Zo wa la asara Nzapa zo wa?

Bâ so mbeni babâ angbâ ti sara lisoro na molenge ti lo ti ngu mbasambala. Lo tene, “Ândö giriri, Nzapa asara sese na aye kue so ayeke na ndo ni. Lo sara nga lâ, nze nga na atongoro.” Molenge ni agbu li ti lo kete, na pekoni lo hunda babâ ti lo ni, lo tene: “Ka Nzapa ni, zo wa la asara lo zo wa?”

Babâ ni atene, “Zo oko ape, lo yeke ti lo gi dä lakue.” Senge kiringo tënë so adë bê ti molenge ni, me kue ape. Tongana lo yeke kono, li ti lo angbâ lakue gi na ndo ti hundango ndo so. Lo hinga ape tongana nyen la si mbeni zo ayeke ti lo na tongo nda ni ape. Même dunia kue ayeke na tongo nda ni. Na yâ ti li ti lo, ‘Nzapa ni abâ gigi tongana nyen?’

Bible atene ti lo nyen na ndo ni? Kiringo tënë ti lo ni aye ti gue oko na ti babâ ni so. Moïse atene: ‘Seigneur, . . . kozoni si A dü ahoto, kozoni si Mo créé sese na ye kue so ayeke na ndo sese, même giriri kozoni, na lakue lakue, Mo yeke Nzapa.’ (Psaume 90:1, 2). Même prophète Ésaïe kue atene: ‘Mo hinga pëpe? mo mä pëpe? L’Éternel ayeke Nzapa ti lakue lakue, Lo créé nda ti sese kue.’ (Ésaïe 40:28). Mbeti ti Jude nga kue atene so Nzapa ayeke “fadeso nga lakue lakue.”​—Jude 25.

Aversê so afa na e so Nzapa ayeke “Gbia ti lakue lakue,” tongana ti so bazengele Paul atene (1 Timothée 1:17). Tënë so aye ti fa so Nzapa ayeke ti lo dä depuis depuis, nga lo yeke duti gi dä lakue (Apocalypse 1:8). Ndani la si a iri lo Lo ti ngangu ahon kue.

Ndali ti nyen si a yeke ngangu na e ti gbu nda ti tënë so polele? Raison ni ayeke so ndali ti so e ninga ka na yâ ti fini ti e ape, bango ndo ti e na ndo ti ye so a iri ni ngoi ayeke tâ nde na ti Jéhovah. So Jéhovah ayeke Nzapa ti lakue lakue, na lê ti lo ngu saki oko ayeke tongana lango oko (2 Pierre 3:8). Zia e mû mbeni tapande: Gigi ti kinda-gozo ayeke ninga gi lango 50 tongaso. Tongana a haka lango ni so na ti e azo, so gigi ti e ayeke ninga ka ngu 70 wala 80, eskê kinda-gozo ayeke comprendre ni? A yeke ngangu! Ye oko, Bible atene so e yeke tongana akinda-gozo, tongana a haka e na Kota Nzapa ti e. Même hingango ndo ti e akpa ti lingbi na ti lo oko ape! (Ésaïe 40:22; 55:8, 9). Tapande so afa na e so e azo e lingbi ape ti gbu nda ti aye kue so andu Jéhovah.

Même si tënë ti dutingo lakue lakue ti Nzapa ayeke mbeni ye so ahon gbungo li ti e, tënë ni so agbu ngu kamême. Na tapande, tongana mbeni zo nde la si asara Nzapa, andâ zo ni so la si ayeke duti zo so asara aye kue. Me Bible atene so Jéhovah la asara “aye kue”. (Apocalypse 4:11). E hinga nga e tene dunia so gbâ ti atongoro ayeke na yâ ni so ayeke ti lo dä kozo ape (Genèse 1:1, 2). Ka a bâ gigi tongana nyen? A lingbi mbeni zo aduti dä kozo awe si a leke ni. Zo ni so ayeke nga dä lani kozo awe kozoni si Molenge ti lo ngengele oko nga na a-ange abâ gigi (Job 38:4, 7; aColossien 1:15). Ye so afa polele so lo yeke dä lani, me gi lo oko. A sara lo sarango ape, ngbanga ti so mbeni ye kozo na lo ayeke ti lo lani dä ape.

So e yeke na fini nga so gbâ ti atongoro ayeke dä so, a fa so Nzapa ayeke dä, lo so lo yeke ti lo dä lakue lakue. Lo la lo sara si atongoro ayeke tambela na lê ti nduzu, lo nga la azia andia na yâ ti ala si ala tambela kirikiri ape. Gi lo oko la si alingbi ti sara si aye kue abâ gigi na ayeke na fini.​—Job 33:4.