Yungo bongo so alingbi na gonda na so ayeke na sioni oko pëpe
1. Na lekengo tele teti kota bungbi, ngbanga ti nyen a lingbi e bâ yungo bongo ti e nzoni?
1 “A-Témoin ti Jéhovah ayeke nzoni ahon tanga ti azo kue! Azo ti i asala ye na nzobe na ala yu bongo nzoni, nga ala yekia azo mingi.” A yeke tënë so mbeni zo ti hôtel atene na ndo aita-koli nga na aita-wali na mbeni kota bungbi ti district na ngu so ahon. Na mbeni kota bungbi nde, mbeni zo ti kua ti hôtel ni atene: “A yeke polele so azo ti i ayeke yu bongo teti Nzapa.” Tâ tënë, azo ayeke bâ azo so aga na kota bungbi. Ni la, e ye ti yu bongo “alingbi na Tene-nzoni”, na ye so apusu mingi ni azo ti gigi ti gonda e. A fa nga polele so e yeke awakua ti Nzapa (aPhil. 1:27). Na ngoi so e yeke leke tele teti kota bungbi, a yeke nzoni e gbu li kozoni na ndo yungo bongo ti e.
2. Ngbanga ti nyen a yeke mbeni kpale ti yu bongo na ti leke tele pendere na mbeni lege so ayeke na sioni oko pëpe?
2 Disciple Jacques atene: “Ndara so alondo na nduzu ayeke na sioni oko pëpe.” (Jacq. 3:17). Dutingo na sioni oko pëpe na yâ yungo bongo ti e alingbi ti duti mbeni kpale. Sese ti Satan so aye pitan ayeke sala ngangu na ndo azo ti yu bongo so alingbi pëpe, so zo ahinga li ti lo na ni pëpe na so azingo nzara ti tele ti zo (1 Jean 2:15-17). Ni la, tongana e yeke mû desizion na ndo bongo nga na lekengo tele ti e pendere, a lingbi e bata gbotongo mê ti Bible ti “ke ye so ake Nzapa, na ti ke nzara ti ye ti sese, si e bata tele ti e . . . na e bata tënë ti Nzapa na ngoi so”. (Tite 2:12). E yeke ye lâ oko pëpe ti zia ngonzo na bê ti azo na lege ti yungo bongo ti e, atâa a yeke aita ti e wala ambeni zo nde.—1 aCor. 10:32, 33.
3. Ahundango tënë wa ayeke mû ande maboko na e ti bâ yungo bongo ti e?
3 Bongo so ayeke na lege ni, so a yu ni nzoni: Tongana mo yeke leke tele teti kota bungbi ni, hunda tele ti mo mveni: ‘Bongo ti mbi ayeke na lege ni, wala agboto lê ti azo senge senge na ndo mbi? A fa so mbi yekia atënë ti bê ti azo? Go ti nduzu-bongo ti mbi ayeke na gbe ni mingi wala ayeke ndulu mingi? Abongo ti mbi afa tele ti mbi na gigi wala agbu mbi ngangu? Bongo ti mbi ayeke na saleté pëpe na afun nzoni? Na ngoi so mbi yeke gboto gere na peko ti kota bungbi ni, fade mbi yeke yu bongo so ayeke nzoni, na saleté pëpe, tongana mbeni wakua ti Nzapa? Wala fade bongo ti mbi ayeke duti nzoni pëpe, apika lê ti azo, na alingbi pëpe na zo so aga na kota bungbi so ayu badge? Fade na ngoi ti gbotongo gere, bongo ti mbi ayeke sala si mbi gi bê ti mbi ti fa tënë na lege kue so azi?’—aRom. 15:2, 3; 1 Tim. 2:9.
4. Tongana nyen ambeni zo alingbi ti mû maboko na e ti yu bongo na sioni oko pëpe?
4 E lingbi ti wara ye ti nzoni na lege ti awango ti aChrétien biazo. A lingbi awali ahunda akoli ti ala tongana nyen azo ayeke bâ bongo ti ala. Ababâ na mama so akpe mbito ti Nzapa alingbi ti mû maboko na amolenge ti ala so akono kete awe na ndo tënë so. Na mbage, aita-wali so akpe mbito ti Nzapa alingbi ti “wa apendere wali . . . ti bi bê ti ala na lege ni, ti bata tele ti ala” na yâ yungo bongo ti ala, si “zonga aga na ndo Tënë ti Nzapa pëpe.” (Tite 2:3-5). Ambeti ti e afa apendere foto ti abongo so ayeke na lege ni na so a yu ni nzoni.
5. Tongana nyen e kue e lingbi ti sepela Jéhovah na ngoi ti kota bungbi?
5 Sepela Jéhovah: Akota bungbi ti district amû pendere lege na e kue, pëpe gi na ala so amû mbage na programme ni, ti sepela Jéhovah. Biani, tambela ti e ti Chrétien na tënë ti yanga ti e ayeke mû ande gloire na lo. Me kozo ye so azo mingi ayeke bâ na ndo e ayeke yungo bongo nga na lekengo tele ti e. Zia e kue e sepela Jéhovah na lege ti bongo so alingbi na gonda na so ayeke na sioni oko pëpe.—Ps. 148:12, 13.
[Kete tënë na lembeti 5]
Aye so amû maboko ti yu bongo so alingbi na gonda
◼ Tënë ti Nzapa
◼ Bango tele ti e mveni
◼ Awango ti azo
◼ Ambeti ti aChrétien