Wara nzoni na lege ti mandango buku Ga ndulu na Jéhovah
1 Na Kota Bungbi ti District “Awakua ti Royaume so ayeke na wâ”, e yeke lani na kota ngia mingi ti wara buku Ga ndulu na Jéhovah. Mingi ti azo adiko buku ni fade fade. Kite ayeke dä pëpe so versê ti ngu 2003 “I ga ndulu na Nzapa, na fade Lo ga ndulu na i”, apusu lani mingi ti ambeni ti sala tongaso (Jacq. 4:8).
2 Na nze ti mars, fade e yeke to nda ti manda buku Ga ndulu na Jéhovah na Mandango Buku ti Kongregation. Tongana nyen e lingbi ti wara ye ti nzoni mingi na lege ti mandango ye ti e? Lekengo tele ayeke kota ye. A yeke mû ande yenga use ti manda chapitre oko oko, nga a leke ti manda gi mbeni kete wungo ti aparagraphe yenga oko oko. So ayeke zia ande na mo ngoi mingi ti mû akiringo tënë so alondo na bê na so aluti na ndo mandango ye ti mo nga na gbungo li ti mo na ndo tënë ni. Na ndo ni, na yâ ayenga so a yeke sala dango bê na ndo ndangba mbage ti mbeni chapitre, a yeke manda ande gi mbeni kete wungo ti aparagraphe. Na lege so, a yeke wara ngoi ti sala kusala na mbeni mbilimbili mbage ti buku ni.
3 A to nda ni na chapitre 2, mbeni encadré so li ti tënë ni ayeke “Atënë ti gbu li dä” asigigi ndulu na hunzingo ti chapitre oko oko. Na peko ti mandango ndangba paragraphe ti chapitre ni, surveillant ti mandango buku ayeke sala ande lisoro na ndo encadré ni na azo ti yâ ti groupe ti lo. Ti tene lo hinga anzoni ye so ala wara na lege ti gbungo li ti ala na ndo aversê, lo yeke wa ande ala ti fa abibe ti ala (aProv. 20:5). Na ndo ahundango tënë so a mû na yâ encadré ni, lo lingbi ngoi na ngoi ti hunda ambeni tënë tongana: “Ye wa atënë ni afa na mo na ndo Jéhovah? Tongana nyen andu fini ti mo? Tongana nyen mo lingbi ti sala kusala na atënë ni ti mû maboko na ambeni zo?” Ye so lo yeke zia ande na gbele lo ayeke ti pusu ala ti sigigi na akiringo tënë so alondo na bê, pëpe ti hunda gbâ ti atënë na ndo anzene nzene tënë so ayeke kota ye pëpe.
4 Ga ndulu na Jéhovah ayeke mbeni buku so ayeke nde mingi. Atâa so ambeti kue ti ‘ngbâa be-ta-zo na ti ndara’ amû gloire na Jéhovah, nda ti buku ni so kue ayeke ti sala tënë na ndo alengo ti Jéhovah (Mat. 24:45-47). So tâ mbeni pendere ye si ayeke ku e! E yeke wara ande ye ti nzoni mingi na lege ti mbeni mandango ye so alï mingi na ndo salango ye ti Jéhovah. Zia mandango ye ni amû maboko na e ti ga ndulu mingi na Babâ ti e ti yayu, na zia e ga azo so alingbi nzoni mingi ti mû maboko na ambeni zo nde ti sala legeoko.