A yeke kota ye ti hinga akiringo tënë ni?
“Ala yeke hinga ande tâ tënë, na tâ tënë ayeke zi ala.”—JEAN 8:32.
NA YÂ ti Bible e yeke wara atâ tënë so alingbi ti zi e na yâ ti afango ye ti kirikiri wala même ti wataka so a fa na ndo ti Jésus. Ti gi ti hinga wala aye so e mä na bê na ni na ndo ti Jésus ayeke na lege ni wala pëpe ayeke kota ye biani? En, a yeke kota ye. A yeke kota ye na lê ti Jéhovah, a yeke kota ye na lê ti Jésus na a lingbi e nga kue e bâ ni na nene ni.
● A yeke kota ye na lê ti Nzapa ngbanga ti nyen? Ngbanga ti so “Nzapa ayeke ndoye.” (1 Jean 4:8). Jéhovah aye si e duti na ngia lakue lakue. Jésus atene: ‘Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo awara fini ti lakue lakue.’ (Jean 3:16). Jéhovah atokua Molenge ti lo ti sö e si e wara lege ti duti na fini ti lakue lakue na yâ ti Paradis na ndo ti sese, si a gue oko na ye so lo leke lani na tongo nda ni (Genèse 1:28). Nzapa aye mingi ti mû fini ti lakue lakue na azo so amanda tâ tënë na ndo ti Molenge ti lo na so asara ye alingbi na aye so ala manda.—aRomain 6:23.
● A yeke kota ye na lê ti Jésus ngbanga ti nyen? Jésus nga kue aye azo. Lo fa kota ndoye ti lo na lege so lo yeke lani nduru ti mû fini ti lo ndali ti e (Jean 15:13). Lo hinga lani so a yeke gi na lege ti lo si azo alingbi ti wara salut (Jean 14:6). So Jésus aye ti tene azo mingi awara ye ti nzoni na lege ti sandaga ti lo ni so a yeke ye ti dongo bê pëpe. Ndali ni la si lo mû yanga na atâ disciple ti lo ti fa na azo ti dunia kue ye so bê ti Nzapa aye nga na ye so lo leke ti sara.—Matthieu 24:14; 28:19, 20.
● A lingbi e bâ nga ni na nene ni ngbanga ti nyen? Gbu li kete na ndo ti aye so peut-être agbu bê ti mo mingi: seni ti mo na sewa ti mo. Mo yeke na nzara ti duti na nzoni seni, mo na sewa ti mo, nga ti duti na fini so pasi ayeke dä pëpe? Na lege ti Jésus, Jéhovah asara si beku ayeke dä ti tene mo na sewa ti mo awara nzoni seni nga ala duti na fini lakue lakue na yâ ti fini dunia so pasi ayeke duti dä pëpe (Psaume 37:11, 29; Apocalypse 21:3, 4). A nzere na mo ti duti na mara ti ndo tongaso? Tongana a yeke tongaso, a lingbi mo sara mbeni ye.
Kiri mo bâ versê so a fa fade na gbe ti kota li ti tënë ni, so atene: “Ala yeke hinga ande tâ tënë, na tâ tënë ayeke zi ala.” Tâ tënë na ndo ti Jésus nga na ndo ti ye so lo sara na yâ ti gango tâ tënë ti aye so Nzapa aleke ti sara alingbi ti zi e na gbe ti ngbâa ti aye use so ayeke sioni ahon atanga ni kue: siokpari na kuâ. Me ti sigigi na gbe ti aye so, a lingbi mo ‘hinga tâ tënë’. E wa mo ti manda ye mingi na ndo ti tâ tënë so na ti hinga ye so mo na sewa ti mo alingbi ti sara ti wara ye ti nzoni dä. A-Témoin ti Jéhovah ayeke duti ande na ngia ti mû maboko na mo.