Tënë ti mvene so asara si azo ahinga iri ti Nzapa ape

YE SO AZO MINGI AMÄ NA BÊ DÄ

“Ambeni zo atene Nzapa ayeke na iri na ambeni atene lo yeke na iri ape. Me tongana Nzapa ayeke na iri, a yeke so wa?”​—David Cunningham, mbeti-sango Theological Studies.

TÂ YE SO BIBLE AFA

Na mbeti ti Ésaïe 42:8, na yâ ti Tene ti Nzapa, Kozo Mbouki, Nzapa atene so “iri ti [lo] ayeke Yahve,” wala Jéhovah na yâ ti La Sainte Bible en sango, na Genèse 22:14. Jéhovah ayeke mbeni iri na yanga ti Hébreu so ndani aye ti tene “Lo so asara si ye aga.”

Jéhovah aye si e sara kusala na iri ti lo. Bible atene: ‘I di iri ti Lo, i fa kusala ti Lo na popo ti azo, i sara tënë ti yango-iri ti Lo.’​—Ésaïe 12:4.

Jésus asara kua lani na iri ti Nzapa. Na yâ ti sambela, lo tene na Jéhovah, lo tene: “Mbi sara si [adisciple ti mbi a]hinga iri ti mo na fade mbi yeke sara si a hinga ni.” Jésus afa iri ti Nzapa ni na adisciple ti lo ngbanga ti nyen? Lo fa ndani, lo tene: “Si ndoye so mo [Nzapa, mo] ndoye na mbi aduti na popo ti ala nga mbi duti beoko na ala.”​—Jean 17:26.

NDANI SO A YEKE KOTA YE TI HINGA NI

Pakara Walter Lowrie atene so zo so ahinga iri ti Nzapa ape, lo lingbi ti ye lo ape nga lo lingbi ti lë kpengba songo na lo ape.

Mbeni koli so iri ti lo ayeke Victor ayeke gue ândö na eglize yenga na yenga, me lo wani lo ga ti bâ so lo hinga Nzapa nzoni ape. Lo tene: “Na ngoi so mbi hinga mbi tene iri ti Nzapa ayeke Jéhovah, nga so a yeke iri so a hinga na lo la, ge la si mbi ga ti bâ so Zo so mbi yeke mä ka tënë ti lo mingi so, mbi hinga lo fadeso nzoni awe. Mbi bâ lo fadeso tongana Zo so mbi lingbi ti lë kpengba songo na lo.”

Ti Jéhovah nga kue, lo yeke ga nduru na azo so ayeke sara kua na iri ti lo. Ti ala so “ala bi bê ti ala na iri ti Lo”, Nzapa atene: “Fade Mbi sara be-nzoni na ala, legeoko tongana babâ asara be-nzoni na molenge ti lo mveni so asara kusala ti lo.” (Malachie 3:16, 17) Nzapa ayeke futa nga azo so adi iri ti lo. Bible atene: “Fade a yeke sö zo kue so airi ndo na Jéhovah na iri ti lo.”​—aRomain 10:13.