Manda Bible na azo nzoni
1. Nyen la a hunda na awafango tënë so ayeke manda Bible na azo?
1 Zo oko alingbi ti sara na Jéhovah Nzapa pëpe sân ti tene Jéhovah “agboto lo”. (Jean 6:44). Atâa so kue, awafango tënë so ayeke manda Bible na azo adoit ti sara mbage ti ala ti mû maboko na azo ti ga nduru na Babâ ti ala so ayeke na yayu (Jacq. 4:8). Ye so ahunda ti tene zo aleke tere nzoni. Ti diko gi aparagrahe nga na ahundango ndo ni so ayeke na yâ ti mbeti ni ayeke mû maboko kue pëpe na azo so e yeke manda Bible na ala ti mä yâ ti atënë ni nga ti gue na li ni.
2. Tongana e sara étude nzoni na mbeni zo, aye ti nzoni wa la ayeke ga na peko ni?
2 Ti sara a-étude nzoni, a lingbi aita amû maboko na azo so ala yeke manda Bible na ala ti (1) mä yâ ti ye so Bible afa, (2) ti yeda na ye so Bible afa, nga (3) ti sara ye alingbi na ye so Bible afa (Jean 3:16; 17:3; Jacq. 2:26). Ti fa na mbeni zo ti sara aye ota so alingbi ti mû ngoi mingi. Me, aye so oko oko kue ayeke mû lege ti tene songo ti zo ni na Jéhovah akpengba nga ti tene lo wara batême.
3. Ngbanga ti nyen anzoni wafango ye ayeke hunda atënë so apusu zo ti fa atënë ti bê ti lo?
3 Wamandango Bible ni apensé ti lo nyen na ndo ti aye ni so?: Ti hinga wala zo ni amä yâ ti ye so lo manda nga lo yeda ni, a yeke nzoni e kpe ti sara tënë ni kue na place ti zo ni me e wa lo ti fa atënë ti bê ti lo (Jacq. 1:19). Lo mä yâ ti ye so Bible afa na ndo ti ye so ala yeke sara tënë na ndo ni so? Lo lingbi ti fa nda ti tënë ni na atënë ti lo wani? Bango ndo ti lo ayeke tongana nyen na ndo ti ye so lo yeke manda? Lo mä na bê so ye so Bible afa so ayeke na lege ni? (1 aThes. 2:13). Lo hinga so ye so lo yeke manda alingbi ti changé lege so lo yeke sara na ye na yâ ti gigi ti lo? (aCol. 3:10). Ti kiri tënë na mara ti ahundango ndo so, a yeke nzoni e hunda tënë na ndara ti hinga tënë ti bê ti lo na ndo ti ahundango tënë so, na pekoni e mä lo.—Mat. 16:13-16.
4. Nyen la a lingbi e sara tongana zo so e yeke manda Bible na lo ayeke na kpale ti mä yâ ti ye so Bible afa wala ti sara ye alingbi na ni?
4 Asarango ye ti azo nga lege so ala yeke pensé na ni ayeke aye so agbu bê ti ala mingi, na a hunda ngoi mingi ti tene zo azia lege ni (2 aCor. 10:5). Nyen la e yeke sara tongana zo so e yeke manda Bible na lo ayeda pëpe na ye so e yeke fa na lo nga lo sara ye alingbi na ni pëpe? Kangango bê ayeke mû lege na e ti zia kamême mbeni ngoi si Mbeti ti Nzapa nga na yingo vulu ti lo ti ndu bê ti zo ni (1 aCor. 3:6, 7; aHéb. 4:12). Tongana zo so e yeke manda Bible na lo ayeke na kpale ti gbu nda ti ye ni nga ti sara ye alingbi na ye so Bible afa, ahon ti forcé lo, a yeke nzoni ti gue na mbeni tënë ni nde. Tongana e ngbâ ti manda Bible na lo na kangango bê nga na ndoye, a lingbi ti pusu lo ti changé ambeni ye tongana ngoi ayeke hon.