A tene na mo mvene awe?
TONGANA mbeni zo so mo zia bê ti mo kue na lo atene mvene na mo, a yeke son mo mingi. Kamene alingbi ti sara mo, ngonzo ayeke sara mo na même mo bâ so a handa mo. Mvene ayeke buba yâ ti kamarade nga ayeke sara si yâ ti mariage abuba; a yeke sara si azo agirisa nginza ti ala kutu mingi.
Gbu li kete, bê ti mo ayeke duti tongana nyen tongana mo ga ti hinga so atënë so a tene na mo na ndo ti Nzapa ayeke mvene? Tongana mo mû tere ti mo kue na yâ ti kua ti Nzapa, bê ti mo ayeke son mingi tongana ti ambeni zo so ayeke gue na eglize lakue so afa tënë ti bê ti ala na gbe ni ge:
● “Mbi bâ so eglize ahanda mbi.”—DEANNE.
● “Ngonzo agbu mbi lani. Mbi bâ so a handa mbi, ye so asara si beku ti mbi nga na aye so mbi zia na gbele mbi ti sara aga gi ye senge.”—LUIS.
Peut-être mo pensé so a lingbi ti tene mvene na mo pëpe na ndo ti Nzapa. A yeke peut-être zo so mo zia bê ti mo kue na lo nga so aye lâ oko pëpe ti sara sioni na mo na mbana la afa na mo aye so mo hinga na ndo ti Nzapa. A lingbi ti duti babâ wala mama ti mo, mbeni prêtre wala mbeni pasteur wala mbeni kota kamarade ti mo. Peut-être mbeni tënë ayeke dä so mo mä na bê na ni na yâ ti fini ti mo kue. Me mo yeke ke pëpe so même mbeni tënë so amû ndo mingi alingbi ti duti mvene, ni la ape? Franklin D. Roosevelt, ngbene gbia ti kodoro ti Amerika ahinga so tënë so ayeke tâ tënë. Lo tene: “Kiringo na ndo ti tënë ti mvene fani mingi ayeke sara pëpe si mvene ni aga tâ tënë.”
Mo lingbi ti sara tongana nyen ti hinga wala a tene mvene na mo? Jésus atene na Nzapa na yâ ti sambela lo tene: “Tënë ti mo ayeke tâ tënë.” (Jean 17:17). Biani, na yâ ti Bible so ayeke tënë ti yanga ti Nzapa e yeke wara ye so ayeke mû maboko na e ti hinga tënë so ayeke tâ tënë na tënë so ayeke mvene.
Bâ ye so Bible afa na ndo ti amvene oku so azo ayeke tene ka mingi na ndo ti Nzapa. Mo yeke bâ so tâ tënë alingbi ti changé fini ti mo na asara si aga nzoni ahon ti kozo.