Mo yeke kiri tënë tongana nyen?
1. Tongana azo ahunda tënë na e, ngbanga ti nyen ti gi ti kiri tënë tongana ti Jésus?
1 Juska laso, bê ti azo ayeke pika tongana ala bâ nzoni lege so Jésus akiri tënë lani na ahundango ndo ti azo. Ni la, tongana azo ahunda mara ti atënë nde nde na e na fango tënë, a yeke nzoni e gi ti kiri tënë tongana ti Jésus.—1 Pi. 2:21.
2. Nyen la alingbi ti mû maboko na e ti kiri tënë nzoni na mbeni zo?
2 Mä zo ni kozoni: Jésus ayeke gi ka ti hinga ndani so mbeni zo ahunda mbeni tënë na lo. Na ambeni ngoi, lo yeke hunda tënë na zo ni ti hinga tâ ye so ayeke na gbe ti bê ti lo. Tongana mbeni zo ahunda mo, lo tene, “Mo mä na bê na Jésus?” ti tâ tënë ni peut-être lo ye ti hinga ngbanga ti nyen mo yeke sara matanga ti Noël pëpe. Tongana mo hinga tâ ye so ayeke na gbe ti bê ti zo ni, mo lingbi ti fa nda ti ye na lo nzoni.—Luc 10:25-37.
3. Aye wa ayeke mû maboko na e ti kiri tënë nzoni na azo na lege ti Bible?
3 Sara kusala na Bible ti kiri tënë: Mingi ni a yeke ka nzoni ti fa kiringo tënë ni tâ gi na yâ ti Bible (2 Tim. 3:16, 17; aHéb. 4:12). Buku Comment raisonner nga na “Atënë ti Mbeti ti Nzapa ti sara na lisoro” so ayeke na yâ ti Mbeti ti Nzapa ti fini dunia amû maboko mingi ti mû atâ kiringo tënë. Même tongana zo ni abâ Bible na nene ni pëpe, na kode, mo lingbi ti fa na lo ye so Bible afa. Gue na zo ni yeke na yeke ti bâ aye so afa so ndara so ayeke na yâ ti Bible ayeke lakue tâ nzoni mingi ndali ti azo. Tongana mo sara ye tongana ti Jésus, akiringo tënë ti mo ayeke duti tongana “ye ti lor na ndo ye ti argent”, so ti tene a yeke duti pendere, a yeke sara nzoni na zo nga azo ayeke bâ ni na nene ni.—aProv. 25:11.
4. Na ngoi wa a yeke nzoni ti kiri tënë na ahundango tënë kue pëpe?
4 A yeke nzoni ti kiri tënë na ahundango tënë kue? Tongana mbeni zo ahunda tënë na mo si mo hinga kiringo tënë ni pëpe, sara kamene pëpe ti tene: “Mbi hinga pëpe, me mbi lingbi ti gue ti gi ye na ndo ni na ti ga ti fa ni na mo.” Mara ti sarango ye na tâ be-ti-molenge tongaso nga so mo fa so mo bi bê na zo ni alingbi ti pusu lo ti yeda ti tene mo kiri mo ga. Tongana mo bâ so zo so ahunda tënë na mo ayeke gi gi ti dë gaba na mo, sara ye tongana Jésus, mo kiri tënë gi nduru (Luc 20:1-8). Nga tongana mbeni zo agi ti hunda tënë na mo na mbana, na mbeni lege so ane zo, kaï lisoro ni na mû ngoi ti mo ti gi azo so aye biani ti hinga tâ tënë.—Mat. 7:6.
5. Ti kiri tënë na ahundango ndo ti azo, Jésus azia na e tapande wa?
5 Jésus ahinga lani so a yeke kota ye ti zia bê kue na ndo ti Jéhovah ti sara kusala ti lo so ayeke ti “fa tënë ti témoin na ndo ti tâ tënë” so andu nga kiringo tënë na azo so aye biani ti hinga tâ tënë (Jean 18:37). So tâ pasa si e yeke na ni ti sara ye tongana ti Jésus na ngoi so e yeke kiri tënë na azo so ayeke “nduru ti yeda na tënë ni ti wara fini ti lakue lakue”!—Kus. 13:48.