E fa nzo tënë na ndo kue

¹ Akozo Chrétien afa nzo tënë na ndo kue. Ala yeke na wâ mingi, ni la ngu 30 na peko ti londongo ti Jésus Christ na popo ti awakinda, a fa tënë ti Royaume “na azo kue na gbe ti yayu”.​—aCol. 1:23.

² Laso, awakua ti Jéhovah so ayeke na wâ azia na gbele ala ti wara oko ye so: ti fa nzo tënë ti Royaume na azo kue so e lingbi ti wara ala. Ye nyen a lingbi ti mû maboko na e ti wara ye so e zia na gbele e? Azo mingi ayeke sala kusala na ngoi kue na ala yeke lakue na ndo ti ala pëpe tongana e ga ti bâ ala. Tongana ala sala kusala pëpe, ala yeke tambela, ala gue ti vo aye wala ti gboto gere ti ala. Na popo ti azo so kue, tongana nyen a yeke fa ande tënë na ala so a lingbi?​—Mat. 10:11.

³ A lingbi ti wara ambeni na ndo ti kusala ti ala. Même na yâ ti akete kodoro, awara ando ti salango ye so azo mingi aduti dä na yâ ti kota mbage ti lango oko oko ti ala. Na yâ ti akota gbata, azo so asala kusala na yâ ti a-usine wala akota biröo, nga na ala so alango na yâ ti akota da so zo alï dä kirikiri pëpe, ayeke wara fango tënë, ti mingi ni ayeke ti fani oko ni. Na nda-yenga, na popo ti ala so awara ala tongana ala yeke tambela na yâ ti mbeni parc, na mbeni ndo ti hungo tele, mbeni camping wala na yâ ada na yaka, ala so ayeke ku na ndo ti ziango akutukutu wala na ando ti dengo buze, ambeni ayeda na nzo tënë.

⁴ Mbeni wungo ti aita mingi asala ngangu ti fa tënë na ando so azo ayeke dä mingi, na ndo so alingbi ti wara azo. Kozoni kue, aTémoin so agi bê ti ala, nga mbito agbu ala kete, teti lakue ala yeke fa ka tënë na mbeni lege so aluti nzoni, na tapande ti guengo da na da. Ala sala ye fadeso tongana nyen?

⁵ Mbeni ita so ayeke na kode atene: “Kusala ti mbi akiri awara ngangu!” Mbeni atene: “Ye so amû maboko na mbi ti zia bê ti mbi na ndo ti kusala ni.” Mbeni pionnier so aga mbakoro awe atene: “Ye so akiri amû na mbi ngangu na lege ti bibe, mitele na yingo, . . . na mbi ngbâ lakue ti gue na li ni!” Mbeni wafango tënë abâ so lo wara azo mingi so kozoni asala tënë lâ oko pëpe na aTémoin ti Jéhovah. Apendere nga aye ti mû mbage ti ala na kusala so amû ngia na zo. Mbeni oko na popo ti ala asala tënë tongaso: “A yeke pendere mingi teti e sala tënë na azo mingi.” Mbeni atene: “Kozoni mbi zia ambeti mingi tongaso lâ oko pëpe!” A wara atënë tongaso na yâ ti mbeni territoire so afa tënë dä lakue.

⁶ Asurveillant so ague na ndo nde nde ayeke mû li ni: Na hingango so ‘ye ti sese so ayeke gbian,’ Société ahunda na asurveillant so ague na ndo nde nde ti changé yâ ti programme ti fango tënë ti ala ti yenga oko oko si a fa nzo tënë ti Royaume na azo kue so ala lingbi ti wara (1 aCor. 7:31). Ngbele ye a ninga angu mingi awe, asurveillant ti circonscription abata andapelele ti ala ti fa tënë da na da, na peko ti midi ti ala teti sala na afini vizite nga amandango Bible. Peut-être programme so angbâ na ngangu na ambeni ndo. Na yâ ti ambeni, a yeke sala kota ye pëpe na fango tënë da na da na ambeni ndapelele. Tongana a yeke tongaso, fade asurveillant so ague na ndo nde nde abâ peut-être so a yeke nzoni ti mû tongo nda ti ndapelele ni na fango tënë magasin na magasin wala na ndo lege. Lo lingbi nga ti leke aye ti tene akete bungbi ti aita afa tënë na yâ ti biröo, avaka ti dengo buze, ando ti ziango akutukutu wala ambeni ndo teti azo kue. Tongana awafango tënë asala kusala nzoni ahon na ngoi so ala yeke mû na fango tënë, fade a yeke wara azo mingi.

⁷ Atondo afa so asurveillant so ague na ndo nde nde nga na awafango tënë ayeda nzoni mingi na agbiango ye so. Abungbi ti a-ancien ahunda na surveillant ti circonscription ti leke ambeni wafango tënë na yâ ti ambeni mbage ti kusala so a lingbi ti tara ni na yâ ti kodoro ti ala. A yeke nzoni ti tene awafango tënë ague na tele ti surveillant so ague na ndo nde nde na yâ ti akusala so. Na pekoni, ala lingbi ti leke ambeni zo (2 Tim. 2:2). Tongaso, azo mingi ahon amä fadeso nzo tënë.

⁸ Biani a hunda i pëpe ti ku vizite ti surveillant ti circonscription si i tara ambeni kode ti fango tënë so. Bâ ambeni tënë so peut-être a lingbi na territoire ti i:

⁹ Fango tënë na ndo lege: Na fango tënë na yâ mbeni vaka so azo ayeke dä pëpe na ndapelele na yâ yenga, ngoi na ngoi e hunda tele ti e: ‘Azo ni ayeke na ndo wa?’ A lingbi ti wara ambeni na ngoi so ala yeke gue ti vo aye ti ala. I tara awe ti wara ala na fango tënë na ndo lege? Mbage ti kusala so alingbi ti lë lengo tongana e sala ni na lege ni. Ahon ti ngbâ gi na ndo oko na apériodique na maboko, a yeke nzoni ti ga ndulu na azo na ti komanse mbeni nzoni lisoro. A hunda pëpe ti fa tënë na azo kue so ayeke hon na lege. Na tapande, sala tënë gi na ala so atambela hio hio pëpe, ala so ayeke tambela ti bâ ndo na yâ ti amagasin, so aduti na yâ ti akutukutu ti ala so aluti wala so aku abus. A lingbi ti to nda ni na balango zo na ngia na ti ku ti bâ salango ye ti lo. Tongana lo yeke ndulu ti sala lisoro, i hunda bibe ti lo na ndo ti mbeni tënë so alingbi ti gbu bê ti lo.

¹⁰ Na ngoi ti mbeni vizite na yâ ti mbeni kongregation, mbeni surveillant so ague na ndo nde nde ahunda na ambeni wafango tënë omene ti gue na lo nga na wali ti lo ti fa tënë na ndo lege. Ye nyen asi na pekoni? Lo tene: “E sala pendere kusala! Azo kue ayeke na ndo ti ala. E zia apériodique 80 nga na atract mingi. E sala apendere lisoro mingi. Mbeni ita, so afa tënë na ndo ti lege ti fani oko ni, atene: ‘Mbi yeke na yâ ti tâ tënë a ninga ngu mingi na mbi hinga pëpe ye so mbi yeke hon na tele ni!’ Na nda ti yenga, tanga ti apériodique kue so ayeke na yâ ti kongregation ahunzi.”

¹¹ Tongana lo gue na yâ ti kongregation ti peko, oko surveillant so amä so ambeni ita ague ti fa tënë na lege hio na ndapelele, me ala wara nzoni lengo mingi pëpe. Mbeni ita-wali asala tënë gi na azo use na ngoi ti fango tënë ti lo, teti atanga ni kue so lo wara ala yeke tambela hio hio ti gue na kua. Surveillant so awa zo oko oko ti kiri na ndo oko lege so na ziango ngbonga ahon kete. A yeke ye so ala sala, na ala ngbâ dä juska na midi. Ita-wali so asala lisoro gi na azo use kozoni asala nzoni ahon na use ngoi ni. Lo zia apériodique 31 na abrochure 15, lo wara iri nga na adresse ti azo mbasambala na lo komanse mandango Bible na azo use! Ambeni wafango tënë ti yâ ti bungbi ni awara nga alengo so amû wâ na zo.

¹² Tongana i wara mbeni zo so asala nzara ti tënë ni, i sala ngangu ti wara iri ti lo, adresse ti lo na numéro ti téléphone ti lo. A hon ti hunda na lo ye so kue hio tongaso, i lingbi ti tene: “Lisoro so anzere na mbi mingi. Lege ayeke dä ti kiri ti sala ni mbeni lâ?” Wala i hunda na lo: “Lege ayeke dä ti wara i na ndo ti i?” Na salango tongaso, azo mingi ayeda ti tene a kiri a bâ ala ndo ti ala. A lingbi e duti na ambeti ti tisango ndo ndulu na tele ti e ti sala kusala na ni ti mû na azo kue so aye ti gue na abungbi ti e.

¹³ Tongana i sala tënë na mbeni zo so asala nzara ti tënë ni me lo lango na territoire ti mbeni kongregation nde, a lingbi i tokua atënë na ndo ti lo na aita so ayeke kâ si ala lingbi ti leke ti bâ zo ni. Fade fango tënë na ndo lege alingbi ti mû maboko ti kangbi nzo tënë mingi ahon na yâ ti kodoro ti i? Tongana a yeke tongaso, i kiri i bâ article so atene “E wara azo so alingbi na lege ti fango tënë na ndo lege na kode ti nzoni ahon”, so asigigi na yâ ti Kusala ti Royaume ti janvier 1995. Na pekoni i leke tele ti i ti mû mbage na fango tënë na ndo lege na ngbonga so alingbi na ni, na so fade ayeke mû maboko na i ti wara azo mingi.

¹⁴ Fango tënë na yâ ti akutukutu ti yongo azo: Na mbeni ndapelele, apionnier aleke ti fa tënë na azo so ayeke ku bus na tele ti mbeni kota da ti mandango mbeti. Ala sala apendere lisoro, me mbeni kpale ayeke na gbele ala. Na ngoi so lisoro ni aga nzoni, bus ni aga, ye so asala si lisoro ni akaï fade fade. Apionnier so aleke kpale ni na kongo na yâ ti bus ni na ala ngbâ ti fa tënë na azo so ayeke na yâ ni, na ngoi so ala yeke tambela na yâ ti kodoro ni. Tongana ala si na nda ni, apionnier ni angbâ lakue na yâ ti kutukutu ni ti kiri, na fango tënë lakue. Na pekoni so ala gue na ala ga fani mingi, ala sala tënë ti ye so ala wara: Ala zia apériodique ahon 200 na ala komanse mandango Bible omene. Ambeni zo ti yâ ti kutukutu ni ayeda ti fa adresse ti ala na numéro ti téléphone ti ala si a lingbi ti gue ti bâ ala na ndo ti ala. Na yenga ti peko, apionnier so akiri na ndo ti lutingo ti abus so na ala sala ye legeoko. Ala zia apériodique 164 na ala komanse mbeni fini mandango Bible. Na mbeni ndo ti lutingo ti abus, mbeni zo ako na yâ ti bus na lo duti na oko ndo so angbâ: na tele ti mbeni pionnier. Lo bâ ita ni na lo tene na lo na ngia: “Mbi hinga so ala yeke na mbeni Tour ti Ba Ndo teti mbi!”

¹⁵ Aita mingi afa tënë nzoni tongana ala tambela na bus, na train wala na lapara. Tongana nyen e lingbi ti komanse mbeni lisoro na zo so ayeke na tele ti e? Mbeni wafango tënë ti ngu 12 ayeda gi ti komanse ti diko Réveillez-vous! na yâ ti bus, na beku ti zingo nzara ti tënë ni na bê ti mbeni maseka so ayeke na tele ti lo. A yeke ye so asi. Maseka wali so ahunda na lo ye so lo yeke diko, lo kiri tënë lo tene a yeke mbeni article na ndo ti yorö ti akpale so apendere alingbi ti luti na gbele ni. Lo tene so article ni aga na lo ye ti nzoni mingi na lo nga kue lo lingbi ti wara ye ti nzoni dä. Lo yeda na apériodique ni na ngia. Ambeni pendere use amä nga lisoro ni na ala hunda ambeni périodique. Na ndo ni, zo ti kpengo na kutukutu ni aluti na tele ti lege na lo hunda aye ti nzoni wa ayeke na yâ ti apériodique so. Na peko ti so lo gbu nda ni, lo ye nga da na ambeni. Biani, ye so kue alingbi ti si pëpe tongana wafango tënë so ade pendere ayeke na apériodique mingi pëpe na tele ti lo ti mû na ala so asala nzara ti tënë ni!

¹⁶ Fango tënë na yâ ti aparc nga na ando ti ziango akutukutu: Tongana ngoi ayeke nzoni, fango tënë na yâ ti aparc nga na ando ti ziango akutukutu aduti mbeni nzoni lege ti ndu azo. I tara awe ti fa tënë na ndo ti ziango akutukutu ti mbeni ndo ti dengo buze? Na singo na ndo ti ziango akutukutu ni, i bâ ndo na tele ti i teti ngoi kete. I gi zo so asala ye hio hio pëpe wala zo so ayeke ku na yâ ti kutukutu ti lo so aluti, na e tara ti komanse lisoro na lo na ngia. Tongana lisoro ni angbâ ti gue, i fa tënë ti Royaume. I tara ti duti gi i oko me ndulu na tele ti mbeni wafango tënë. I mû pëpe mbeni bozo so alingbi ti kanga lege na i wala i gboto pëpe lê ti azo na alege nde nde na ndo ti kusala ti i. I sala ye na ndara. A yeke peut-être nzoni ti ngbâ gi ngoi kete na mbeni ndo oko ti ziango akutukutu na pekoni ti gue na mbeni nde. Tongana mbeni zo aye pëpe ti sala lisoro na i, i zia lo yeke na i tara ti sala tënë na mbeni zo nde. Na salango ye tongaso, mbeni ita-koli azia apériodique 90 na nze oko na lege ti fango tënë na ando ti ziango akutukutu.

¹⁷ Ambeni zo ague na yâ ti parc ti gboto gere ti ala, ti sala ngia wala ti duti na amolenge ti ala na ndo oko. Na bubango yâ ti akusala ti ala mingi pëpe, i gi mbeni lege ti fa tënë. Mbeni ita-koli akomanse ti sala lisoro na mbeni zo ti batango parc na lo bâ so koli ni ayeke gi bê ti lo teti mbangi nga teti kekereke ti amolenge ti lo. A komanse mbeni fini mandango Bible, na a yeke sala ni lakue na yâ ti parc ni.

¹⁸ Fango tënë na ngoi kue so azi na e na yâ ti ando ti dengo buze: Atâa so a lingbi lakue pëpe ti fa tënë magasin na magasin na ando ti dengo buze ndali ti andia ti kodoro oko oko, ambeni ita agi alege ti fa tënë na ngoi so lege azi na ala. Ala duti na ndo ti mbeni mbata na ala komanse mbeni lisoro na ngia na azo so aluti ti hu tele ti ala. Tongana azo ni asala nzara ti tënë ni, ala fa na ala na lege ti ndara mbeni tract wala mbeni périodique na ala sala ngangu ti leke aye ti kiri ti bâ ala. Na pekoni so ala mû penze-ngbonga kete ti fa tënë na mbeni mbage ti ndo ti dengo buze ni, ala gue na mbeni mbage ni nde ti sala lisoro na ambeni zo. A yeke ti zo oko oko ti duti na donzi ti gboto lê pëpe tongana lo yeke fa tënë na lege kue so azi tongaso.

¹⁹ Tongana i bala mbeni zo, i komanse ti sala lisoro na lo na ngia. Tongana wamango i amû mbage ti lo na lisoro ni, i hunda tënë na lo na i mä lo nzoni tongana lo yeke sala tënë. I bi bê biani na ye so lo yeke tene. I fa na lo so i bâ tënë ti lo na nene ni. Tongana a lingbi ti sala ni, i tene na lo so i yeda na lo.

²⁰ Mbeni ita-wali awara lege ti sala pendere lisoro na mbeni kangba-wali na tenengo na lo so ngele ti aye ague na li ni mingi. Fade fade wali ni ayeda, ye so azi lege na mbeni pendere lisoro. Ita-wali ni awara lege ti wara iri na adresse ti wali so na lo kiri ti bâ lo na yâ ti yenga ni.

²¹ Fango tënë magasin na magasin: Na yâ ti territoire ti ambeni kongregation awara mbeni vaka so ayeke gi amagasin. Ita so ayeke bâ lege ti aterritoire alingbi ti leke acarte ti ando so awadengo buze ayeke dä nde. A yeke fa polele na ndo ti aterritoire kue so avaka tongaso ayeke dä so ayeke sala vizite na awadengo buze na mbeni ngoi nde. Na yâ ti ambeni territoire, a lingbi ti sala vizite na ando ti dengo buze legeoko na ada ti lango. A-ancien alingbi ti tene na aita so ayeke na kode ti fa tënë lakue na aterritoire ti dengo buze si a zia na peko pëpe fango tënë magasin na magasin.

²² Tongana a hunda na i ti fani oko ni ti mû mbage ti i na kusala so, mbeni nzoni lege ti ‘duti na mbito pëpe’ ayeke ti gue kozoni na akete magasin; na pekoni, tongana tele ti i anzere awe, i sala kusala ni na yâ ti akota ni (1 aThes. 2:2). Tongana i yeke fa tënë magasin na magasin, i yü bongo nzoni legeoko tongana i yeke gue na bungbi na Da ti Royaume. Tongana lege ayeke dä, i lï na yâ ti magasin ni tongana azo ayeke dä pëpe so ayeke ku ti tene a kä ye na ala. I hunda ti sala tënë na mbeni zo ti kango ye ni wala na lo so abâ ndo na ndo ti magasin ni. I sala tënë na wâ, na mbilimbili, i sala ni ndulu. A yeke ngangu pëpe ti hunda pardon. Awadengo buze mingi ayeke sala kusala teti azo so aga ti vo ye, na ala hinga so mbeni zo alingbi ti ga ti fâ yâ ti kusala ti ala.

²³ Na pekoni so i bala mbeni wadengo buze awe, i lingbi ti tene: “Awadengo buze ayeke sala kusala mingi, tongaso a yeke ngangu ti wara ala na ndo ti ala; ndali ni la, e ga ti bâ ala na ndo ti kusala ti ala ti fa na ala ti diko mbeni article so alingbi ti pusu zo ti gbu li ti lo.” Sala ndulu tënë oko wala use na ndo ti afini périodique.

²⁴ Tongana i yeke sala tënë na zo ti kango ye ni, i lingbi ti tara ti tene: “I bâ so awadengo buze ayeke na nzara ti hinga ye nzoni. Fini numéro ti Tour ti Ba Ndo (wala ti Réveillez-vous!) so ayeke na mbeni article so abâ zo oko oko kue na popo ti e.” I fa nda ti ye ni na i hunzi na tenengo tongaso: “E hinga biani so dikongo ni ayeke nzere ande na mo mingi.”

²⁵ Tongana azo ti kusala ayeke dä, i lingbi ti tene tongana lege ayeke dä: “Mo yeda nga ti tene mbi fa ni hio na azo ti kusala ti mo?” Tongana azi lege na i, i girisa pëpe so i mû yanga ti sala tënë gi ndulu, na zo ti kango ye ni aku ti tene i sala ye alingbi na tënë ti i. Tongana azo ti kusala ni aye ti sala lisoro aninga, a yeke nzoni ti gue ti bâ ala na da ti ala.

²⁶ Na yâ ti mbeni kete gbata, awafango tënë ague na surveillant ti circonscription na yâ ti fango tënë magasin na magasin. Na tongo nda ni, mbito agbu ambeni, teti ala mû mbage ti ala dä kozoni pëpe; me tele ti ala anzere fade fade na ala sala nzara ni. A si même na ngbonga oko pëpe, ala sala lisoro na azo 37 na ala zia apériodique 24 na abrochure 4. Mbeni ita-koli afa so na mbeni senge ngoi a lingbi pëpe ti wara azo mingi tongaso da na da na yâ ti nze oko tongana ti so ala sala lani magasin na magasin gi na yâ ti kete ngoi.

²⁷ E gbu alege kue so azi ti fa tënë: Jésus angbâ gi pëpe na ndo ti fango tënë so aleke tele ngbanga ni. Lo fa nzo tënë lakue tongana lege ayeke dä (Mat. 9:9; Luc 19:1-10; Jean 4:6-15). Zia e bâ tongana nyen aita ayeke gbu alege kue so azi na ala ti fa tënë.

²⁸ Ambeni afa tënë lakue na ababâ na mama so ayeke ku amolenge ti ala na yanga ti da-mbeti. Teti so ambeni babâ na mama aga na ndo so asala ndulu na penze-ngbonga 20 kozoni, ala wara ngoi ti sala lisoro so awa zo na ndo ti Bible.

²⁹ Ambeni pionnier asala ngangu ti wara azo so ambeni tënë so asigigi na yâ ti apériodique ti e andu ala mbilimbili. Na tapande, mbeni ita-wali awara nzoni lengo na guengo na a-ekole omene so ayeke na yâ ti territoire ti kongregation ti lo na ti fa na ala li ti tënë so atene “L’école en crise”, so asigigi na yâ ti Réveillez-vous! ti 22 décembre 1995. Lo gue nga na ando ti mungo maboko na azo na apériodique na ndo ti fini ti sewa nga na ndo salango ngangu na amolenge, na a hunda na lo ti kiri na ambeni numéro so andu mara ti atënë so. Lo bâ tongana mbeni salango ye so ayeke “gi oko” salango ye so lo bâ na yâ ti mbeni ndo ti mungo zo na kua na mbage ti Réveillez-vous! ti 8 mars 1996 na ndo ti chômage.

³⁰ Mbeni surveillant ti district atene so mingi ni lo yeke fa tënë na ngoi so azi na gbele lo tongana lo na wali ti lo ayeke gue ti vo aye. Ala yeke soro mbeni ngoi so azo ayeke mingi pëpe na yâ ti magasin nga azo ti vongo ye ayeke tambela yamba na yâ ti magasin ni. Tongaso ala sala pendere lisoro mingi.

³¹ Aita mingi awara anzoni lengo na fango tënë na yâ ti akete ndo ti tengo kobe na tele ti lege. Ala yeke zia ambeti kâ pëpe gi tongaso, tongana zo oko ayeke dä pëpe. Bibe ti ala ayeke ti fa nzo tënë na azo, tongaso ala sala ngangu ti sala tënë na azo oko oko so aga ti vo ye.

³² Na yâ ti ambeni ndo, aita afa tënë na yâ ti gbagba ti lapara. Ngoi na ngoi ala wara ngia ti fa tënë na azo so ayeke gue na ndo nde nde na ndo ti sese, na so aduti na yâ ti akodoro so a wara aTémoin ti Jéhovah dä mingi pëpe. Tongana azo so asala nzara ti tënë ni, ala zia na ala atract wala apériodique.

³³ Tongana lege ayeke dä pëpe, na yâ ti territoire ti kongregation, ti fa tënë na azo so alango na yâ ti akota da so abata yanga ni ngangu, ambeni ita ayeke fa tënë na ndara lakue na asinziri so ayeke na yanga ti da ni wala na azo so abâ lege ti batango da ni na biröo ti ala. Ala sala nga legeoko na yâ ti agbagba ti azo mveni na so a bata ni. Mbeni surveillant ti circonscription na ambeni wafango tënë asala ye alingbi na akode so na yâ ti ada ti lango mbasambala. Na da oko oko, ala fa na zo so abâ lege ti batango da ni so atâa a mû lege na ala pëpe ti bâ azo ti da ni tongana ti so ala yeke sala lakue, ala ye pëpe ti gbanzi na lo atënë so ayeke na yâ ti afini périodique ti e. Azo so abâ lege ti bata ada mbasambala so ayeda na ngia ti wara apériodique na ala hunda ti wara anuméro so ayeke ga na pekoni! Ti ala so alango na yâ ti ada ni, ngoi na ngoi a wara ala na lege ti téléphone. Fade mo yeke wara asango so alingbi ti mû maboko na mo na yâ ti supplément ti Kusala ti Royaume ti nze ti février 2001 na ndo li ti tënë “Fango Tënë na Singa so Alë Lengo.”

³⁴ E sala ngangu ti fa tënë na ndo kue: Ti sala ye alingbi na mungo tele ti e na Nzapa, a lingbi ti tene e hinga so kusala ti fango tënë ti Royaume so amû na e ayeke ti sala ni hio. Tongana e ye ti wara azo na ngoi so alingbi teti ala, a lingbi e pensé pëpe na ndo ti aye so e ye si “e lingbi sö ambeni zo.” Awakua ti Jéhovah so amû tele ti ala na lo na so awara batême ayeke na nzara ti kiri na ndo ti tënë ti bazengele Paul, so atene: “Mbi sala ye kue teti Tene-nzoni, si mbi lingbi wara ye ti Tene-nzoni legeoko na ambeni zo.”​—1 aCor. 9:22, 23.

³⁵ Paul asû na mbeti na pekoni: “Tongaso mbi yeke na ngia mingi ahon ti yä iri ti mbi teti ngangu pëpe ti mbi, si ngangu ti Christ alingbi duti na ndo mbi.. . . Teti tongana mbi yeke na ngangu pëpe, ka mbi yeke ngangu.” (2 aCor. 12:9, 10). Ti tene ni nde, zo oko oko na popo ti e alingbi pëpe ti sala kusala so na ngangu ti lo mveni. A lingbi e sambela Jéhovah ti wara ngangu ti yingo vulu ti lo. Tongana e hunda na Nzapa ti mû na e ngangu, e lingbi ti hinga biani so fade lo yeke kiri tënë na asambela ti e. Fade ndoye ti e teti ambeni zo ayeke pusu e ti gi alege kue ti fa na ala nzo tënë na ndo kue so ala yeke dä. Na yâ ti yenga so ayeke ga, ngbanga ti nyen ti tara pëpe oko ti awango so amû na yâ ti supplément so?