Mandango buku Voro Nzapa

A leke buku Voro oko tâ Nzapa ti manda na ye na afini zo na peko ti so ala hunzi ti manda buku Hingango Ye. Gingo nda ti mbeti so na ngoi ti Mandango Buku ti Kongregation ayeke leke e ande ti sala kusala na gbakuru so na yâ fango tënë, na ti kono ndoye na yekiango ndo ti e teti Jéhovah na bungbi ti lo. Tongana nyen e lingbi ti wara ye ti nzoni mingi na mandango buku Voro Nzapa?

Lege ti mû li ni na Mandango Buku ni: Teti so fade e yeke manda chapitre oko teti yenga oko oko, a yeke kota ye teti asurveillant ti mandango buku ti kangbi yâ ti ngoi ni na lege ti ndara. Fade ala yeke mû ngoi mingi pëpe teti akozo paragraphe ti tene a mû lege na ala ti wara ngoi ti luti mingi na ndo akota tënë, so mingi ni ayeke sigigi na yâ andangba mbage ti chapitre ni. Salango lisoro hio na ndo dango bê so ayeke na yâ ti encadré na hunzingo ti mandango ye oko oko ayeke mû ande maboko na azo so aga ti bata akota tënë ni.

Ahundango tënë teti gbungo li nga teti lisoro asigigi na yâ kota mbage ti achapitre ti buku Voro Nzapa. A lingbi ti wara mbeni tapande ni na alembeti 48-49. A yeke kota ye pëpe ti diko ahundango tënë so legeoko na aparagraphe ni. Na ngoi so a yeke sala lisoro na ndo ahundango tënë so, a yeke nzoni surveillant ti mandango buku ahunda ti tene a diko nga a sala lisoro na ndo aversê so a fa tënë ti yâ ni pëpe, tongana ngoi ayeke dä.

Lekengo tele kozoni: Lekengo tele nzoni teti mandango ye ni andu gi pëpe sungo kamba na gbe ti akiringo tënë ni. Gbungo li na bê kue na ndo aversê ni ayeke mû ande lege na e ti leke gi pëpe akiringo tënë ti e, me mingi ahon so ti leke nga bê ti e (Esdras 7:10). E kue e lingbi ti wa tele na kiringo tënë na tâ be-ti-molenge.​—aRom. 1:11, 12.

Mandango buku Voro Nzapa ayeke mû ande maboko na e ti ga ndulu na Jéhovah, nga ayeke mû na e ye kue so alingbi ti mû maboko na azo ti be-ti-mbilimbili ti bungbi na e na yâ vorongo lo (Ps. 95:6; Jacq. 4:8). Zia e kue e wara ye ti nzoni na lege ti pendere ye ti yingo so a leke.