MO DABE TI MO NA NI?
Mo diko a-article ti Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:
Azo apensé so tongana ala zi Bible gi tongaso, kozo versê so lê ti ala atï dä ayeke fa na ala ye so a lingbi ala sara. A lingbi aChrétien abâ kode so tongana nyen?
Atâ Chrétien ayeke bi zeke pëpe. Me ala yeke manda Bible ti wara tâ hingango ye nga ti wara fango lege ti Nzapa.—15/12, lembeti 3.
“Dunia” so ayeke hon ande so ayeke so wa?
A yeke dunia so sarango ye ti azo ni ague nde na ye so Nzapa aye (1 Jean 2:17). Sese nga na azo so ayeke be-ta-zo ayeke ngbâ ande.—1/1, lembeti 5-7.
Atâa so Abel akui awe, na lege wa lo ngbâ ti sara tënë na e? (aHéb. 11:4).
Lo yeke sara ni na lege ti mabe. E lingbi ti manda ye na lege ti mabe ti lo nga e gi ti wara mara ni. Lo ngbâ lakue pendere tapande ndali ti e, mbeni ye so e lingbi ti mû pekoni.—1/1, lembeti 12.
Na yâ ti aye wa a lingbi e zia pëpe si mbeni ye ague na e yongoro na Nzapa?
Ambeni ye ni ayeke: kua ti nginza ti e, angia so e soro ti sara, songo ti e na afami ti e so a bi ala na gigi, sarango kua na aye so senda-kode asigigi na ni, gingo bê na ndo ti seni ti e, dutingo na nzoni bango ndo pëpe na ndo ti nginza nga na baba.—15/1, lembeti 12-21.
Nyen la e lingbi ti manda na ndo ti Moïse so asara ye na tâ be-ti-molenge?
Ahon ti tene Moïse azia si komandema ague na lo ti suku na baba, lo zia bê ti lo na ndo ti Nzapa, me na ndo ti lo wani pëpe. E ye lâ oko pëpe ti zia si komandema so e yeke na ni wala hingango ndo ti e asara si e suku na baba. Me e ye ti zia bê ti e kue na Jéhovah (aProv. 3:5, 6).—1/2, lembeti 5.
A yeke zingo ande azo na kuâ ti duti na ndo wa?
Gi mbeni kete wungo ti azo 144000 la ayeke wara fini na yayu. Me ti mingi ti azo, a yeke zingo ande ala na ndo ti sese. Ala yeke wara fini ti lakue lakue na ndo ti sese.—1/3, lembeti 6.
Tongana a tene azo ti Israël ‘afâ bê ti ala na ganza pëpe’, a ye ti tene nyen? (Jér. 9:26).
Ala yeke lani azo ti kpengba-li nga a lingbi ala zi na yâ ti bê ti ala apensé, anzara, wala aye so ayeke pusu ala ti sara ye na so ague nde na ti Nzapa (Jér. 5:23, 24).—15/3, lembeti 9-10.
Na lege wa Jésus ayeke tapande ti zo so ayeke na ngia na yâ ti gigi ti lo?
Lo zia lani na gbele lo ti sara gi ye so nzapa aye. Lo ye lani Babâ ti lo ngangu nga lo ye azo. Lo hinga lani so babâ ti lo aye lo nga so lo nzere na lê ti lo. Aye so la asara si zo ayeke na ngia na yâ ti gigi ti lo.—1/4, lembeti 4-5.
Aye wa a yeke wara na yâ ti mbage ti bungbi ti Nzapa so ayeke na sese?
Na yâ ni a yeke wara Bebungbi, aKomite ti filiale, asurveillant so ague na ando nde nde, abungbi ti a-ancien, acongrégation nga na aTémoin oko oko kue.—15/4, lembeti 29.
Ngbanga ti nyen e lingbi pëpe ti tene so angbanga so Nzapa afâ ândö afa so lo yeke sioni?
Jéhovah ayeke na ngia pëpe tongana zo ti sioni akui (Ézéch. 33:11). Angbanga so Nzapa afâ ândö afa so na ndoye lo gboto mê ti azo ni kozoni si lo fâ ngbanga ni. Ye so amû na e beku ti sö kuâ na ngoi ti afango ngbanga so ayeke ga.—1/5, lembeti 5-6.
Azo ti Israël ayeke fâ lani azo ti sioni na kangango ala na ndo ti keke?
Ên-ën. Ambeni mara giriri ayeke sara tongaso me azo ti Israël pëpe. Na ngoi ti azo ti Israël ti giriri, a yeke fâ azo ti sioni kozoni awe si. Na tapande, a yeke bo ala na tênë (Lév. 20:2, 27). Na pekoni, a lingbi ti kanga kuâ ni na ndo ti keke tongaso si tanga ti azo asara mbeto.—15/5, lembeti 13.
Ndali ti nyen si siriri amanke na yâ ti dunia so?
Atâa so azo ayeke sara anzoni ye, ala lingbi ti fa lege na gere ti ala wani ape (Jér. 10:23) Satan la akomande dunia, tongaso azo alingbi pëpe ti ga na siriri (1 Jean 5:19).—1/6, lembeti 16.