Mbage bale-oko ni: Salango a-étude so ayeke gue na li ni
Fa na wamandango ye ni ti fa tënë da na da
1 Na ngoi so a-ancien abâ so mbeni wamandango Bible alingbi ti ga wafango tënë so ade ti mû batême pëpe, lo lingbi ti komanse ti fa tënë legeoko na kongregation. (Bâ buku Bungbi so a leke ni ti sala ye so Jéhovah aye, l. 79-81.) Tongana nyen ti mû maboko na wamandango ye ni ti hinga ti fa tënë da na da?
2 Leke ye ni na lo legeoko: Mbeni ye ti hon lekengo tele nzoni ayeke dä pëpe. Fa na wamandango ye ni ndo so lo lingbi ti wara akode ti fango ye na yâ Kusala ti Royaume nga na yâ ti buku Comment raisonner. Nga mû maboko na lo ti soro mbeni so akpengba pëpe, so alingbi biani na territoire ni. Na tongo nda ni, wa lo ti sala kua na Bible na yâ fango tënë ti lo.—2 Tim. 4:2.
3 Tarango tele ayeke nzoni mingi teti fini wafango tënë. Tongana wamandango ye ni ayeke tara tele ti lo na mbeni kode ti fango ye, fa na lo tongana nyen na kode, lo lingbi ti kiri tënë na atënë so azo mingi ti territoire ni ayeke hunda ka (aCol. 4:6). Dë bê ti lo na tenengo na lo so awafango tënë ayeke na bezoin pëpe ti hinga akiringo tënë na atënë kue so mbeni zo ahunda. Mingi ni, ti kiri tënë nzoni na ahundango tënë tongaso, a yeke nzoni ti tene na zo ni so mo yeke gue ti gi nda ti aye ni na ti kiri ti sala lisoro na ndo ni na lo.—aProv. 15:28.
4 I fa tënë legeoko: Na kozo lango so wamandango ye ni afa tënë da na da, zia si lo bâ tongana nyen mo yeke fa ye so mo na lo kue aleke fade legeoko. Na pekoni, zia lo kue lo sala tënë. Na yâ ti ambeni ye, peut-être a yeke nzoni fini wafango tënë ni afa gi mbage ti tënë ni, na tapande ti diko na ti fa nda ti mbeni versê. Girisa pëpe salango ye ti wamandango ye ni nga na akode ti lo (aPhil. 4:5). Tongana yeke yeke mo yeke fa na lo ambage nde nde ti kusala ti fango tënë, gonda lo na nzobe.
5 A yeke nzoni ti mû maboko na mbeni fini wafango tënë ti zia na sese mbeni kapa ti fango tënë lakue, ti sala ni tongaso yenga oko oko tongana lege ayeke dä (aPhil. 3:16). I mä tele polele ti fa tënë legeoko, na wa lo ti fa tënë nga na ala so ayeke na wâ. Tapande ti ala nga bungbingo na ala ayeke mû maboko na lo ti yapu na ti wara ngia na yâ fango tënë da na da.