E mû beku na azo ti mawa
1 Jésus abi bê ti lo mbilimbili na azo ti mawa. Na mbeni ngoi, lo sara miracle ti mû kobe na azo na lo kaï kobela ti ala; ye oko, lo bi bê ti lo mingi ti fa “Tene-nzoni” na azo ti mawa (Mat. 11:5). Laso, kusala ti aChrétien angbâ ti mû maboko na azo ti mawa nga na ambeni zo.—Mat. 24:14; 28:19, 20.
2 Tâ beku: Mingi ni, amokonzi-nzapa atene na azo ti mawa so tongana ala mû ye mingi na eglize fade ala yeke wara mosoro mingi na pekoni. Ye oko, Mbeti ti Nzapa afa so gi Royaume ti Nzapa si ayeke hunzi ande yere nga ayeke kaï akpale ti azo kue (Ps. 9:19; 145:16; Es. 65:21-23). Tongana e fa na azo ti mawa ye so Bible afa biani, e yeke mû na ala beku nga maboko ti kaï nzara ti ala ti ye ti yingo.—Mat. 5:3.
3 A-Farizien ti ngoi ti Jésus abâ azo ti mawa tongana ambumbuse zo, na ala zere ala na iringo ala ‘am-ha’arèts, wala “azo ti sese.” Ye oko, Jésus abâ “mênë ti ala” wala fini ti ala tongana ye ti “ngere ngangu” (Ps. 72:13, 14). E lingbi ti sara tongana Jésus na ‘sarango nzobe’ na azo ti mawa nga na ziango tere ti e ma place ti ala (Prov. 14:31). E ye lâ oko pëpe ti sara tënë ti azo so alango na yâ ti avaka so azo ti mawa ayeke dä mingi na mbeni lege so akiri na nengo ti ala na peko, wala ti ke ti fa tënë na ala. Mingi ti azo so ayeda na tokua ti Royaume ayeke azo ti mawa.
4 Mungo maboko fadeso: Fango na azo ti mawa ti yâ ti territoire ti e akpengba-ndia ti Mbeti ti Nzapa ayeke mû nga maboko na ala ti kpe kamême ambeni kpale ti dutingo mawa ti ala. Na tapande, Bible ake nyongo sämba ahon ndo ni, ngia ti nginza, goigoi, nyongo manga na ambeni sarango ye so abi zo na yâ ti yere (aProv. 6:10, 11; 23:21; 2 aCor. 7:1; aÉph. 5:5). Mbeti ti Nzapa awa zo ti sara ye na lege ni na ti sara kua na ‘bê kue,’ na a yeke ye so ayeke gi na mbage ti azo ti kua la (aCol. 3:22, 23; aHéb. 13:18). Mbeni gingo nda ti ye afa so, mingi ti awamungo zo na kua ayeke “gi mingi ni azo so asara ye na lege ni na so akpe andia ti kua.”
5 Jéhovah ayeke bi bê ti lo mingi na pono ti azo ti mawa. Na yâ ti ngoi kete, Jésus ayeke “sö zo so ye amanke lo mingi tongana lo toto na Lo” (Ps. 72:12). Ti si na ngoi ni so, e yeke na matabisi ti dë bê ti amba ti e, so na popo ni e yeke wara azo ti mawa, na tënë ti beku so ayeke na yâ Mbeti ti Nzapa.