“Kpengba na yâ tënë ti mabe”
1 Ti ngbâ lakue ti gi ti bata tënë ti Nzapa, a hunda ti sala ngangu mingi (1 Tim. 4:7-10). Me ti mû peko ti lege ti tambela tongaso gi na ngangu ti e mveni, e yeke nze hio na e yeke tï (Es. 40:29-31). Oko lege so e lingbi ti wara na ngangu so alondo na Jéhovah ayeke ti “kpengba na yâ tënë ti mabe.”—1 Tim. 4:6.
2 Gbâ ti kobe ti yingo: Na lege ti Tënë ti lo nga na lege ti “ngbâa be-ta-zo na ti ndara”, Jéhovah ayeke mû na e gbâ ti kobe ti yingo (Mat. 24:45; NW ). E mveni e yeke sala ngangu ti wara nzoni na lege ni? Mo yeke diko Bible lâ na lâ? Mo zia ambeni ngoi nde ndali ti mandango ye mo mveni nga ti gbu li na ndo ni? (Ps. 1:2, 3). Mara ti nzoni kobe ti yingo tongaso ayeke mû ngangu na e na ayeke bata e na gbele ngangu so sese ti Satan ayeke sala na ndo e ti tene e woko (1 Jean 5:19). Tongana e sala si yâ ti li ti e asi na anzoni ye na e sala ye alingbi na ni, fade Jéhovah ayeke duti na e.—aPhil. 4:8, 9.
3 Jéhovah nga ayeke kpengba e na lege ti abungbi ti kongregation (aHéb. 10:24, 25). Awango-tene ti yingo nga na anzoni kamarade so e yeke wara ni na ngoi ti abungbi so ayeke kpengba e ti ngbâ ti luti na gbele atara (1 Pi. 5:9, 10). Mbeni maseka-wali Chrétien atene: “Mbi yeke gue na ekole na yâ ti lango ni kue, na ye so asala si mbi yeke nze. Me abungbi akpa mbeni kete gbako ti ngu na yando, mbeni ndo so ayeke dë bê ti mbi ti leke mbi teti ndade ni so mbi yeke gue na ekole.” Biani so tâ ye ti nzoni mingi si e yeke wara teti angangu so e yeke sala ti gue na abungbi!
4 Fango tâ tënë: Ti Jésus, fango tënë ayeke lani tongana kobe ti lo. A mû ngangu na lo (Jean 4:32-34). Tongaso nga, tongana e yeke fa tënë ti apendere zendo ti Nzapa na ambeni zo, e bâ so a mû na e ngangu. Ti duti na ye mingi ti sala na yâ kusala ti fango tënë ayeke bata nga bê ti e; na lê ti e ayeke luti gi na ndo ti Royaume nga na adeba nzoni ni so aga ndulu. A dë bê ti e biani.—Mat. 11:28-30.
5 So tâ matabisi si e yeke na ni ti wara nzoni na lege ti gbâ ti kobe ti yingo so Jéhovah ayeke mû na azo ti lo laso! Zia e ngbâ lakue ti dekongo na ngia tongaso si a ga na gonda na lo.—Es. 65:13, 14.