E fa iri ti Nzapa na azo
1. Hingango iri ti Nzapa mveni alingbi ti sala nyen na ndo azo?
1 So lani, na tongo nda ni, mo hinga iri ti Nzapa, mo sala nyen? Azo mingi asala ye tongana mbeni wali so atene: “Kozoni so mbi bâ iri ti Nzapa na yâ ti Bible, mbi toto. So mbi bâ so mbi lingbi ti hinga tâ iri ti Nzapa mveni na ti sala kusala na ni, tënë ni agbu bê ti mbi ngangu.” Ti lo, hingango iri ti Nzapa ayeke lani kota ye ti to nda ti hinga Jéhovah tongana mbeni zo so ayeke na asalango ye ti lo, nga ti wara lege ti lë songo na lo.
2. Ngbanga ti nyen a lingbi e fa hio na azo ye na ndo Jéhovah?
2 Ngbanga ti nyen ti fa ni? Hingango iri ti Nzapa andu hingango alengo ti lo, akusala ti lo, nga aye so lo ye ti sala. A ndu nga salut ti e. Bazengele Paul asû na mbeti so “fade A sö zo so adi iri ti Seigneur.” Me Paul atene tongana ala manda ye kozoni na ndo Jéhovah pëpe, nga ala mä na bê na lo pëpe, “ala lingbi di iri ti Lo tongana nyen?” Ni la, a lingbi aChrétien afa hio na azo iri ti Nzapa, nga ye kue so iri so aye ti tene (aRom. 10:13, 14). Me mbeni nda ti tënë ni nde ayeke dä, so ayeke kota mingi.
3. Kota nda ti fango tënë ti e ayeke nyen?
3 Na yâ angu bale-oko so ato nda ni na ngu 1920, azo ti Nzapa abâ na yâ Bible so kota tënë ti dunia kue andu fango na gigi mbilimbili ti kota yanga-ti-komande ti Nzapa nga na gango nzoni-kue ti iri ti lo. Kozoni si Jéhovah afuti azo ti sioni ti lungula zonga so aluti na ndo iri ti lo, a lingbi “sese ni kue ahinga” tâ tënë na ndo lo (Es. 12:4, 5; Ezéch. 38:23). Tongaso, kota nda ti fango tënë ti e ayeke ti sepela Jéhovah na gbele azo kue, na ti sala si iri ti lo aga nzoni-kue na lê ti azo (aHéb. 13:15). Ndoye so e yeke na ni teti Nzapa na teti amba ti e ayeke pusu e ande ti mû mbage mingi na yâ kusala so Nzapa amû na e ti sala.
4. Tongana nyen na nda ni azo ahinga aTémoin ti Jéhovah na iri ti Nzapa?
4 “Azo . . . teti iri ti Lo”: Na ngu 1931, e mû iri ti aTémoin ti Jéhovah (Es. 43:10). Ngbele ye kâ, azo ti Nzapa afa iri ti lo ngangu mingi si buku Prédicateurs, lembeti 124, atene: “Na ndo sese kue, a yeke hinga hio zo so adi iri ti Jéhovah mingi na yanga ti lo tongana mbeni Témoin ti Jéhovah.” A hinga mo tongaso? A lingbi singila so e yeke na ni teti nzobe ti Jéhovah apusu e ti ‘sala tënë nzoni na iri ti lo,’ ti sala tënë na ndo lo na ngoi kue so azi na e.—Ps. 20:8; 145:1, 2, 7.
5. Tongana nyen tambela ti e ague oko na yongo iri ti Nzapa?
5 Teti e yeke “azo . . . teti iri ti Lo”, a lingbi e bata andia ti lo (Kus. 15:14; 2 Tim. 2:19). Mingi ni, kozo ye so azo ayeke bâ na tele ti aTémoin ti Jéhovah ayeke nzoni tambela ti ala (1 Pi. 2:12). E ye lâ oko pëpe ti bi zonga na ndo iri ti lo na bango akpengba-ndia ti lo na nene ni pëpe, wala na ziango vorongo lo na use ndo na yâ fini ti e (Lév. 22:31, 32; Mal. 1:6-8, 12-14). Nde na so, zia tambela ti e afa so e yekia mingi kungba ti e ti yô iri ti Nzapa.
6. Matabisi wa e lingbi ti duti na ni laso nga teti lakue lakue?
6 Laso, e yeke bâ gango tâ tënë ti ye so Jéhovah atene: “A komanse na ndo so lâ alondo dä juska na ndo so lâ akui, iri ti Mbi ayeke kota na popo ti aGentil”. (Mal. 1:11). Zia e ngbâ ti fa tâ tënë na ndo Jéhovah na e ‘sala tënë nzoni lakue lakue na iri ti Lo ti nzoni-kue.’—Ps. 145:21.