Sara mbeto pëpe—Tene pëpe so mo lingbi pëpe
1 Mo sara mbeto ti hunda ti manda Bible na azo ngbanga ti so mo pensé so mo lingbi ti sara ni nzoni ape? Ambeni wakua be-ta-zo ti giriri, na tapande Moïse na Jérémie, abâ so ala lingbi pëpe ti sara kua so a mû na ala (Ex. 3:10, 11; 4:10; Jér. 1:4-6). Azo mingi ayeke na mara ti bibe so. Ala lingbi ti hon ndo ni tongana nyen?
2 A yeke nzoni e hinga so Jéhovah ayeke hunda na e lâ oko pëpe ti sara mbeni ye so ahon ngangu ti e (Ps. 103:14). Kusala ti e ti sarango si azo aga adisciple, nga ti fa ye na ala, ayeke mbeni kusala so e lingbi ti sara ni (Mat. 28:19, 20). A yeke pëpe mbeni kusala so Jéhovah amû gi na amba ti e so ahinga ye mingi wala so ayeke na kode mingi (1 aCor. 1:26, 27). Ni la, a lingbi e ngbâ gi pëpe na fango tënë da na da na e zia kua ti mandango Bible na ambeni zo nde.
3 Jéhovah asara si e lingbi: Jéhovah la asara si e lingbi na kua ti sarango adisciple (2 aCor. 3:5). Na lege ti bungbi ti lo lo fa na e atâ tënë ti Bible so même azo so ahinga ye mingi na yâ ti dunia so ahinga ni pëpe (1 aCor. 2:7, 8). Lo sara si a sû na mbeti akode ti fango ye ti Kota Wafango ye, Jésus, ti tene e mû tapande ti lo, nga lo ngbâ lakue ti fa ye na e na lege ti congrégation. Na ndo ni, Jéhovah amû na e agbakuru so e yeke na bezoin ni ti manda Bible na azo. Lo mû na e aye tongana, buku Bible afa, so afa tâ tënë na mbeni lege so ayeke polele nga so zo ayeke mä yâ ni hio. E la e pensé so mandango Bible na zo ayeke ngangu, me ayeke ngangu pëpe.
4 Jéhovah amû maboko na Moïse na Jérémie na ala wara lege lani ti sara kua so lo mû na ala (Ex. 4:11, 12; Jér. 1:7, 8). E nga kue e lingbi ti hunda Jéhovah ti mû maboko na e. Na ndo ni kue, na ngoi so e yeke manda Bible na mbeni zo, e yeke fa na lo tâ tënë na ndo ti Jéhovah, a yeke mbeni ye so anzere na lê ti Nzapa (1 Jean 3:22). Tongaso, zia na gbele mo ti manda Bible na azo, a yeke mbeni pendere kusala nga aga na ye ti nzoni mingi.
[Ahundango tënë ti manda na ye]
1. Ngbanga ti nyen ambeni zo asara mbeto ti hunda ti manda Bible na azo?
2. Ngbanga ti nyen a lingbi e ngbâ gi pëpe na fango tënë da na da na e zia kua ti mandango Bible na ambeni zo nde?
3. Tongana nyen la Jéhovah asara si e lingbi na kua ti manda Bible na azo?
4. Ngbanga ti nyen e yeke na kite pëpe so Jéhovah ayeke mû maboko na e?