Ti hinga kiringo tënë ni, a yeke kota ye?

“Mbi to nda ti sigi na amolenge-koli na ngu bale-oko. Na tongo nda ni, e yeke gbu maboko ti mba nga e yeke su yanga ti tere. Me hio, e komanse ti ndu ambeni mbage ti tere ti e ti koli na ti wali nga e tara mara ti bungbingo koli na wali ndenge na ndenge. Mbi to nda ti sara kua na ngoi so mbi yeke lani na ngu 15, na akoli ti place ti kua ni aye ti bungbi koli na wali na mbi. Mbi ye ti fa na amba ti mbi ti place ti kua so mbeto asara mbi pëpe ti sara aye kue so ala yeke sara. Mbi ye ti tene akamarade ti mbi aye tënë ti mbi, ye so ague na mbi ti bungbi koli na wali na azo mingi mingi.”​—SARAH,a AUSTRALIE.

BÊ TI mo ayeke dö tongana a tene na mo so Sarah akono na yâ ti sewa so azo ni ayeke voro Nzapa? Babâ na mama ti lo atara lani ti fa na lo ti sara ye alingbi na aye so Bible afa na ndo ti nzoni lege ti sarango ye. Me Sarah asoro ti lo mbeni lege nde.

Azo mingi alingbi ti yeda na ye so Sarah asoro ti sara so. Ala pensé ti ala so ye so Bible afa na ndo ti tënë ti bungbingo koli na wali aga ngbene ye awe. Ambeni zo abâ so tongana ala gbu tënë ti Nzapa ngangu na ala sara ye so bê ti ala aye na ndo ti tënë ti bungbingo koli na wali, a yeke sioni pëpe.

A yeke kota ye ti tene zo ahinga ye so Bible afa na ndo ti tënë ti bungbingo koli na wali nga lo sara ye alingbi na ni? Bible atene so “atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa, na a yeke nzoni ti fa na ye na zo”. (2 Timothée 3:16). Tongana mo yeda so Nzapa la asara azo nga so Bible ayeke tënë ti yanga ti lo, tongaso a yeke kota ye ti hinga ye so Bible atene na ndo ti tënë so.

Mawa ni ayeke so azo mingi ahinga tâ mbilimbili pëpe ye so Bible afa na ndo ti bungbingo koli na wali. Akota zo ti aEglize afa atënë nde nde na ndo ti bungbingo koli na wali na ala tene so afango ye ni so alondo na yâ ti Bible. Ti tâ tënë ni, aEglize mingi amä tere pëpe na ndo ti tënë so.

Ahon ti zia bê ti mo na ndo ti tënë so azo ayeke tene, ngbanga ti nyen mo wani mo mû pëpe ngoi kete ti gi ti hinga ye so Bible atene na ndo ti tënë ti bungbingo koli na wali? Article ti peko ayeke fa bango ndo ti Bible na ndo ti ahundango tënë bale-oko so azo ayeke hunda ka mingi na ndo ti tënë ti bungbingo koli na wali. Na yâ ni mo yeke wara akiringo tënë so ayeke polele so alondo na Bible. Ndangba article ni ayeke fa ngbanga ti nyen aye so e soro ti sara ayeke kota ye.

[Kete tënë na gbe ni]