E wara ngia na yâ mandango buku Bible afa nyen biani?
1 Mbeni ye so amû lani ngia mingi na azo na Kota Bungbi ti District “E mä yanga ti Nzapa” ayeke sigingo ti buku Bible afa nyen biani? Fade na yâ ti kete ngoi, e yeke sara kua ande na fini buku so na fango tënë, mbilimbili tongana e yeke manda Bible na azo. Tongaso, a yeke nzoni e hinga atënë ti yâ ti fini buku so nzoni. Ye so ayeke duti ande ngangu pëpe teti so ti to nda ni na yenga ti 17 avril 2006, e yeke manda ni na Bungbi ti Mandango Buku ti Kongregation.
2 Fade surveillant ti Mandango Buku ti Kongregation ayeke gboto lê ande na ndo ahundango tënë so ayeke na tongo nda ti achapitre oko oko kue. Na pekoni, a lingbi ti sara kua na ahundango tënë so ayeke na gbe ti alembeti ni na yâ mandango buku ni. Fade a yeke diko na a yeke sara lisoro na ndo ti anene versê ni. Na hunzingo ti achapitre oko oko, e yeke wara encadré, “Ye so Bible afa.” Na ngoi ti dango bê, encadré ni ayeke mû maboko na e, ndali ti na yâ ni, a wara akiringo tënë na ahundango tënë so a zia na tongo nda ti achapitre oko oko. A yeke nzere ande na mo mingi ti kiri tënë teti so atënë so ayeke na yâ ti buku so ayeke polele, akpengba pëpe nga anzere na bê.
3 A yeke wara anzene nzene tënë na ndo ti ali ti tënë nde nde na yâ mbage ti buku ni so a iri ni “Ambeni tënë ti bâ na ndo ni”. E yeke sara kua ande na mbage so tongana azo so e yeke manda Bible na ala ahunda ti hinga aye mingi na ndo ti mbeni tënë. E yeke bâ ambeni tënë ti mbage ti “Ambeni tënë na ndo ni” na ngoi ti Mandango Buku ti Kongregation. Ita so ayeke diko aparagraphe ni ayeke diko mbage so; nga a lingbi ti kangbi yâ ti a-article so ayo mingi na ti bâ ni oko na oko. Mo yeke wara pëpe ahundango tënë na yâ ti mbage so. Me surveillant ni alingbi ti hunda atënë ti pusu azo ni ti mû akiringo tënë so andu akota tënë ti mbage so.
4 E yeke manda ande buku Bible afa hio hio mingi na ngoi ti Mandango Buku ti Kongregation. A ku pëpe na mbage ti e ti manda ye na oko loro so na ngoi so e yeke manda buku so na azo, mbilimbili na azo so ahinga ye gi kete wala pëpe na ndo Bible (Kus. 26:28, 29). Na ngoi so e yeke manda buku so na yanga-da ti azo, a hunda ti tene e fa nda ti aversê, atapande wala ambeni ye tongaso nzoni. Tongaso, leke na bê ti mo ti ga lakue na bungbi na ti kiri tënë mingi na ngoi ti mandango buku Bible afa nyen biani?