Ngbanga ti nyen ti sara ye alingbi na afango ye ti Bible?

BANGO ndo ti Bible na ndo ti tënë ti bungbingo koli na wali aga ngbene ye awe na ayeke kanga lege na zo gi senge senge? Ên-ën. Me, a yeke mû maboko na e ti kpe:

▪ Akobela ti koli na wali

▪ Mungo ngo na gigi ti mariage

▪ Avundu so ayeke ga na peko ti mbeni mariage so yâ ni abuba

▪ Mbeni yingo-ti-hinga so ayeke fâ ngbanga na ndo ti mo zo

▪ Kamene so zo ayeke wara ndali ti so azo asara ye ti bê ti ala na lo

Wasarango e, Jéhovah Nzapa,a aye si e wara ngia nga e bâ nzoni na lege ti matabisi so lo mû na e so. Nzapa ayeke “Lo so awa mo si mo ga nzoni”. (Ésaïe 48:17). Mbeni zo so ayeke sara ye alingbi na afango ye ti Bible na ndo ti tënë ti bungbingo koli na wali

▪ ayeke nzere na lê ti Nzapa

▪ ayeke na siriri ti bê

▪ ayeke duti na kpengba songo na azo ti sewa ti lo

▪ ayeke na nzoni iri na gbele azo

▪ ayeke ne tere ti lo wani

Ka tongana mo yeke zo so ayeke sara ye ague oko pëpe na aye so Bible afa na ndo ti nzoni lege ti sarango ye? Lege ayeke dä ti tene mo changé? Nzapa ayeke fâ ngbanga na ndo ti mo ndali ti aye so mo sara ândö?

Gbu li na ndo ti ye so: Na yâ ti congrégation ti akozo Chrétien, a yeke wara lani ambeni zo so ândö ayeke azo ti sarango lango-sioni, azo ti gingo koli wala wali nde, nga na azo so ayeke bungbi na amba ti ala koli wala wali. Ala soro ti changé fini ti ala na ala wara aye ti nzoni mingi na pekoni (1 aCorinthien 6:9-11). Laso, azo saki na saki asara nga tongaso na yâ ti dunia. Ala zia lege ti lango-sioni na ala wara aye ti nzoni so zo ayeke wara na sarango ye ague oko na afango ye ti Bible. Bâ tapande ti Sarah so a sara tënë ti lo na yâ ti kozo article so ahon.

“Hio, mbi wara dengo bê”

Sarah aga ti bâ so ye ti kirikiri so lo sara aga na lo pëpe liberté nga na ngia so lo yeke gi lani. Lo tene: “Mbi bâ lani so yingo-ti-hinga ti mbi akui. Kamene ahon ndo ti mbi lani nga mbi gi bê ti mbi ndali ti so mbi lingbi ti mû ngo wala ti wara mbeni sioni kobela. Mbi hinga lani lakue so Nzapa ayeke dä, nga mbi hinga so aye so mbi sara ason bê ti lo. Mbi bâ so mbi yeke saleté, na mbi duti nzoni pëpe nga kamene ahon ndo ti mbi.”

Na nda ni, Sarah awara ngangu ti changé sarango ye ti lo. Lo gi mungo maboko ti babâ na mama ti lo so ayeke aTémoin ti Jéhovah. Lo hunda nga mungo maboko ti akpengba ancien ti congrégation ti ndo so lo yeke dä. Sarah atene: “Tere ti mbi anzere lani mingi ti bâ nzoni bê nga na ndoye so babâ na mama ti mbi nga na a-ancien ti congrégation afa na mbage ti mbi, a yeke ye so mbi ku tere ti mbi lani na ni pëpe. Hio, mbi wara dengo bê.”

Sarah ayeke fadeso na amolenge use. Lo tene: “Mbi sara tënë polele na amolenge ti mbi na ndo ti aye so mbi soro lani ti sara. Mbi ye si ala hinga tongana nyen kengo ti sara ye ague oko na aye so Nzapa afa na ndo ti nzoni lege ti sarango ye aga lani na mbi vundu. Ye so mbi ye ayeke ti mû maboko na ala ti hinga so tongana zo asara ye alingbi na aye so Nzapa afa na ndo ti tënë ti bungbingo koli na wali, lo yeke wara aye ti nzoni na lege ti mitele, ti bibe, nga lo yeke duti na ngia. Mbi hinga biani so Nzapa afa na e anzoni lege ti sarango ye ndali ti so lo ye si e wara vundu pëpe.”

Mo nga kue mo lingbi ti wara aye ti nzoni so zo ayeke wara na sarango ye ague oko na aye so na ndoye Nzapa ayeke fa na e. Bible amû zendo so: ‘Kpengba-tene ti L’Éternel ayeke mbilimbili, a mû ngia na bê; commandement ti L’Éternel ayeke na sioni oko pëpe, a mû lumière na lê. Zo awara futa nzoni na lege ti bata tënë ni.’—Psaume 19:9, 12.b

[Akete tënë na gbe ni]

[Kete tënë na lembeti 8]

Mingi ni, azo so asara sanka ti aye so Bible afa ayeke wara vundu

[Kete tënë na lembeti 9]

Azo so asara ye ague oko na aye so Bible afa ayeke na nzoni yingo-ti-hinga nga ala yeke na nzoni songo na azo ti sewa ti ala