Fa so mo bi bê na zo ni: Sara kangbi na popo ti azo pëpe
1 Na yâ ti mbeni suma, bazengele Jean abâ mbeni ange so ayeke huru na lê ti nduzu, so ayeke na nzo tënë ti lakue lakue ti fa na “amara kue, akete mara kue, azo ti yanga nde nde kue, na azo nde nde kue”. (Apoc. 14:6). E yeke mû tapande ti ange so na lege so e yeke fa tënë na azo kue? Sân ti hinga ni, e lingbi ti duti na bibe so ayeke nzoni pëpe na ndo ti ambeni zo. Sarango ye ti e na mbage ti azo so e yeke tingbi na ala na fango tënë alingbi ti ndu lege so e yeke fa nzo tënë na ala. Tongaso, tongana e yeke fa tënë na azo so alondo na ndo nde nde, a yeke nzoni e fa so e yeke bi bê biani na ala.
2 Hinga territoire ti mo nzoni: Awande wala aréfugié ayeke na yâ ti territoire ti mo? A yeke ngangu pëpe ti girisa na ndo ti ala. E lingbi ti gue na ndo so ala yeke dä na ti gi ti hinga ambeni ye na ndo ti ala. Aye tongana aye so atia ala, atënë so agbu bê ti ala, aye so ala ye wala ala ke, agingo bê ti ala nga na abibe so ayeke na lege ni pëpe, me so ala lingbi ti duti na ni na ndo ti ambeni zo wala ambeni ye. Girisa aye so e fa ni ge pëpe na ngoi so mo yeke fa tënë ti Royaume na ala (1 aCor. 9:19-23). Legeoko tongana bazengele Paul, a lingbi e bâ so a yeke kungba ti e ti fa nzo tënë na azo kue ti territoire ti e, atâa ala yeke awande, azo so sarango ye ti ala ayeke nde, ala so yanga ti kodoro ti ala ayeke nde nga ala so ayeke na mosoro mingi.—aRom. 1:14.
3 Tongaso, tongana nyen si mo lingbi ti fa tënë na mbeni zo so atene mbeni yanga ti kodoro nde? Sara kusala nzoni na brochure Une bonne nouvelle pour des gens de toutes nations. Mo lingbi nga ti mû na tere ti mo ambeni tract wala abrochure so ayeke na yanga ti akodoro so azo mingi ti yâ ti territoire ni ayeke tene (Bâ Kusala ti Royaume ti juillet 2003, l. 4, par. 2-3.). Na ndo ni, ambeni wafango tënë ayeke sara ngangu ti manda tongana nyen ti bara zo nga ti fa ambeni nduru tënë na yâ ti ambeni yanga ti kodoro nde. Même tongana mo tene tënë ni mingi pëpe, a yeke pika bê ti azo ni ti bâ so mo yeke tara ti sara tënë na ala na yanga ti kodoro ti ala, na ye so alingbi ti pusu ala ti yeda ti mä nzo tënë.
4 Mû tapande ti Jéhovah: Tongana e yeke gi ti mû maboko na azo so alondo na ndo nde nde, e yeke mû tapande ti Nzapa ti e Jéhovah so asara kangbi na popo ti azo pëpe, lo so aye mara ti ‘azo [nde nde] kue awara salut, na ahinga tene-biani mbilimbili.’—1 Tim. 2:3, 4.