Fango tënë na yâ mbeni sese so ayeke gbian lakue
1 Aye ayeke gbian na loro biani! Gi fade fade, aye tongana yengingo ti sese, kota kpale ti mosoro, gbiango ye ti poroso, wala kota ye ti mawa so a sala tënë na ndo ni mingi alingbi ti ga tënë so amû yanga ti azo kue. Me hio nga azo alingbi ti bi lê ti ala na mbeni ye nde (Kus. 17:21; 1 aCor. 7:31). Na yâ mbeni sese so ayeke gbian lakue, tongana nyen e lingbi ti gboto lê ti azo, si e lingbi ti fa tënë ti Royaume na ala?
2 Bâ nzoni aye so agi bê ti azo: Mbeni lege ti gboto lê ti azo ayeke ti sala tënë ti aye so asi ade ti ninga pëpe. Ti mû wango na azo so ayeke mä lo ti gbu li nzoni na ndo dutingo ti ala na gbele Nzapa, mbeni lâ, Jésus asala tënë ti ambeni ye ti mawa so asi, so ala de ti girisa ni pëpe (Luc 13:1-5). Legeoko nga, tongana e yeke fa nzo tënë, a yeke nzoni e sala tënë ti ambeni fini sango wala mbeni tënë so andu fini ti azo ti territoire ni. Ye oko, tongana e yeke sala lisoro na ndo mara ti atënë tongaso, a lingbi e sala hange si e mû pëpe mbage ti atënë ti poroso wala ti kodoro ni.—Jean 17:16.
3 E lingbi ti hinga ye so azo ayeke bi bê na ndo ni fade fadeso tongana nyen? Peut-être pendere nzoni lege ni ayeke gi ti hunda mbeni tënë na ti mä kiringo tënë ni (Mat. 12:34). Tongana e sala nzara ti azo, fade a yeke pusu e ti bâ na nene ni tënë ti bê ti ala nga ti hunda na kode ambeni tënë na ndo ni. Tënë so asigigi hio na yanga ti mbeni zo so e sala tënë na lo alingbi ti fa na gigi ye so agbu bê ti azo mingi ti ndo ni, na a lingbi ti mû lege ti fa tënë.
4 Lekengo mbeni tënë ti fa: Na yâ lekengo tele teti fango tënë na yâ mbeni sese so ayeke gbian lakue, e lingbi ti sala kusala na brochure Lege ti To Nda Na ti Ngbâ ti Sala Alisoro na ndo Bible. A wara na alembeti 2 nga na 6, na gbe ti tënë “Atene ti sango” nga “Ye so ake ndia/Nzoni dutingo”, apendere wango na ndo tongana nyen ti yôro aye so asi ade ti ninga pëpe na yâ fango tënë ti e. Tongana mo yeke leke ni, sala kue ti yôro na yâ ni mbeni versê so alingbi.
5 Na ngoi so e yeke bâ nzoni aye so ayeke ndu bê ti azo ti ndo so e fa tënë dä, so ayeke gbian lakue, a yeke nzoni e leke fango nzo tënë ti e alingbi na ni. Tongaso, e yeke sala tënë na azo na ndo ye so andu biani bê ti ala. Na lege so e yeke mû maboko na azo mingi ti hinga ande Lo so ayeke gbian pëpe na yâ alengo nga na andia ti lo.—Jacq. 1:17.