Fango tënë akpengba e na lege ti yingo
1. Ye ti nzoni wa fango tënë aga na ni na e?
1 Mungo mbage na fango tënë alingbi ti kpengba songo ti e na Jéhovah na akono ngia ti e. A yeke tâ tënë so bingo tere ti e na yâ ti fango tënë amû ngia na Jéhovah kozoni. Ye oko, tongana e mä komandema so a hunda na e ti “fa tënë ni,” e yeke wara tënë nzoni ti Jéhovah na e yeke wara nga ye ti nzoni teti e mveni (2 Tim. 4:2; És. 48:17, 18). Na mbilimbili lege wa fango tënë alingbi ti kpengba e na aga na e ngia?
2. Na lege wa fango tënë akpengba e?
2 A kpengba e na a ga na e tënë nzoni ti Nzapa: Fango tënë amû na e ngangu ti zia lê ti e na ndo ti aye ti nzoni ti Royaume ahon aye ti wusuwusu ti laso (2 aCor. 4:18). Ti fa nda ti tënë ti Mbeti ti Nzapa ayeke kpengba mabe ti e na yâ ti azendo ti Jéhovah na ayeke pusu e ti kiri singila ndali ti tâ tënë (És. 65:13, 14). Na mungo maboko na amba ti e ti maï na lege ti yingo si ala duti “ti dunia so pëpe”, e yeke kpengba nga dutingo ti e nde na dunia so.—Jean 17:14, 16; aRom. 12:2.
3. Na lege wa kusala ti e ayeke mû maboko na e ti duti na asarango ye ti Chrétien?
3 Bingo tere ti e na yâ ti kusala ni ayeke mû maboko na e ti duti na anzoni sarango ye ti Chrétien. Na tapande, ti sara ngangu ti “ga ye kue ndali ti mara ti azo nde nde kue” ayeke mû maboko na e ti duti na be-ti-molenge mingi (1 aCor. 9:19-23). Tongana e sara lisoro na azo so “a sara pasi na ala nga yâ ti ala akangbi kirikiri tongana angasangbaga so ayeke na berger pëpe”, e yeke nduru ti kangbi mawa na ti sara nzobe na ala (Mat. 9:36). E yeke hinga ti gbu ngangu tongana e kiri na peko pëpe atâa azo ake ti mä e wala akanga lege na e. Ngia ti e ayeke ga kota tongana e mû tere ti e mveni ndali ti amba ti e.—Kus. 20:35.
4. Mo bâ fango tënë ti mo tongana nyen?
4 Ti sara mbeni kusala so asepela Lo oko so alingbi na vorongo ti e ayeke ye ti tënë nzoni! Kusala ni akpengba e. A ga na tënë nzoni mingi na ndo ti ala so abi tere ti ala kue na ‘fango nda ti tënë ni kue na ndo ti nzoni tënë’.—Kus. 20:24.