Nzoni kode ti fango tënë na ndo ti lege
1. Mbeni lege so e lingbi ti mû tapande ti Jésus dä ayeke so wa?
1 Na ngoi ti fango tënë ti lo na ndo ti sese, Jésus agi bê ti lo lani pëpe ti sara tënë na azo so lo tingbi na ala na ndo ti lege nga na ambeni ndo so gbâ ti azo ayeke dä (Luc 9:57-61; Jean 4:7). Lo ye lani ti fa kpengba sango so lo yeke na ni na azo mingi. Laso, fango tënë na ndo ti lege ayeke mbeni pendere lege ti mû maboko na azo ti wara ndara ti Nzapa (aProv. 1:20). E lingbi ti sara nzoni kua tongana e la e mû li ni kozo nga tongana e sara ye na ndara.
2. Tongana nyen e lingbi ti mû li ni kozo na ngoi so e yeke fa tënë na ndo ti lege?
2 Mû li ni kozo: Mingi ni a yeke nzoni ti tene mo la mo gue nduru na azo ahon ti tene mo luti wala mo duti gi place oko ti ku ti tene azo so ayeke hon la aga na tere ti mo. He ngia kete, nga mo bâ lê ti zo ni. Mingi ni tongana mo na ambeni wafango tënë la ayeke fa tënë, a yeke nzoni ti tene ala kangbi yâ ti tere ti ala na ngoi so ala ye ti fa tënë na azo. A hunda nga ti tene mo mû li ni kozo ti kiri ti bâ zo so asara nzara ti tënë ni. Tongana lege ayeke dä, na nda ti lisoro ni, na mbeni lege so ane zo hunda na zo ni tongana nyen mo lingbi ti kiri ti wara lo. Ambeni wafango tënë ayeke fa tënë na ndo ti lege lakue lakue na même place ni, tongaso si amû lege na ala ti fa tënë na amême zo lege mingi si ala ngbâ ti zia nzara ti tënë ni na bê ti azo ni.
3. E lingbi ti sara ye na ndara tongana nyen na ngoi so e yeke fa tënë na ndo ti lege?
3 Sara ye na ndara: Sara ye na ndara na ngoi so mo yeke soro ndo so mo yeke luti dä nga zo so mo ye ti gue na mbage ti lo. A hunda pëpe ti fa tënë na azo oko oko kue so ayeke hon na lege. Hinga ti bâ ndo. Na tapande, tongana zo ni ayeke tambela na loro, a yeke peut-être nzoni ti zia lo lo hon. Tongana mo yeke fa tënë na devant ti mbeni ndo ti kango ye, sara ye na ndara si mo kpe ti sara si wa ti ndo ni agi bê ti lo senge senge pëpe. A yeke ka nzoni ti fa tënë na azo so avo ye si ayeke sigigi ti ala sigingo ahon ti fa tënë na azo so ayeke lï lingo. Ga na mbage ti azo ni na mbeni lege so azia mbeto na bê ti ala pëpe wala ti sara si ala gi bê ti ala pëpe. Nga, sara ye na ndara na ngoi so mo yeke zia mbeti na azo. Tongana azo ni asara nzara ti tënë ni nzoni pëpe, mo lingbi ti zia na ala ambeni tract ahon ti zia na ala apériodique.
4. Fango tënë na ndo ti lege ayeke mbeni lege ti fango tënë so aga na ye ti nzoni na zo nga amû ngia. Ngbanga ti nyen?
4 Fango tënë na ndo ti lege ayeke mû lege na e ti lu gbâ ti ngongoa ti tâ tënë na yâ ti kete ngoi (Zo-ti. 11:6). Ambeni zo so e tingbi na ala alingbi même ti duti azo so ayeke ngangu na e ti wara ala na yanga-da ti ala na ngoi so e yeke fa tënë da na da. Fango tënë na ndo ti lege ayeke mbeni lege ti fango tënë so amû ngia nga so alë lengo. Ngbanga ti nyen ti leke ti mû mbage ti e dä pëpe?