Bâ Bible pëpe tongana mbeni ye ti ndima

“TËNË ti Nzapa ayeke na fini na ayeke na ngangu ti sara ye.” (aHéb. 4:12). Bazengele Paul atene atënë so ti fa ngangu so tënë ti yanga ti Nzapa ayeke na ni ti ndu bê ti azo nga ti changé fini ti ala.

Me na ngoi so a-apostat so a fa tënë ti ala kozo akomanse ti mû ndo na peko ti kuâ ti abazengele, bango ndo ti azo na ndo ti ngangu so Bible ayeke na ni aga kirikiri (2 Pi. 2:1-3). Akota zo ti eglize akomanse ti tene so Bible alingbi ti sara aye ti ndima. Wafango mbeti Harry Y. Gamble atene so na peko ti ngu 200 kota zo ti Eglize Origène afa so gi mango tënë ti Nzapa na mê alingbi ti mû maboko na mbeni zo. Lo tene so asinga atënë ti apaïen so ayeke sara magie ayeke na ngangu so si tënë ti Nzapa so ayeke na yâ ti Bible ayeke na ngangu mingi pëpe? Jean Chrysostome, so ayeke na fini na hunzingo ti ngu 300 ti si na ngu 400, atene so ‘Zabolo ayeke tara pëpe ti ga nduru na mbeni da so Évangile ayeke na yâ ni.’ Lo tene nga so ambeni zo asû ambeni tënë ti yâ ti aÉvangile ala kanga na mbeni ye na ala zia na go ti ala tongana mbeni ngangu waraga. Gamble afa nga so Augustin, mbeni kota zo ti Eglize Catholique, “abâ so tongana li ti mbeni zo ason, lo lingbi ti mû Évangile ti Jean lo zia na gbe ti coussin ti lo na ngoi so lo yeke lango”. Ni la, azo amû atënë ti Bible ti sara na aye ti magie. Mo bâ Bible tongana mbeni waraga so alingbi ti bata mo si ye ti sioni asi na mo pëpe?

Mbeni lege so azo mingi ayeke sara kua na Bible na lege ni pëpe ayeke so, ala pensé so tongana ala zi Bible gi tongaso na mbeni lembeti, kozo versê so lê ti ala atï dä ayeke fa na ala ye so a lingbi ala sara. Na tapande, Gamble afa so mbeni lâ tongana Augustin amä mbeni kete molenge so ayeke na yâ ti mbeni da so ayeke nduru na lo atene: “Mû ni mo diko, mû ni mo diko,” lo pensé so Nzapa la ahunda na lo ti zi Bible na ti diko kozo versê so lê ti lo atï dä.

Mo mä tënë ti azo so ayeke sara kua na Bible na lege so ti gi ti leke akpale ti ala so? Biani, so azo so aye ti wara mungo maboko na yâ ti Bible so ayeke nzoni. Me a yeke nzoni lege ti sarango ni la pëpe.

Jésus adë bê ti adisciple ti lo so lo yeke tokua na ala “wamungo maboko, yingo vulu”. Lo kiri lo tene: “Lo si lo yeke fa ande na ala aye kue, nga lo yeke dabe ti ala na aye kue so mbi fa na ala.” (Jean 14:26). Me, kode so ayeke ti zi Bible gi tongaso na ti diko kozo versê so lê ti e atï dä ahunda pëpe ti hinga ye so ayeke na yâ ti Bible.

Mara ti kode tongaso nga na ambeni kode ti sarango kusala na Bible so ayeke na lege ni pëpe amû ndo. Ye oko, Mbeti ti Nzapa ake bingo zeke (Lév. 19:26; Deut. 18:9-12; Kus. 19:19). “Tënë ti Nzapa ayeke na fini na ayeke na ngangu ti sara ye,” me a lingbi e sara kua na ni nzoni. Tâ hingango ye na ndo ti Bible la asara si gigi ti azo aga nzoni me pëpe sarango kua na ni na mbeni lege so ayeke nzoni pëpe. Hingango ye so amû maboko na azo mingi ti maï anzoni sarango ye, ti ke asarango ye so ayeke buba fini ti zo, ti sara si sewa ti ala akpengba nga ti maï mbeni kpengba songo na Jéhovah, lo so a sû Bible na gbe ti yingo ti lo.