Azo ahunda atene . . .

Nzapa ayeke na tongo nda ni?

▪ Bible atene so Nzapa ayeke na tongo nda ni pëpe. Nzapa ayeke gi dä lakue. Tënë so atene Nzapa ayeke lakue lakue, e lingbi pëpe ti ke ni gi ndali ti so e gbu ndani kue pëpe.

A yeke tâ na lege ni ti tene e ku ti hinga ye kue na ndo ti Nzapa? Bazengele Paul atene: “Bâ, tongana nyen mosoro ti Nzapa, ndara ti lo na hingango ye ti lo ayeke kota! Biani, zo alingbi ti gi nda ti afango ngbanga ti lo pëpe, zo alingbi nga ti hinga alege ti lo kue pëpe.” (aRomain 11:33). E lingbi pëpe ti gbu nda ti aye kue na ndo ti ndara ti Nzapa nga na hingango ye ti Nzapa so ayeke kota mingi legeoko tongana mbeni kete molenge so alingbi pëpe ti hinga aye kue na ndo ti babâ wala mama ti lo. Atâa so atënë ti Paul so andu kozoni kue ndara ti Nzapa nga na nzoni bê ti lo so mara ni ayeke use pëpe, atënë ni so afa so ambeni ye ayeke dä so andu Jéhovah Nzapa nga ambeni lege ti sarango ye ti lo ayeke dä so a yeke ngangu mingi na e ti gbu ndani. Tënë so atene Nzapa ayeke na tongo nda ni pëpe akpa nga mbeni ye so ayeke ngangu na e ti gbu ndani. Ye oko, e lingbi ti zia bê ti e kue na ye so Bible afa na e na ndo ti Nzapa. Jésus asara tënë ti Mbeti ti Nzapa lo tene: “Tënë ti mo ayeke tâ tënë.”​—Jean 17:17.

Na yâ ti mbeni sambela na Jéhovah, Moïse atene: “Giriri kozoni, na lakue lakue, Mo yeke Nzapa.” (Psaume 90:2). Ge, Moïse afa aye use na ndo ti Nzapa. Mbeni oko andu angoi so ayeke ga. Jéhovah ayeke “Lo so ayeke na fini lakue lakue nga kpu na kpu”. (Apocalypse 4:10). Tongaso, atâa juska lawa, Nzapa ayeke gi dä lakue. Use ye ni andu angoi so ahon awe. Na mbeni lege nde, e lingbi ti tene so a créé Nzapa crééngo pëpe wala lo bâ gigi bango pëpe. Nde na so, Nzapa ayeke dä ngbene ye giriri na teti mbeni ngoi so zo alingbi ti diko pëpe.

Tongaso, a yeke na lege ni ti tene gi Nzapa lo oko lâ lo lingbi ti tene a iri lo “Gbia ti lakue lakue”. (1 Timothée 1:17). Gbu li kete: Jésus Christ, a-ange kutu na kutu so ayeke na yayu nga na azo so ayeke na sese ge, ala kue ayeke na tongo nda ni ngbanga ti so a créé ala crééngo (aColossien 1:15, 16). Me ti Nzapa, a yeke tongaso pëpe. Ti ngbâ lakue ti tene so a créé Nzapa crééngo ayeke sara si ambeni hundango tënë so ayeke hunzi pëpe ayeke londo ti gi ti hinga zo wa la acréé lo so acréé aye kue. Jéhovah lo oko la ayeke na fini ‘giriri kozoni na lakue lakue’. (Psaume 90:2). Na mbeni lege nde, e lingbi ti tene Jéhovah ayeke dä na “angoi kue so ahon kozo”.​—Jude 25.

Me, girisa pëpe so tënë so atene Nzapa ayeke dä lakue lakue ayeke pëpe gi mbeni senge tënë tongaso. Tongana e gbu li nzoni na ndo ti sambela ti Moïse so, e yeke bâ so tënë so atene Nzapa ayeke dä lakue afa biani so zendo ti fini ti lakue lakue ayeke ga ande tâ tënë. Nde na fini ti e so ayeke ninga laso pëpe, Bible afa Nzapa tongana “Ndo Ti Duti ti e na lâ ti awagame kue.” Jéhovah ayeke mbeni Babâ so ayeke na ndoye. Lo yeke dä ândö, lo yeke dä laso nga lo yeke duti ande dä lakue lakue teti azo ti lo. Zia si tâ tënë so amû ngangu na mo!​—Psaume 90:1.