Fango tënë amû maboko na e ti gbu ngangu
1 Mbeti ti Nzapa awa e ti kpe loro “so ayeke na gbele e na bê so azia pëpe.” (aHéb. 12:1). Legeoko tongana mbeni wakpengo loro ayeke na bezoin ti gbungo ngangu ti sala mandako nzoni, e nga e yeke na bezoin ti gbungo ngangu ti wara matabisi ti fini ti lakue lakue (aHéb. 10:36). Tongana nyen fango tënë amû maboko na e ti ngbâ be-ta-zo juska na nda ni?—Mat. 24:13.
2 A kpengba e na lege ti yingo: Fango pendere zendo so Bible amû ti mbeni fini sese ti mbilimbili asala si beku ti e angbâ ngangu (1 aThes. 5:8). Tongana e mû mbage na fango tënë lakue, lege ayeke zi na e ti fa na azo ti hinga atâ tënë so e manda na yâ ti Bible. E yeke na pasa ti fa tënë ti mabe ti e na gigi, ye so na pekoni ayeke kpengba e na lege ti yingo.
3 Ti fa tënë na azo nzoni, a lingbi e mveni e gbu nda ti atâ tënë ti Bible nzoni. A lingbi e gi nda ti atënë ni na e gbu li na ndo ni. Ngangu so e yeke mû ti sala na ye so ayeke kono hingango ye ti e, akpengba mabe ti e nga ayeke kiri ti mû ngangu na e na lege ti yingo (aProv. 2:3-5). Ni la, tongana e gi lege ti mû maboko na azo, e nga e yeke kpengba.—1 Tim. 4:15, 16.
4 Fango tënë na wâ ayeke mbeni kpengba mbage ti “ye ti bira ti Nzapa kue,” so e yeke na bezoin ni ti luti ngangu na gbele Zabolo na ayingo sioni (aEph. 6:10-13, 15). Bingo tele ti e kue na yâ fango tënë ayeke mû maboko na e ti bata lê ti e na ndo aye so akpengba zo na ti kpe ti tene sese ti Satan abuba e (aCol. 3:2). Na fango na azo lege ti Jéhovah, a yeke dabe ti e lakue na ndo nene ti bata mbeni tambela so ayeke nzoni-kue.—1 Pi. 2:12.
5 Nzapa amû ngangu na e: Ti hunzi na ni, tongana e yeke fa tënë a mû lege na e ti zia bê ti e na Jéhovah (2 aCor. 4:1, 7). So ye ti nzoni la pëpe? Ti maï mara ti ziango bê tongaso ayeke mû na e gi pëpe aye ti sala na kua ti fango tënë ti e, me nga ti hon ndo ti aye kue so e lingbi ti tingbi na ni na yâ ti gigi so (aPhil. 4:11-13). Biani, ti manda ti zia bê kue na Jéhovah ayeke kelele ti gbungo ngangu (Ps. 55:23). Na yâ ti aye mingi, fango tënë amû maboko na e ti gbu ngangu.