye so ababâ na amama ti ala amä na bê na ni sân ti gi ti hinga wala a yeke tâ tënë wala pëpe.

Bungbi ti vorongo Nzapa ayeke sara sioni na amolenge?

Nzoni babâ wala mama aye sioni ti molenge ti lo pëpe. Me aye so asi afa so tënë so azo atene a lingbi a fa ye na amolenge pëpe na ndo ti Nzapa ayeke tâ tënë? A sara angu mingi awe so awandara agi nda ti aye mingi na ndo ti ngangu so aye so ababâ na amama amä na bê na ni ayeke sara na ndo ti amolenge. Ala bâ nyen?

Ala bâ so bungbi ti vorongo Nzapa ayeke sara sioni pëpe na ndo ti amolenge, me alingbi ti sara nzoni na ndo ti maïngo ti ala. Na ngu 2008, a fa peko ti mbeni gingo nda ti aye na yâ ti mbeni mbeti-sango ti awandaraa, a tene: “Bungbi ti vorongo Nzapa ayeke sara si songo so ayeke na popo ti molenge na babâ na mama ti lo akpengba.” Tondo ni akiri atene: “A bâ so bungbi ti vorongo Nzapa nga na aye so azo ayeke sara ti voro na Nzapa ayeke mbeni kpengba ye na yâ ti fini ti amolenge mingi nga a lingbi a duti dä si nzoni songo aduti na popo ti azo ti yâ ti sewa.” Bâ tongana nyen atënë so ague oko na tënë ti Jésus Christ so: “Ngia ayeke na ala so ahinga so ala yeke na bezoin ti aye ti yingo, teti royaume ti yayu ayeke ti ala.”—Matthieu 5:3.

Ka ti so a tene a lingbi amolenge akono awe si a fa na ala ye na ndo ti Nzapa nga na ndo ti bungbi ti vorongo Nzapa, a yeke tongana nyen? Azo so atene atënë so agirisa so yâ ti li ti mbeni molenge ayeke tongana mbeni seau so yâ ni ayeke senge na so aku ti tene a zia ye na yâ ni. A yeke na ababâ na amama ti mû desizion ti fa na amolenge ti ala nzoni lege ti sarango ye nga na atënë ti mabe so ala bâ ayeke na lege ni wala ti zia si ambeni zo nde si afa ye na amolenge ti ala.

Nzoni ye ti sara ayeke so wa?

Mbaï afa so azo alingbi ti mû atënë ti bungbi ti vorongo Nzapa tongana mbeni raison ti duti na sioni bibe na ndo ti ambeni zo wala ti ke ala. Tongaso, tongana nyen la ababâ na amama alingbi ti sara si ye ni aduti pëpe tongana ti so Jonathan Swift atene so? Tongana nyen la ala lingbi ti fa na amolenge ti ala atënë ti mabe so ayeke mû maboko na ala ti ye azo?

Akiringo tënë na ahundango tënë ota so ge ayeke fa nzoni ye ti sarango ni: (1) Nyen la a lingbi amolenge ahinga na ndo ti Nzapa nyen? (2) A yeke nzoni zo wa la afa ye na ala, zo wa? (3) Anzoni kode ti fango ye ni ayeke so wa?

[Kete tënë na gbe ni]