Jésus: Aye so asara si lo yeke lani na ngia na yâ ti gigi ti lo

JÉSUS ayeke lani na ngia biani na yâ ti gigi ti lo? Ti bâ ni nzoni, lo kono lani na yâ ti sewa ti azo ti mawa, nga na yâ ti gigi ti lo kue, lo yeke lani na gbâ ti kungba pëpe. Lo yeke même lani “na mbeni ndo ti zia li ti lo dä pëpe.” (Luc 9:57, 58). Na mbeni mbage, awato ti lo ake lo, ala zonga lo nga na nda ni ala fâ lo.

Peut-être mo tene, ‘Mara ti gigi tongaso aga ti lo na ngia na zo ape!’ Me tongana e bâ gigi ti Jésus nzoni, e yeke bâ so lo yeke lani na ngia. Zia e bâ aye osio so asara si lo yeke lani na ngia.

1. JÉSUS AZIA LANI NA GBELE LO TI SARA GI YE SO NZAPA AYE.

“Kobe ti mbi ayeke ti sara ye so bê ti lo so atokua mbi aye.”​—Jean 4:34.

Na lege ti atënë ti lo nga na asarango ye ti lo, Jésus afa so lo ye gi ti sara ye so Jéhovah,a Babâ ti lo ti yayu, aye. A nzere lani na lo mingi ti sara ye so Nzapa aye. Ni la, lo haka ni na kobe, tongana ti so a fa na yâ ti versê na nduzu ge. Bâ ye so apusu lo lani ti haka sarango ye so Nzapa aye na kobe.

Nduru na midi lani la si Jésus atene tënë so (Jean 4:6). Depuis ndapre la lo tambela na yâ ti kodoro ti Samarie so ahoto ayeke dä mingi, na kite ayeke pëpe so nzara asara lo lani. Même adisciple ti lo atene na lo: “Rabbi, mo te kobe si.” (Jean 4 :31). Tënë so Jésus atene na ala afa so sarango kua ti Nzapa asara si lo wara ngangu awe. Ye so afa biani so gigi ti lo ayeke na ngia, ni la ape?

2. JÉSUS AYE LANI BABÂ TI LO NGANGU.

“Mbi ndoye Babâ.”​—Jean 14:31.

Jésus ayeke lani na kpengba songo na Babâ ti lo ti yayu. Lo ye Nzapa ngangu, na ye so apusu lo ti fa Babâ ti lo na azo. Lo fa iri ti lo na ala, ye so Babâ ti lo ni aleke ti sara nga apendere sarango ye ti tere ti lo. Atënë ti lo nga na asarango ye ti tere ti lo afa tâ Babâ ni nzoni. A sara si tongana e diko ye na ndo ti Jésus, a yeke mo bâ mo tene e yeke bâ Babâ ti lo la. Tongana lani Philippe ahunda na Jésus ti ‘fa na ala Babâ’ ni, Jésus atene: “Zo so abâ mbi abâ nga Babâ awe.”​—Jean 14:8, 9.

Ndali ti so Jésus aye Babâ ti lo ngangu, lo yeke lani nduru ti mä yanga juska na kuâ (aPhilippien 2:7, 8; 1 Jean 5:3). Mara ti kota ndoye so Jésus ayeke na ni na mbage ti Nzapa asara si lo yeke lani na ngia na yâ ti gigi ti lo.

3. JÉSUS AYE LANI AZO.

“Tongana mbeni zo akä âme ti lo na kuâ ndali ti akamarade ti lo, mbeni ndoye ti hon so ayeke dä pëpe.”​—Jean 15:13.

E azo, teti so e yeke na siokpari na tere ti e, nzoni ye la ayeke ku e pëpe. Bible afa ndani, lo tene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). E wani e lingbi pëpe ti zi tere ti e na gbe ti sioni ye so siokpari aga na ni so, so ti tene kuâ.​—aRomain 6:23.

Me merci so Jéhovah aleke mbeni ye na ndoye ti zi e dä. Lo zia si Jésus, Molenge ti lo so siokpari ayeke na tere ti lo pëpe, aga abâ pasi na akui si e wara lege ti sigigi na gbe ti ngbâa ti siokpari na ti kuâ. Teti so Jésus aye Babâ ti lo nga na e azo, lo yeda ti ga na ti mû fini ti lo ti zo so ayeke na siokpari pëpe na kuâ ndali ti nzoni ti e (aRomain 5:6-8). Tâ ndoye so asara si lo yeke lani na ngia na yâ ti gigi ti lo.b

4. JÉSUS AHINGA LANI SO BABÂ TI LO AYE LO NGA SO BÊ TI LO ANZERE NA LO.

“So ayeke Molenge ti mbi so mbi ndoye lo mingi, lo so bê ti mbi anzere na lo mingi.”​—Matthieu 3:17.

Jéhovah asara tënë so lani na ngoi ti batême ti Jésus. Na lege ti tënë so, lo fa polele so lo ye Molenge ti lo ni nga so bê ti lo anzere na lo mingi. A yeke senge ape si Jésus atene tënë so na kite oko na bê ti lo ape: “Babâ andoye mbi.” (Jean 10:17). So Jésus ahinga so Babâ ti lo aye lo nga so lo nzere na bê ti lo mingi, lo luti na lê ti atara nga lo gbu ngangu tongana azo akasa lo. Même tongana kuâ aga, lo kpe ni ape (Jean 10:18). Biani, kota ndoye so Babâ ti lo ayeke na ni na mbage ti lo apusu lani Jésus ti duti na ngia mingi na yâ ti gigi ti lo.

E lingbi ti tene so Jésus ayeke lani na ngia na yâ ti gigi ti lo. Biani, tapande ti lo alingbi ti fa na e ye so e lingbi ti sara ti duti biani na ngia na yâ ti gigi ti e. Article ti peko ayeke fa na e ambeni wango so Jésus amû na adisciple ti lo na ndo ti tënë so.