Abungbi ayeke mû maboko na amaseka
1 Mbeni maseka-wali atene: “Na ambeni ngoi na yâ ti gigi ti ala, amaseka ayeke tingbi na akpale so ayeke ngangu mingi. Azo so angoro e ayeke sara lango-sioni, ala ayeke nyon ambangi nga ala yeke nyon sämba mingi.” Mo kue mo pensé tongaso? Tongana a yeke tongaso, mo pensé nyen la alingbi ti mû maboko na mo ti hon ndo ti asioni sarango ye so? Mo yeke na bezoin ti mbeni mabe so akpengba so amû lege na mo ti hinga so andia ti Jéhovah ayeke na lege ni, ndali ti so tongana mabe ayeke dä pëpe “zo alingbi ti nzere na lê ti Nzapa pëpe”. (aHéb. 11:6). Guengo na abungbi ayeke mû ande maboko na mo ti ngbâ ti bata dutingo ti mo ti Chrétien nga ti leke na bê ti mo kue ti kpe aye ti sioni.
2 Abungbi alingbi ti ga na mo aye ti nzoni mingi: Nyen la a yeke sara si tongana mo yeke te kobe na akota kamarade ti mo tere ti mo ayeke nzere? A yeke ndali ti so ala bungbi ndo oko ti te kobe ni nga ti sara anzoni lisoro. A yeke nga mara ti aye so e yeke wara na lege ti yingo na ngoi ti abungbi ti e la.
3 Aye so a yeke sara lisoro na ndo ni na abungbi ayeke kpengba zo. A londo na atënë so andu agingo bê ti lâ oko oko ti si na atënë ti aprophétie ti Bible so agbu bê ti zo. A yeke mû nga anzoni wango so ayeke fa na mo tongana nyen ti duti na mbeni fini so ayeke nzoni nga ti hon ndo ti akpale so mo yeke tingbi na ni. Akamarade so mo yeke wara na ngoi ti abungbi a yeke akamarade so mo yeke wara mara ni na mbeni ndo nde ape, nga mo yeke bâ ngia so ayeke na popo ti aita nga kpale oko ayeke dä ape (Ps. 133:1). A yeke ye ti dongo bê pëpe so mbeni maseka-wali atene: “So mbi yeke gue na ekole na ndapre juska na lakui, asara si mbi fatigué. Me abungbi ayeke tongana mbeni kete gbako so ngu ayeke dä na yâ ti désert. Tongana mbi gue kâ, mbi yeke wara ngangu so ayeke mû lege na mbi ti luti na gbele akpale so mbi yeke wara na ndade ni na ekole.” Mbeni maseka-wali ni nde atene: “Mbi bâ so sarango kamarade na azo so aye Jéhovah amû maboko na mbi ti ngbâ nduru na lo.”
4 Tongana mo zia iri ti mo na Ekole ti Kusala ti aChrétien, a yeke fa na mo tongana nyen ti bungbi asango so mo wara na yâ ti Bible, ti sara na devoir wala diskur na ti fa ni na gbele azo so aga na bungbi ni na atënë ti mo wani. Mo bâ pasa so mo yeke na ni so? Ekole ti kusala ti aChrétien ayeke sara si mo yeke wara kode ti fa atâ tënë ti Bible so ayeke sara si azo asö fini ti ala. Mbeni ndo nde so amaseka alingbi ti wara mara ti anzoni fango ye tongaso ayeke dä?
5 Lege ti wara aye ti nzoni mingi na ngoi ti abungbi: Aye ota alingbi ti sara si zo awara aye ti nzoni na ngoi ti abungbi. A yeke ti leke abungbi ni, ti kiri tënë nga ti sara ye alingbi na aye so mo manda na ngoi ti abungbi ni.
6 Leke abungbi ni: Zia mbeni ngoi nde ti mû lege na mo ti leke abungbi lakue. Zia pëpe si adevoir ti mo ti ekole, kua ti nginza ti mo, wala ambeni ngia amû ngoi so mo zia ni nde ti leke na ambage ti bungbi so a yeke sara lisoro na ndo ni. Sarango tongaso ayeke mû maboko na mo ti duti na mbeni nzoni kapa ti lekengo abungbi. Kozoni kue, ngbâ lakue ti mû peko ti kapa ti dikongo Bible yenga oko oko so a leke ni ndali ti Ekole ti Kusala ti aChrétien. A hunda gi mbeni kete penze-ngbonga tongaso ti diko achapitre ni nga ti gbu li na ndo ni. Zia nga mbeni ngoi ni nde ti tene mo leke na bungbi ti Mandango Bible ti Congrégation nga na Tour ti Ba Ndo. Ambeni ita ayeke sara tongaso lango oko wala use kozo na abungbi ni. Tongana lege ayeke dä, sara nga tongaso ndali ti ambage ti Bungbi ti Kusala yenga oko oko.
7 Kiri tënë na ngoi ti abungbi nga zia li ti mo kpô: Bible atene so Jésus ayeke lani na ngu 12 la a wara lo na yâ ti temple, lo yeke mä awafango ye, lo yeke hunda tënë na ala nga lo yeke kiri tënë na ala (Luc 2:46, 47). So aye ti tene so, Jésus amû lani tere ti lo kue na yâ ti lisoro ni. Mo yeke wara aye ti nzoni mingi na ngoi ti abungbi tongana mo kue mo yeke sara ngangu ti kiri tënë.—aProv. 15:23.
8 A lingbi mo zia li ti mo kpô na ndo ti aye so a yeke fa na ngoi ti abungbi ni. Ngoi na ngoi, ti dengi mê na mbeni diskur ayeke ngangu ahon mungo ni. Ngbanga ti nyen? Ngbanga ti so pensé ti mo alingbi ti hon ayo na ngoi so zo ni ayeke sara tënë. Tongana nyen la mo lingbi ti dengi mê nzoni? Gi tongana mo mû anote. Sû na mbeti ambeni kota tënë so mo ye ti kiri ti bâ ni ande. Mungo note ayeke mû maboko na mo ti zia li ti mo kpô na ndo ti bungbi ni. Nga, gi aversê na yâ ti Bible ti mo na bâ ni legeoko na wamungo diskur ni na ngoi so lo yeke diko ni.
9 Na ndo ni, zia na gbele mo ti kiri tënë na ambage ti bungbi so a hunda ti kiri tënë dä. Mo yeke wara ye ti nzoni mingi tongana mo gbu li nzoni kozo ti tene mo sara tënë. A-Proverbe 15:28 (FD) atene: “Zo ti mbilimbili agbu li ti lo nzoni kozo si lo kiri tënë.”
10 Sara ye alingbi na aye so mo manda na ngoi ti abungbi: Ndangba ye ni a yeke ti bâ wala aye so mo manda ayeke sara “kua na yâ ti bê” ti mo (1 aThes. 2:13). Tongana mo sara ye alingbi na anzoni ye so mo manda na ngoi ti abungbi oko oko kue, mo yeke ga nduru mingi na Jéhovah ahon ti kozo. Lo yeke ga tâ zo na lê ti mo, nga mo yeke wara ande ngia mingi tongana mo ‘ngbâ ti tambela na yâ ti tâ tënë,’ na bê ti mo kue.—3 Jean 4.
11 Amaseka, tongana ala yeke leke abungbi ti ala lakue, ala yeke kiri tënë na ngoi ti abungbi ni, nga tongana ala yeke sara ye alingbi na aye so ala manda, abungbi ni ayeke nzere ande na ala mingi. Na mbage, ala yeke wara ande aye ti nzoni mingi. Mabe ti ala ayeke kpengba, tongana ti so ala leke na bê ti ala kue ti ngbâ be-ta-zo na Jéhovah, Babâ ti e ti yayu.—Ps. 145:18.