Fa tënë ti gloire ti Jéhovah
1 Mbeni wasungo psaume atene: “O sala fini bia na L’Eternel; . . . Fa tënë ti gloire ti Lo na popo ti amara, na ye ti kpene ti Lo na popo ti azo kue.” Tongana e gbu li na ndo aye so Nzapa asala a to nda ni giriri ti si na laso nga ye so lo yeke sala ande, bê ti e ayeke pusu e ti fa tënë ti gloire ti lo!—Ps. 96:1, 3.
2 Na fango tënë: A-Témoin ti Jéhovah ayeke na kota matabisi ti yô iri ti Nzapa na ti sepela ni na ndo lê sese kue (Mal. 1:11). Salango ye ti ala ayeke tâ nde mingi na amokonzi-nzapa ti a-église so atene ala yeke ti Christ, ala so na fandara azi iri ti Nzapa na yâ ti aBible so ala kiri pekoni na mbeni yanga nde. Kusala ti fango iri ti Nzapa na azo ayeke ye so a hunda ti sala ni hio, ngbanga ti so a lingbi azo adi iri ni so na mabe si ala sö kuâ na ngoi ti kota ye ti vundu so ayeke ga (aRom. 10:13-15). Na ndo ni, ti tene siriri aga na yâ ti dunia kue, so ti tene nga na popo ti azo ti sese, a lingbi iri ti Nzapa aga nzoni-kue. Biani, akusala ti Nzapa kue ague oko na iri ti lo.
3 ‘Jéhovah ayeke kota, na a lingbi azo asepela lo mingi.’ Ti tene azo ‘amû na Jéhovah gloire alingbi na iri ti Lo’, a lingbi ala hinga tâ tënë na ndo lo (Ps. 96:4, 8). Ye oko, ambeni ake atene Nzapa ayeke dä pëpe (Ps. 14:1). Ambeni zo atene mvene na ndo ti lo atene lo yeke na ngangu oko pëpe, wala ala tene lo yeke bi bê ti lo pëpe na ye so azo ayeke sala na yâ fini ti ala. Tongana e yeke mû maboko na azo ti nzoni bê ti wara tâ hingango ye na ndo Wasalango e, na ndo aye so lo leke ti sala nga na apendere salango ye ti lo, e yeke mû gloire na Jéhovah.
4 Na lege ti salango ye ti e: Ti sala ye alingbi na andia ti Jéhovah so ayeke mbilimbili ayeke mû gonda na lo. Tongana e yeke na anzoni salango ye, azo ayeke bâ ni (1 Pi. 2:12). Na tapande, nzoni lekengo tele ti e alingbi ti pusu azo ti sala nzoni tënë ti e. Na ye so ayeke zi lege na e ti sala tënë na ndo ti nzoni so zo alingbi ti wara na batango akpengba-ndia ti Mbeti ti Nzapa (1 Tim. 2:9, 10). So tâ ngia si e yeke na ni tongana azo ‘abâ nzo kusala ti e, na ala mû gloire na Babâ ti e so ayeke na yayu’!—Mat. 5:16.
5 Zia si na lege ti tënë ti yanga ti e nga na salango ye ti e, e sepela lâ na lâ kota Nzapa ti e. Na lege so, e yeke sala ye alingbi na pendere tisango ndo so atene: “Sala bia na L’Eternel, sala tënë nzoni na iri ti Lo, fa salut ti Lo na gigi lâ na lâ.”—Ps. 96:2.