Zia kusala ti Jéhovah na kozo ndo

“Fade yanga ti mbi asara tënë ti mbilimbili ti Mo, na ti salut ti Mo, lâ na lâ.”​—PS. 71:15.

MO YEKE KIRI TËNË TONGANA NYEN?

Ngbanga ti nyen Noé, Moïse, Jérémie, nga na Paul azia Jéhovah na kozo ndo na yâ ti fini ti ala?

Nyen la ayeke mû maboko na mo ti soro ye so a lingbi mo sara na yâ ti gigi ti mo?

Ngbanga ti nyen mo yeke zia kusala ti Jéhovah na kozo ndo na yâ ti fini ti mo?

1, 2. (a) Na ngoi so mbeni zo amû tere ti lo na Jéhovah, lo fa nyen la? (b) Tapande ti Noé, Moïse, Jérémie, nga na ti Paul alingbi ti mû maboko na e tongana nyen?

NA NGOI so mo mû tere ti mo na Nzapa na mo mû batême mo ga mbeni disciple ti Jésus, a yeke mbeni kota desizion la mo mû so. A yeke mo bâ mo tene mo tene: ‘Jéhovah, mbi ye si mo duti Maître ti mbi na yâ ti aye kue so mbi yeke sara na yâ ti fini ti mbi. Mbi yeke wakua ti mo. Mbi ye mo la mo fa na mbi tongana nyen a lingbi mbi sara ye na ngoi ti mbi, nyen la a lingbi mbi zia na kozo ndo, nga tongana nyen la a lingbi mbi sara kusala na amosoro ti mbi nga na akode ti mbi.’

² Tongana mo yeke mbeni Chrétien so amû tere ti lo na Jéhovah awe, zendo so mo mû na lo la. Mo lingbi na gonda ndali ti desizion so. A yeke nzoni desizion la mo mû so nga a yeke lege ti ndara. Me so fadeso mo yeda ti tene Jéhovah la aduti Maître ti mo so, mo yeke sara kusala na ngoi ti mo tongana nyen? Tapande ti Noé, Moïse, Jérémie, nga na bazengele Paul alingbi ti mû maboko na e ti gbu li na ndo ti tënë so. Akoli so oko oko kue asara lani kusala ti Jéhovah na âme ti ala kue. Dutingo ti e na ti ti ala ayeke oko. Adesizion so ala mû afa aye so ala zia na kozo ndo nga alingbi ti mû maboko na e ti bâ tongana nyen la e yeke sara kusala na ngoi ti e.​—Mat. 28:19, 20; 2 Tim. 3:1.

KOZO NA KOTA NGU SO APIKA

3. Na lege wa ngoi ti e na ti Noé akpa tere?

³ Jésus azia kamba na popo ti ngoi ti Noé nga na ngoi ti e. Lo tene: “Legeoko tongana ti so a si lani na ngoi ti Noé, ye ni ayeke duti ande tongaso nga na ngoi so Molenge ti zo ayeke si na lo yeke duti dä. Na ngoi ni so, kozo si kota ngu apika, azo asara lani ye tongaso: Ala yeke te, ala yeke nyon, akoli ayeke sara mariage, awali nga ayeke sara mariage juska ti si na lango ni so Noé alï na yâ ti arche. Ala gbu li lani na ndo ti ye so ayeke si so pëpe juska kota ngu apika na ahon na ala kue.” (Mat. 24:37-39). Azo mingi laso adengi mê pëpe na agbotongo mê so awakua ti Nzapa ayeke mû. Ala pensé pëpe so ngoi so e yeke dä a hunda ti tene zo asara ye hio. Tâ gi tongana ti azo ti ngoi ti Noé, azo mingi laso apensé pëpe so Nzapa ayeke futi ande azo ti sioni. Ala yeke he même tënë ni na ngia (2 Pi. 3:3-7). Atâa so azo so angoro lani Noé ake ti mä agbotongo mê so lo mû, lo sara kusala na ngoi ti lo tongana nyen?

4. Na peko ti so Jéhovah amû na Noé kua ti sarango ni, Noé asara ye na ngoi ti lo tongana nyen? Ngbanga ti nyen?

⁴ Na pekoni so Nzapa afa na Noé ye so lo ye ti sara nga lo mû na Noé kua so a lingbi Noé asara, Noé aleke arche ti bata fini ti azo na ti anyama (Gen. 6:13, 14, 22). Noé afa nga tënë ti fango ngbanga so Jéhovah aye ti ga na ni. Bazengele Pierre airi lo “wafango tënë ti ye so ayeke mbilimbili,” ye so afa so Noé asara lani kue ti mû maboko na azo so angoro lo ti hinga so mbeni ye ti ngangu ayeke hara ala. (Diko 2 Pierre 2:5.) Mo pensé so a yeke duti lani lege ti ndara ti tene Noé na sewa ti lo asara kusala na ngoi ti ala ti dë na buze, ti ga azo so dutingo ti ala ayeke nzoni ahon ti amba ti ala, wala ti duti na gbâ ti apendere ye? Oko pëpe! Teti so ala hinga ye so ayeke si ande, ala zia pëpe si mara ti aye tongaso amû ngoi ti ala.

YE SO MBENI MOKONZI TI ÉGYPTE ASORO

5, 6. (a) Afango ye so Moïse awara lani ayeke ti leke lo peut-être ti sara nyen? (b) Ngbanga ti nyen Moïse ake apasa so a mû na lo na Égypte?

⁵ Zia e bâ fadeso tapande ti Moïse. Molenge ti Pharaon ti wali la abata lo, na lo ga tongana mbeni mokonzi na yâ ti yangbo ti Égypte. A fa ye na Moïse “na ndo ti ndara kue ti azo ti Égypte.” (Kus. 7:22; Ex. 2:9, 10). A fa aye ni so na lo peut-être ti leke lo ti tene lo sara kua na yâ ti yangbo ti Pharaon. Lo lingbi lani ti ga mbeni kota zo na yâ ti ngorogbia so ayeke na ngangu ahon atanga ni kue ti ngoi ni so. Ye so ayeke zi lege na lo ti wara gbâ ti apendere ye nga azo ayeke ne lo mingi. Me a yeke aye so Moïse azia na gbele lo ti wara la?

⁶ Na ngoi so Moïse angbâ lani molenge, babâ na mama ti dungo lo afa ye na lo na ndo ti Jéhovah na peut-être ye so asara si lo hinga zendo so Jéhovah amû na akotara ti lo Abraham, Isaac, nga na Jacob. Moïse amä na bê na azendo so. Kite ayeke pëpe so lo gbu li mingi na ndo ti gigi ti lo ti kekereke nga tongana nyen lo lingbi ti ngbâ be-ta-zo na Jéhovah. Ni la, tongana ngoi asi lani awe ti tene lo soro wala lo yeke duti mbeni mokonzi ti Égypte wala mbeni zo ti Israël so ayeke ngbâa, lo soro so wa? Moïse asoro “ti tene a sara pasi na lo legeoko na azo ti Nzapa ahon ti tene lo wara ngia na yâ ti siokpari teti kete ngoi”. (Diko aHébreu 11:24-26.) Na pekoni, tongana Jéhovah afa na lo lege so a lingbi lo sara ye na fini ti lo, lo sara ye alingbi na ni (Ex. 3:2, 6-10). Ngbanga ti nyen? Ngbanga ti so lo mä na bê na azendo ti Nzapa na lo hinga so aye ti nzoni kue so lo lingbi ti wara na Égypte ayeke ninga pëpe. Na lo yeke lani na raison. Nzapa aga lani nduru awe ti ga na aye ti ngangu bale-oko na ndo ti kodoro so. Mo bâ ye so awakua ti Jéhovah so amû tere ti ala na lo alingbi ti manda na lege ti tapande ti lo so laso? A lingbi e zia Jéhovah nga na kusala ti lo na kozo ndo, me pëpe kua ti nginza ti e wala gingo ti wara apendere ye ti dunia so.

JÉRÉMIE AHINGA YE SO AYEKE GA

7. Na lege wa dutingo ti Jérémie akpa tere na ti e?

⁷ Mbeni zo so azia kusala ti Jéhovah na kozo ndo ayeke lani prophète Jérémie. Jéhovah asoro Jérémie ti duti prophète ti lo na lo tokua lo ti fa tënë ti fango ngbanga na ndo ti azo ti Jérusalem nga na ti Juda so aga a-apostat. E lingbi ti tene so Jérémie ayeke lani “na lâ ti nda ni”. (Jér. 23:19, 20). Lo hinga na bê ti lo kue so aye ti ngoi so lo yeke na yâ ni ayeke ninga ande pëpe.

8, 9. (a) Ngbanga ti nyen a lingbi Barouk achangé bango ndo ti lo? (b) Nyen la a lingbi e girisa ni ape na ngoi so e leke ti sara ambeni ye?

⁸ Ye so Jérémie ahinga so apusu lo ti sara nyen pëpe? Lo gi pëpe ti leke gigi ti lo ti kekereke na yâ ti dunia so ayeke gue na futingo. A yeke duti ye ti buba tongana lo gi ti leke gigi ti lo na yâ ti aye ni so. Ye oko, teti mbeni ngoi, Barouk, wakuasu ti Jérémie, abâ aye polele pëpe. Tongaso Nzapa apusu Jérémie ti tene na lo: “Bâ, ye so Mbi yä na nduzu, fade Mbi fâ na sese, na ye so Mbi lu, fade Mbi gboto; fade Mbi sara tongaso na sese ni kue. Mo yeke gi [a]kota ye teti mo mveni? Mo gi ye so pëpe; teti fade Mbi sara si sioye aga na ndo mi kue, . . . me fade Mbi mû fini ti mo na mo tongana ye so zo agbu na bira, na ndo kue so mo yeke gue dä.”​—Jér. 45:4, 5.

⁹ E lingbi ti hinga pëpe tâ ‘akota ye’ so Barouk agi teti lo mveni.a Me e hinga so aye ni so ayeke ngbâ ande pëpe, a yeke futi ni na ngoi so azo ti Babylone ayeke mû Jérusalem na ngu 607 kozo ti Christ. E lingbi ti manda nyen na lege ti ye so? Ti wara ambeni ye so e yeke na bezoin ni laso a lingbi e leke ti sara ambeni ye si (aProv. 6:6-11). Me a yeke duti lege ti ndara ti mû ngoi nga na ngangu ti e kue ti gi ti wara na aye so ayeke ngbâ ande pëpe? Bungbi ti Jéhovah angbâ ti leke ti sara afini Da ti Royaume, aBéthel, nga ambeni pialo. Ye oko, aye ni so ayeke nde ndali ti so a yeke ti mû maboko na kusala ti Royaume. Tongaso, tongana awakua ti Jéhovah ayeke gi ti sara ambeni ye, a yeke nzoni ala zia nga Royaume ti Nzapa na kozo ndo na yâ ti fini ti ala. Mo yeke gi Royaume ti Jéhovah nga na mbilimbili ti lo kozoni?​—Mat. 6:33.

“MBI BÂ AYE NI TONGANA GBÂ TI AZENDE”

10, 11. (a) Kozoni si Paul aga Chrétien, nyen la ayeke lani kota ye na lê ti lo? (b) Ngbanga ti nyen Paul achangé ye so lo ye ti sara na yâ ti fini ti lo?

¹⁰ Zia e bâ ndangba tapande ni so ayeke ti Paul. Kozo si lo ga Chrétien, azo mingi apensé so lo yeke wara ande mbeni nzoni kua. Lo manda ye lani na ndo ti andia ti aJuif na gbe ti mbeni wafango ye so azo mingi ahinga lo na ngoi ni kâ. Kota prêtre ti aJuif amû na lo komandema. Lo maï mingi na yâ ti bungbi ti nzapa ti aJuif ahon azo mingi ti ngoi ti lo (Kus. 9:1, 2; 22:3; 26:10; aGal. 1:13, 14). Me na ngoi so lo ga ti bâ so Jéhovah ake mara ti aJuif, lo changé ye so lo ye ti sara na yâ ti fini ti lo.

¹¹ Paul ahinga so ti duti na mbeni kua na yâ ti aye ti ngoi ti aJuif ayeke ye oko pëpe na lê ti Jéhovah (Mat. 24:2). Paul ahinga ye so Nzapa aleke ti sara, nga lo hinga so ti sara kusala ti fango tënë ayeke mbeni kota pasa. Lo tene même so aye so ândö lo bâ ni tongana akota ye, fadeso lo bâ ni tongana “gbâ ti azende”. Paul azia lege ti vorongo nzapa ti aJuif na lo mû tanga ti fini ti lo kue na sese ge ti fa nzoni tënë ti Royaume.​—Diko aPhilippien 3:4-8, 15; Kus. 9:15.

GI TI BÂ AYE SO MO ZIA NA KOZO NDO

12. Nyen la Jésus azia na kozo ndo na peko ti batême ti lo?

¹² Noé, Moïse, Jérémie, Paul, nga ambeni zo mingi tongana ala amû kota mbage ti ngoi nga na ngangu ti ala ti sara na kua ti Jéhovah. Ala yeke nzoni tapande teti e. Me Jésus la ayeke nzoni tapande ahon tanga ti awakua ti Jéhovah kue so amû tere ti ala na lo (1 Pi. 2:21). Na peko ti batême ti Jésus, lo mû tanga ti fini ti lo kue na sese ge ti fa nzoni tënë nga ti mû gonda na Jéhovah. Tongaso, a yeke nzoni sarango kusala ti Jéhovah aduti na kozo ndo na yâ ti fini ti Chrétien kue so amû tapande ti Jésus nga ayeda ti tene Jéhovah la aduti Maître ti lo. A yeke ye so mo yeke sara ni? Tongana nyen e lingbi ti sara ye mingi ndali ti Jéhovah nga na oko ngoi ni ti sara akusala ti e ti mitele?​—Diko Psaume 71:15; 145:2.

13, 14. (a) Ye wa a wa aChrétien kue ti sambela ndali ni? (b) Ngia wa azo ti Nzapa alingbi ti wara?

¹³ A sara angu mingi awe so bungbi ti Jéhovah ayeke wa lakue aChrétien ti gbu li ti sara kua ti pionnier na ti sambela ndali ni. Ndali ti araison nde nde, dutingo ti ambeni wakua be-ta-zo ti Jéhovah amû lege na ala pëpe ti fa tënë angbonga 70 nze na nze. Zia si ala sara vundu ndali ni ape (1 Tim. 5:8). Ka ti mo ayeke tongana nyen? Mo lingbi ti mû kua ti pionnier?

¹⁴ Gbu li na ndo ti ngia so awakua ti Nzapa mingi awara lani na ngoi ti Mémorial ti ngu so. Na nze ti mars, lege azi lani na azo so amû kua ti pionnier auxiliaire ti fa tënë ngbonga 30 wala 50 tongana ala ye (Ps. 110:3). Aita kutu mingi amû lani kua ti pionnier auxiliaire. Ye so asara si tere ti aita kue na yâ ti acongrégation anzere. Mo lingbi ti leke yâ ti kapa ti mo ti mû kua ti pionnier auxiliaire ngoi na ngoi? Chrétien so amû kua ti pionnier ayeke na ngia na hunzingo ti lango oko oko na lo lingbi ti tene: “Jéhovah, mbi sara ye kue so mbi lingbi ti sara na yâ ti kusala ti mo.”

15. Nyen la a lingbi mbeni Chrétien so ade maseka azia na gbele lo na ngoi so lo yeke manda mbeti?

¹⁵ Tongana mo yeke mbeni maseka Chrétien so aga nduru awe ti hunzi mandango mbeti ti lo, peut-être mo yeke na nzoni seni nga mo yeke na ambeni zo na gbe ti mo ti bâ lege ti ala pëpe. Mo gbu li ti mo awe ti mû kua ti pionnier permanent? Kite ayeke pëpe so, awafango mbeti na mo apensé so a yeke nzoni ndali ti mo ti manda mbeti a yo nga ti gi ti sara mbeni kua ti nginza. Ala zia bê ti ala na ndo ti nginza nga aye so azo asigigi na ni ndali ti nzoni duti ti azo. Me aye ni so ayeke ninga pëpe. Ye oko, tongana mo mû kusala ti ngoi kue, mo yeke sara biani mbeni ye so ayeke nzoni nga so ayeke ninga. Mo yeke mû tapande ti Jésus so ayeke mbeni tapande so alingbi kue. A yeke mbeni nzoni desizion so ayeke sara si mo duti na ngia. A yeke bata mo. Nga, a yeke fa so mo sara kue ti sara ye alingbi na mungo tere ti mo na Jéhovah.​—Mat. 6:19-21; 1 Tim. 6:9-12.

16, 17. Ahundango tënë wa a lingbi aChrétien ahunda tere ti ala na ni na ndo ti kusala so ala yeke sara na Jéhovah?

¹⁶ Awakua ti Nzapa mingi laso ayeke sara kua angbonga mingi ti wara aye so sewa ti ala ayeke na bezoin ni. Me ambeni alingbi ti sara kua angbonga mingi ahon ti so ala yeke na bezoin ni (1 Tim. 6:8). Dunia so ayeke sara kue ti pusu e ti pensé so a yeke nzoni ti vo afini ye kue so a sigigi na ni tongaso si e duti nzoni. Me atâ Chrétien aye pëpe ti zia si dunia ti Satan afa na ala aye so a lingbi ala zia na kozo ndo (1 Jean 2:15-17). Ka ti azo so ague na retraite awe ayeke tongana nyen? Tâ nzoni ye so ala lingbi ti sara na ngoi ti ala ayeke ti mû kua ti pionnier na ti zia kusala ti Jéhovah na kozo ndo.

¹⁷ Awakua ti Jéhovah kue so amû tere ti ala na lo awe alingbi ti hunda tere ti ala: Nyen la ayeke kota mingi na yâ ti fini ti mbi? Mbi yeke zia aye ti Royaume na kozo ndo? Mbi mû tapande ti Jésus na mbi fa so mbi yeke nduru ti mû ngoi nga na ngangu ti mbi ti sara na kua ti Nzapa? Mbi yeke sara ye alingbi na wango so Jésus amû ti mû peko ti lo lakue? Lege ayeke dä ti changé yâ ti kapa ti mbi ti mû ngoi mingi ti fa tënë nga ti sara ambeni kusala na yâ ti bungbi? Tongana dutingo ti mbi amû lege na mbi pëpe ti kono yâ ti kusala ti mbi na ndembe so, mbi yeke gi alege ti mû ngoi nga na ngangu ti mbi ti sara na kusala ti Jéhovah?

‘DUTI NA NZARA TI SARA YE NGA SARA YE’

18, 19. Ye wa mo lingbi ti sambela ndali ni? Ngbanga ti nyen mara ti sambela tongaso anzere na Jéhovah?

¹⁸ A nzere mingi ti bâ so awakua ti Nzapa ayeke sara na lo na bê ti ala kue. Ye oko, ambeni ayeke peut-être na nzara ti kua ti pionnier pëpe wala ala pensé so ala lingbi ti sara ni pëpe atâa so dutingo ti ala amû lege na ala ti sara ni (Ex. 4:10; Jér. 1:6). A lingbi mo sara nyen tongana mo kue mo pensé tongaso? Sambela Jéhovah ti mû maboko na mo. Paul atene so Jéhovah aye ti mû maboko na e ti ‘duti na nzara ti sara ye nga ti sara ye’. (aPhil. 2:13). Tongana mo yeke na nzara ti kono yâ ti kusala ti mo pëpe, hunda Jéhovah ti sara si mo duti na nzara ni nga na kode ti sarango ni.​—2 Pi. 3:9, 11.

¹⁹ Noé, Moïse, Jérémie, Paul, nga na Jésus, ala kue ayeke lani be-ta-zo. Ala mû lani ngoi ti ala nga na ngangu ti ala ti fa atënë ti gbotongo mê so alondo na Jéhovah. Ala zia pëpe si ambeni ye agboto lê ti ala. A ga nduru awe ti futi dunia ti laso. Ni la, e kue so e mû tere ti e na Nzapa awe, a lingbi e sara kue ti ngbâ ti mû peko ti anzoni tapande so, so e wara na yâ ti Bible so (Mat. 24:42; 2 Tim. 2:15). Na sarango tongaso, e yeke zia ngia na bê ti Jéhovah nga lo yeke iri tënë nzoni mingi na ndo ti e.​—Diko Malachie 3:10.

[Kete tënë na gbe ni]

[Foto na lembeti 21]

Azo asara sanka ti gbotongo mê so Noé amû

[Foto na lembeti 24]

Mo gbu li ti mo ti mû kusala ti ngoi kue?