Kusala ti e afa na gigi ndoye ti e na mbage ti Nzapa
1. Ndoye ti Nzapa apusu Jésus ti sara nyen?
1 Ndoye apusu Jésus ti sara kusala ti lo. Aye nde nde so Jésus asara na yâ ti kusala ti lo afa na gigi biani so lo ndoye Jéhovah. Jésus atene: “Ti tene dunia ahinga so mbi ndoye Babâ, mbi yeke sara legeoko tongana ti so Babâ amû yanga na mbi ti sara.” (Jean 14:31). E so e yeke tambela na senda ti Jésus, e nga e yeke na matabisi ti fa na gigi kota ndoye ti e na mbage ti Nzapa na yâ ti kusala ti e.—Mat. 22:37; aÉph. 5:1, 2.
2. Na lege wa ndoye ti Jéhovah andu kusala ti e?
2 “Zia a sara si iri ti mo aga nzoni-kue”: Tongana e yeke na nzara mingi ti gbu alege kue so azi ti sara tënë ti Jéhovah na ti Royaume ti lo na azo, e yeke fa so e ndoye Nzapa; biani, na sarango tongaso e yeke sara si iri ti lo aga nzoni-kue (Gen. 22:14; Ezéch. 36:23; Mat. 6:9). Tongana ti so asigigi polele na yâ ti kusala ti Jésus, e yeke fa lakue na yâ ti kusala ti e tâ nzara ti bê ti e ti bâ si iri ti Jéhovah aga nzoni-kue na ti tene a sara ye so bê ti lo aye.—Mat. 26:39.
3. Na lege wa ndoye ti e na mbage ti Jéhovah amû maboko na e ti hon ndo ti akpale?
3 Ndoye apusu e ti hon ndo ti akpale: Ndoye ti Jéhovah ahon ndo ti aye so akanga lege (1 aCor. 13:4, 7). Na yâ ti fini ti lo, Jésus atingbi na ambeni ye so alingbi ti woko lo na yâ ti kusala ti lo. Ye oko, tongana lo yeke na gbele akpale, kota ndoye ti lo na nzara so lo yeke na ni ti sara ye so Jéhovah aye amû maboko na lo ti hon ndo ni kue (Marc 3:21; 1 Pi. 2:18-23). E nga e yeke tingbi na akpale mingi, na gi ndoye ti Nzapa si alingbi ti mû maboko na e ti hon ndo ni. Na sarango legeoko tongana Christ, e lingbi ti hinga na bê ti e so mbeni ye ti woko e na yâ ti kusala ti e ayeke pëpe. Atâa azo ti sewa ti e akanga lege na e, wala e yeke na kpale ti seni, wala e ga mbakoro awe, wala azo mingi aye ti mä tënë ti e pëpe, ye so ayeke kanga lege na e pëpe ti fa ndoye ti e na Jéhovah na sarango kusala ti e nzoni na alege kue.
4. Ndoye ti e na mbage ti Jéhovah amû lege na e ti wara matabisi wa?
4 Ndoye ayeke ngangu mingi, na tongana e mû âme ti e kue ti fa na gigi ndoye ti Nzapa na yâ ti kusala ti e, tënë nzoni ayeke ga na ndo ti e (1 aCor. 13:13). So e yeke pusu nduru nduru na lâ ni so fade iri ti Jéhovah aga nzoni-kue biaku biaku, e ye si ‘ndoye ti e angbâ gi ti wu mingi ahon ti kozo’.—aPhil. 1:9; Mat. 22:36-38.