Mo lingbi ti sara nyen ti bâ nzoni na lege ti groupe ti fango tënë?
1 Mo ngbâ ti sara nzara ti ambeni ye so e wara lani na lege ti Mandango Buku ti Congrégation? Wungo ti azo ti yâ ti agroupe ni ayeke lani mingi ape nga ndo ni ayeke kpô. Ye so asara si a yeke ngangu pëpe ti sara kamarade na azo so ayeke mû maboko na e ti kpengba mabe ti e (aProv. 18:24). Surveillant ti mandango buku ni ahinga dutingo ti e oko oko nga lo lingbi ti kpengba zo oko oko (aProv. 27:23; 1 Pi. 5:2, 3). E ngbâ ti wara aye ti nzoni so na lege ti groupe ti fango tënë.
2 Mû li ni kozo: Mingi ni wungo ti azo ti yâ ti groupe ti fango tënë alingbi tere na wungo ti azo ti yâ ti groupe ti mandango buku so e yeke sara ândö. Na sarango kua ti fango tënë “na tere” ti mba, e yeke ga akota kamarade (aPhil. 1:27). Na yâ ti groupe ti mo, mo fa tënë na azo oke awe? Mo lingbi ti “maï tâ ndoye so ayeke na bê” ti mo na ndo ti tënë so? (2 aCor. 6:13). Na ndo ni, e lingbi ti tisa ambeni zo ti groupe ti e ti bungbi legeoko na e ti voro Nzapa na yâ ti sewa wala ti te mbeni kobe. Na yâ ti ambeni congrégation, agroupe ti fango tënë aleke ti tene tour na tour ala sara mbeni kobe ndali ti wamungo diskur so alondo na mbeni congrégation nde si aga. Tongana a yeke tour ti mbeni groupe ti fango tënë ni, groupe ni ayeke bungbi ti te kobe nga ti wa tere na popo ti ala même si wamungo diskur ni so alondo na mbeni congrégation nde ague pëpe ti te kobe ni.
3 So e yeke wara tere fadeso gi fani use na yâ ti yenga oko ndali ti abungbi ti congrégation, ye so aye ti tene so awafango tënë ayeke wara mungo maboko ti a-ancien mingi pëpe? Ên-ën. A zia asurveillant na ndo ti groupe oko oko ti kpengba nga ti leke zo oko oko ndali ti fango tënë. Tongana surveillant ti groupe ti mo ade amä tere na mo pëpe ti tene mo na lo afa tënë, ngbanga ti nyen mo hunda ti tene mo na lo afa tënë ape? Na ndo ni, na nda-yenga oko na yâ ti nze oko oko surveillant ti kusala ayeke fa tënë na yâ ti groupe oko oko. Na yâ ti akete congrégation so agroupe ti fango tënë ayeke dä mingi ape, lo lingbi ti leke ti sara vizite na groupe oko oko fani use na yâ ti ngu oko. Mo leke kapa ti mo ti fa tënë na ngoi so lo yeke sara vizite na groupe ti mo?
4 A yeke nzoni mingi ti tene groupe ti fango tënë oko oko asara bungbi ti fango tënë ti lo nde nde na anda-yenga. Tongana ando ti rendez-vous ti fango tënë ayeke nde nde na même l’heure, a lingbi ti duti ngangu pëpe na awafango tënë ti gue na bungbi ti fango tënë wala na territoire. A sara si a lingbi ti kangbi yâ ti awafango tënë hio nga ti gue hio na territoire. Nga a yeke ngangu pëpe na surveillant ti groupe ni ti bâ ndo nzoni na ndo ti azo so ayeke na yâ ti groupe ti lo. Ye oko, na ambeni ngoi a lingbi ti si so a yeke na lege ni ti tene groupe use wala mingi abungbi oko. Tongana congrégation kue la awara tere ndali ti bungbi ti fango tënë na kozo samedi ti nze wala na peko ti Mandango Tour ti Ba Ndo, a yeke ka nzoni ti tene groupe oko oko aduti place oko nga surveillant ti groupe oko oko ayeke mû kete penze-ngbonga ti kangbi yâ ti azo ti groupe ti lo kozoni si bungbi ti fango tënë ni ahunzi na sambela.—Bâ encadré “Mo lingbi ti yeda ti tene a sara ni na ndo ti mo?”
5 Atâa so Mandango Buku ti Congrégation ayeke dä mbeni pëpe, Jéhovah angbâ lakue ti mû na e aye kue so e yeke na bezoin ni ti sara ye so bê ti lo aye (aHéb. 13:20, 21). Jéhovah ayeke bâ lege ti e, e yeke manke ye oko ape (Ps. 23:1). E yeke wara aye ti nzoni mingi na lege ti groupe ti fango tënë ti e. Tongana e mû li ni kozoni nga e ‘lu ye mingi mingi,’ e yeke “ko ni mingi mingi”.—2 aCor. 9:6.
[Ahundango tënë ti manda na ye]
1. Aye ti nzoni wa e wara lani na lege ti Mandango Buku ti Congrégation na so e ngbâ ti wara ni na yâ ti groupe ti fango tënë?
2. Tongana nyen la e lingbi ti mû li ni kozo ti sara kamarade na yâ ti groupe ti fango tënë ti e so ayeke mû maboko na e na lege ti yingo?
3. Ambeni lege wa azi ti wara mungo maboko ti a-ancien na yâ ti groupe ti fango tënë ti e?
4. (a) Tongana nyen la a yeke sara bungbi ti fango tënë? (b) Ngbanga ti nyen a yeke nzoni ti tene e mû da ti e teti bungbi ti fango tënë?
5. Atâa so Mandango Buku ti Congrégation ayeke dä mbeni pëpe, nyen la e hinga na bê ti e kue?
[Kete tënë na lembeti 6]
Mo lingbi ti yeda ti tene a sara ni na ndo ti mo?
Na yâ ti ambeni congrégation na anda-yenga, a bungbi agroupe ti fango tënë kue oko ndali ti so ando ti sarango ni dä ayeke mingi pëpe. Bungbi ti fango tënë ayeke mbeni mbage ti aye so a leke na yâ ti congrégation, tongaso a yeke mbeni kota pasa tongana a sara ni na ndo ti e. Mo lingbi ti yeda ti tene a sara ni na ndo ti mo? Ke pëpe ngbanga ti so da ti mo akpa ape. Legeoko tongana ti so a yeke sara ti soro ando ndali ti mandango buku ândö, a-ancien ayeke gbu li na ndo ti ndo so da ti mo ayeke dä nga na ambeni ye nde na ngoi so ala yeke soro ando ndali ti bungbi ti fango tënë. Tongana mo ye ti tene a sara ni na da ti mo, sara tënë ni na surveillant ti groupe ti mo.